¹ 1 ኧሰማትኞ አስተማሪ ኧኸነ ኢና ኢረእካ ፍርድ ንቴኤፐርነኸ ቲሂሩዋይ ኧኸሬ ታሁዋ ግት ኖኦራ ሰቭ አስተማሪ አይህር ። ² 2 እንእቨንራ በሮኦራ ዘንጋ ንድቫፐርነ በቃርኋ አይድቫፐረ ሰቭ በረፐረ እንእ ኤኤድኋይ ኦኦሮት ኢኸነዳ ጥርር ሰቭን ። ³ 3 ፈረዝ ኢቴኤዘዡዋኸ ሉጓም ባቃሁኖዋ ናቸፍርኔዮምታ እንእ ኤኤድሁኖዋይ ኧሳረንረኸ ኒኢዝዝኔዮዋመኸ ። ⁴ 4 እንዴ መርከብ ኦዢዮዋ ማንኝእ ኑኡየ አአርቪ ቱኧቭ ንፋስ ኢገፋኮታ አአር ቢሆሩዋ መርክብ ኢረዳካ ምስ ብእሲየ መሪ ኧሳረን ኤኤዲ ኤፐ ኢዎስትኩ። ⁵ 5 ህመኸ አነቨድ እንሲየ ኧገግንራይ ምሲየ ቲኸር በሮኦራ አአር ኢትጒይኴዝ ኑኡየ ድቭር ብእሲየ እሳድ ኧተኸ ነተደ ያርኧኸ ቦስሩዋ ። ⁶ 6 አነቨድቭ እእሳድነኸ ፤አነቨድ በብሲየንራ ግት አነዳ ሙጥጥ አአር ኧቬንአወ ፍጥረትን ፤አነቨድ ሙርአ ምሲየንራ ያሰንህ አአዛብ እሳድመኸ ምሲየንራ እንእ ኢቬኪር ። ⁷ 7 በድቭር አነዳ አዊቪ አፉቭ ህመኸ ባአፎር ፎር ኢትሻዉታዪ በቫርቭ እሃ ከስ ኢረቩርታ ፍጥረት እንእ በሰቭ ተጎዦሙ ። ⁸ 8 ዘንጋ ጭን አረቨድኋ ኢገዛይ ኢኸነዳ ሰቭ አቸቭ ኤነዳ ። አነበድ የኧትርካ መርዝ እኧቬንአዎዪ ፎያድቭ ኤነነ ሙጥጥን አአር ። ⁹ 9 በሁድቭ አቦንራ ጎይታ ናትሼኩርነ በሁድቭ በጎይታ መርክ ኧትፎጠሩዋ ሰቭ ንሰድቭነ ። ¹⁰ 10 ትእማት አነቨድ ደረትቪ ስድቭ ኢዎኦዋ ኧሰማትኞ ዋኸ ኧሁርት ኤኖዳ ። ¹¹ 11 ታአት ጭርጭሪየ ኢኢቭካዪ ኢቨርርካ እሃ ኢገድዲ? ¹² 12 ኧሰማትኞ ኧቭርቱኳን ኤኧ ኧዎይን ቡስር ፤ኧወይን ኤኧቭ ኧቭርቱኳን ቡስር ያፎዪ ኢኸኔ ? ህመኸቭ ቲቨርርካ እሃ ኢኢቭካ እሃ ኢረሁዉዪ? ¹³ 13 ታሁዋ ግት ሃሪቪ ኢቬስርካቭ ሰቭ ማንተን ? በረፐረ ኧኋርት ባኖዳ ቦወሄ ኑሮኋ አተሽ ። ¹⁴ 14 ዘንጋ ችን ኢቨርርካ ቅናትቪ ገግቭ ኧርዎጅት በሂናሁዋ ቢረቭር ኑኡነድ አይተሳቫሁዋ ኧዉረ በኸረ አአር አትፉጥሩዋ። ¹⁵ 15 እምም አይነት ሃሪነድ ኢረሁዊዳ ሁዳ ታአለም ተቨሰርቪ ተሰይጣንምን ባኸሬ ተጎይታይ አኸረዳ ። ¹⁶ 16 ቅናትቪ ገግቭ ኧሮጅትቭ ባኖኮዳ ኤኤዲ መራክስቪ ሙጥጥ ሜናቭ እንእ ኢረዉሩዋ ። ¹⁷ 17 ዘንጋኋ ጭን ተጎይታይ ኢረሁዊዳ ኧኋርት አወተራቸኋ ጥርርን አአር ተህም ቀጥወ ሽኛት ኢረድካን አአር ፋራይሂን ፤አኪያ ይቭካን አአር እአፉ ይቭካን አአር ወሄይቭ ቡስር ኧቬንአወዳን አአር ፤ኧትቋቁትቪ ኸጥነድቭ ኤኖዳን አአር ። ¹⁸ 18 ወገሬት ኢረጅታ ሰቭ ወሄነድ ዘንኦምታ ኧፅድቅ ቡስር ኢራጩዋ[ቁጥቁጥ]ዪንኦዋ።