¹ ዋ መልከ ፀዴቅ ኧሳሌም ንጕስቪ ኧሩኡየ እግዜርሜ ካህን ባንደ፤ሁድቭ አብራሃም ተሮኦራ ንጕስ ተዋካ ኤመ ቲቫአካ ነከቨንታ ዳረን ፤ ² አብራሃምቭ ትእንቭ አአር አት አስረኘ [አስራት] አዋአ አቨን አወተረ ሹቭኋ «ኧፅድቅ ንጕስ» ኧዋርትን ፤ተቀጥወቭ « ኧሳሌም ንጕስ »ኧዋርትን ፤ኧሳሌም ንጕስቭ ኧዋርት፤«ኧዋገሬት ንጕስ» ኧዋርትን ። ³ አቦሚ አዶድቭ ኧህር ዶᎄ ኤነንዳ ፤ኧዘቨርሞኋ ኢቆርሽኮዳቭ ኧህር ያርእወዳ ኤነንዳ ፤ ዘንጋኋ ጭን እእግዜር ትከኸ ኧዘላለም ካህን ኸረ ኢረቭር ። ⁴ እንዴ ምርአካ አአር ኑኡየ አአር ኧኸረኸ አጫሙጩዋ ፤አአቦንራ አላቃ አብራሃም ዳር ተቫነኸን ሁዳ ኢፈዝካኋ አአት አስረኘኋ ባረ አዋአ አቨን። ⁵ ካህንነድ አዉዮዋ ኧሌዊ ዴንጋ ማንኝእ ኧሰማትሁኖዋ አአብራሃም ዘር ዳር ቢሆሩዋ ፤ተሰቭኋ ተገግሞሁኖዋይ ኧሰማት አት አስረኘ ኢቴኤፖሩዋኸ ቂጫ ዪኢዝዝ ። ⁶ ዋዳ ጭን ኧሌዊ ጥቭ አኸረዳ ፤ቢኸርቭ ጭን ታአብራሃም አት አስረኘ ቴኤፐረ፤ኧተስፋ ቃር ኧቴኤፐረ ሁዳ ዳረንቭ ። ⁷ እእስ ኑእ ኢደርኮኸ አያዉራኝካ ። ⁸ ባአት አጋድኋ ታአስር ኧጅ አት ኧጅ ኢቴኤፖርታ ሰቭ ፤ኢዎጅታ ሰቭኖዋ ፤ቤኤኛ አጋድኋ ጭን እንእግዚየ ሙድ አይቫር ኢረቭረኸ ኧትምሰከረነ ኡዳ ኢቴኤፐር ። ⁹ አቸሞኋ ታአስር ኧጅ አት ኧጅ ኢቴኤፐርካ ሌዊ ፤ገግኋ በአብራሃሚ አጋድ ታአስር ኧጅ አት ኧጅ ካሰ ቢዩሪ ዋራይ አይኸርካ ፤ ¹⁰ እመኸቭ ዩሪዳ ሁዳ መልከ ፀዴቅ አአብራሃም ኧረከቨን ግዚየ ሌዊ ገና ባአብራሃሚ ወንዘብ ባንደ ። ¹¹ ሰቭ ሙርአ ኢኸርካ ሁዳዪ ኧሰቭ ቂጫ ኧቴቨን ሁዳ በሌዊ ካህንንድ አይነት ተኸረ ፤አአሮኒ ካህንነደኸ ታይኸርቭ ኧመልከ ፀዴቂ ሹመተኸ አአር አነንዳ ኤኛ ካህን ኦኦት ባናትሴኤዳ ። ¹² ካህን በትሸገረጋ ቂጫሞኋ ኧግርድቭ ኧትሶጎርት አኖወ። ¹³ ዋዳ እንእን ኤኤጅነ ሁዳ ጭን ቴኤኛ ጥቭን ተህም ትብ ህትቭ ቢዪንኧኮዳ ኤኤዲ አጌኰረ አአር ኤኛ አአር አትዎኋ ኤንዳ። ¹⁴ ጎይታንራ ተይሁዳ ጥቭ ኧቫአኸ ኧትሄረዳን አአር ፤ሙሴ ኧካህን ሁኖዋ አአር ቲዝሬካ ኧዋ ጥቭ አአር ኧዝሬከን አአር አታአር ኤንዳ። ¹⁵ ኢና ኧዝሬከኔ ሁዳ ኢረእካ አአር ኢትሄርካ ሁዳ ጭን ኧመልከ ዴቀኸ አአር ኤኛ ካህን ቢትረሳን። ¹⁶ ሁዳ ካህን ኧኸረ ሁዳ ኧሰቭነድ ቂጫ አይነት ታይኸርቭ እንእ ግዚየ ቢረቭርካ ባይትሻር ኧሂዎት ደረግን፤ ¹⁷ ዋኸ ቧርሙ ሙሶኮርነ፤ «ኧመልከ ፀዴቂ ሹመቲ ሁዳኸ፤ አኸ እስተ ዘላለም ካህንንኸ ።>» ¹⁸ አአወተረ ቂጫ ማንኝእ አያጌኲር አአር ኧኸሬ ሻሪ፤ ¹⁹ ቂጫቭ ኡዳ አትዎኋ አትሞኋ ሙርአ ዪንአይ አይኸርኔ ኧኸሬ፤እእግዜሪ ንቴኤነቭኔኮዳ ኧፈዘ ተስፋ ማአ። ²⁰ እም ካህን ኧሁርት ተየ አይቫር አማአዳ ፤ኤኛ ካህን ሁኖዋ ካህን ኧሆሩዋ ሁዳ ተየ አይቫርን፤ ሁዳ ጭን ካህን ኧኸረ ሁዳ በተየን፤ ²¹ ህመኸ ኧኸረምኔን እግዜር ዋኸ ባረ ኧዝሬከን ሁዳ ፤ «ጎይታ ተኘ ፤አሳብሞኋ አይሸግርካ፤ «አኸ ኧዘላአለም ካህንንኸ ።» ²² ተዋ ተየ ኧትረሳ ኢየሱስ ኢፈዘካ ጉርዳ አᎀ ኸረ። ²³ ካህን ሂተውዋ አገልግሎትሁኖዋ ቲያጉሎጉሉዋ ይኢክሹዋይ ሙድ ኧኸንአኖዋይ ኧከሬ ፤ኧዋ ኢፍቲ ካህን ኧረፖሩዋ ሁኖዋ ሙዝርሁኖዋ ኖኦራ አአር ባንደ። ²⁴ ኢየሱስ ጭን እስተ ዘላለም ኢረቭርካ አአር ኧኸሬ ካህንነድኋ አይትሻርካን አአር። ²⁵ ህመኸ ኧኸሬ ኧሁኖዋ አአር ቲማልድ እንእ ግዚየ አያ ኸረ ኢረቭሪ ኧኸሬ ፤በሁዳይ አጋድ እእግዜሪ ኢዎኦታ ሁኖዋሙርአሞኋ ያተርፍኮዋይ ኢኸርነ። ²⁶ አካ ኢና ያትሲይኧንረዳ ሁዳ፤ኧትቀደሰ ፤ቅነጨ ኤኖወ፤ጥርር፤ተቫጢረተኘ ሁኖዋ እንእ ቡችር ኧኸረዪ፤ተሳቫይቭ በፎረ ኧከበረ ኧዋኸ ዋና ካህንን። ²⁷ ሁድቭ ኤኤኛ ዋና ካህነኸ ፤አወተረ ኧገግኋይ ባጢር፤ ተህም ቀጥወ ኧሰቭኋይ ባጢር ቲቭር እንእ ቀረ ህትቭ አቶኦኑዉት አያትሲእኩዳ ፤ገግነድኋ አዋአ ባአይፐረጋ ኧቫጢርሁኖዋ እእማተጋ ስርም አይደዉርኰ አአር ህትቭ አቴኤነቨ ። ²⁸ ቂጫ ሁዳ ኤኤኛሞኋኸ ባጢረተኘ ሰቭ ዋና ካህን ኤፐታ ኢሾም ፤ተቂጫ ቦፎረ ኧቫአ ተየ ጭን ኧዘላለም ሙርአ ኧኸረ እእግዜር ትከ ሾᎀ።