¹ ጴጥሮስቪ ዮሃንስ ኧሰቭ እንእ ቲዝረኩም ታነዉዋ ካህናትቪ ቤተ መቅደስ ዩኡሮታ ሰቪ አላቃ፤ እመኸቭ ኧሰዱቃ ሰቭቭ ኧሁኖዋይ ኤፖሙ ሞኦም ። ² ሁኖም ኪሸረኘ ሁኖዋ ኢየሱስ ተዉድ ኧትረሳመኸዪ ኧዎጁም ሰቭ ኢትረሾዋመኸ ባትሞርትሁኖዋ ቡሼኧኸ ማአቾም ። ³ በህም ኧቫአ ጴጥሮስቪ ዮሃንስቭ ጦቦጪዮም፤ ኧፈርቭ ኧቨሼ ኧረፐሬ ኧኸሬ ጋእ ቲቭር ስን በኦህኔ ቢድ አሬኧዉዮም ። ⁴ ቢኸርቭ ጭን ቃርኋ ተሰምኦዋ ሰቭ ኖኦራሁኖዋ በኢየሱስ ሹቭ አሞርሙ፤ኧገማቭ ሙዝር አምእስት ሁቭ አአህር ኸረ ። ⁵ በቭረጋሞኋ ዳኘሞሁኖዋዪ ባሪቅሞሁኖዋ ኧቂጫቭ አስተማሪ ቢኢየሩሳሌም ተደሞጁም። ⁶ ሊቀ ካህናትቭ ፤ሐና ፥ቀያፋ፥ዮሃንስ ፥እስክንድሮስቪ ኣሊቀ ካህናት ሁኖዋይ ቢደሰቭ እንእ በህመኸ ባነዉተ። ⁷ እም ሰቭ ኧጴጥሮስቪ ኧዮሃንስቭ ፤በግት አትሸኮዉዮምታ፤ዋ ዘንጋ ኤፐሁዋ ሁዳ በቫን ደረግ ዌ በቫን ሹቭን ቧርሙ ተሳአሪዮም ። ⁸ ሃአ ግዚየ ጴጥሮስ በመንፈስ ቅዱስ ተቬንአታ፤ ዋኸ ባረኖም «አሁዋ ኧሰብ እንእ ዳኘዪ ባሪቆ ፤ ⁹ ኦኳ አዋ ጅረ ምስ ኧቴፐነ ወሄ ዘንጋ ፤ኧተነፈኸ ትትሳአርንረ በኸረ ፤ ¹⁰ አሁዋ በሰኧርሁይ ሁዳ እግዜር ጭን ተቩድ በረሳን በናዝሪት ኢየሱስ ሹቭ ፤ኧተነፈኸዪ ኢኢፍትማሁዋይ ኧትሸከቨኸ አሁም ብትሆሩዋ እእስራኤል ሰቭ እንእ ኧሃር ። ¹¹ ሁድቭ ፤ አሁዋ ግምብ ታረሽታ ሰቭ ኧቀንጥሁይ ፤ ኧግምብ ቢድ ዋና ኧኸረ እቭርን ። ¹² ተሳቫይ በገዳ ንተርፍኔኴ አቩንረ ሹቭ እማትን ፤ሁድቭ ኢየሱስ ክርስቶስን ባኸሬ ኤኛ አአር ኤንዳ ባረኖም» ¹³ ጴጥሮስቪ ዮሃንስቭ ዋኸ አታአር ታይፎርሙ ቲዝረኩታ ቢያዢዮዋ ፤አትሟሩዋ ትምርት ኤነነዋ ሰቭ ኧሆሩዋኸ ኋርሙታ ወግ ኸረዎም ፤ቲኢየሱስቭ እማቲ ኧረፖሩዋኸ ¹⁴ ገፓኖም።አፊያቭ ኧኸረ ምስ በህመኸ ተሁኖም በትሸከቨ ኤእዲ አሸዊ ኧኸሬ አፍዲተዉዋታ ኢዝረኮዳ አአር ቦኮርሙ። ¹⁵ ህመኸ ኧከሬ ኧዋ ኧጴጥሮስቪ ኧዮሃንስቭ ተኦጎት ግት ያዎኦዮኸ ኤዘዡምታ፤ሁኖም ባአት ተደሞጁም ዋኽ ቧርሙ አትዋቾም ፤ ¹⁶ « ባቴ ዋ ሰቭ ማሃ ነንአነየዋ? ፤በሁኖዋ ኧጅ ኧቴፐ ወግ ዘንጋ እንእ ብእስራኤል ገኘ አነዳ ሰቭ እንእ ሃረ ህመኸ ኧኸሬ ዋ ዘንጋ እም ዘንጋ ንፍጠጥርኔኸ ኤነዳ ። ¹⁷ ህመኸ ኧኸሬ ዋ ዘንጋ በሰቭ እንእ አይትዝራካኸ ዋ ሰቭ ተዋቴ ዲቪተዉኮ በዋ ሹቭ እእማት ሰቭ አይዝረኩዋኸ ናትጤፕኔየዋ ቧርሙ ።» ¹⁸ ሆኖዮምቭታ አት ተዉርኤተኝ ቢኢየሱስ ሹቭ ስርም አይዝረኩዋመኸዪ አያትሞሩዋመኸ ኤዘዢዮም ። ¹⁹ ጴጥሮስቪ ዮሃንስቭ ጭን ፤ «እንዴ ትእግዜር ኢረእ አሁዋ ኧታአዘዥት ብእግዜር ኢፍቲ ወሄ አአር ኧኸረ አኸረ አሁም ፉርጂ፤ ²⁰ ኢናሽ ኧሰምአነዪ አሸነዪ ሁዳ ተዞጉትሽ ኢኢ አንርነዳ ቧርሙ ዥፖርኖም። ²¹ ሰቭ እንእ በቴፐ ወሄ ዘንጋ እእግዜር ሽኩርት ያቲኢንዉዋ ኧረፐሬ ኧኸሬ አታአር ዪንኣኮይ ፈኘዉምታ ኖኦራ አአር አትፈኘዉዮምታ ጎፎርዮም ። ²² ብእም ብእግዜሪ ወግ ዘንጋ አፍያ ኧኸረምስ እድሜኋ ተአርቭአ ዘቭር በፎረ ኢኸርኩ ባንደ። ²³ ጴጥሮስቪ ዮሃንስቭ ተዎሁኔ ቶፎቾዮዋ ቀጥወ ኧገግሁኖዋይ ሰቪ ተዠፖርሙ ዎርሙታኧካህን አላቃዪ ኧገኘቭ ባሪቅ ሁኖዋ ኧዋሪዮዋ ሁዳ እንእ ጆፖርሙ ኤኤጂዮም። ²⁴ ሁኖም ዋ ዘንጋ በሰምኦዋጋ ተዶሞጁም ቃርሁኖዋ እእግዜሪ ነሾምታ፤ዋኸ ቧርሙ ጠሎት ኤፖሙ « ኑእ ኧኸርኸ ጎይቶ፤አኸ ሳቫዪቪ አፈርቭ ፥ባርቭ ፥በቫርቭ ከስ አኖዉታ ሁኖዋ እንእ ኸለቅኸ። ²⁵ በመንፈስ ቅዱሲ አጋድ ባአቦንራ በዳዊት አፉ <አረማዊ ሰቭ ኧቭር ማአቾሙ ፤ ሰቭ ሁኖሁ ኧቭር እምኧኸ አደሙም፤ ²⁶ ፥አአፈር ንጉስ ኧቭር ተረሾሙ ፤ ኢጎዦታቭ ሁኖዋ እማቲ ተዶሞጁም፤ በጎይታቭ፤ በክርርስቶስ ፎር በጠላትነድተረሾሙ>። ²⁷ «ዉረቭ ሄሮድስቪ ጳንቶስ ጲላንጦስቭ ታአረማዊ ሰቭቪ ትእስራኤልቭ ሰቭ እማቲ ሆሩምታ በዋ ከተማ አኸ በሸፐትኸን በትቀደሰ ትካኸ በኢየሱስ ፎር ያዱሙዋይ ተስዎሶዉም ። ²⁸ እመዳ ኧኸረ ሁዳ አኸ በተርኸ በደረግማኸዪ በፍቃድማኸ ይኸርኬ ኧቫረንሁዳ ኢኸርኔን ²⁹ ዋአካቭ ጎይታንሮ አኸ ኧዥ ያጌኪርከዳ ሰቭቭ ቃራኸ ታይፎርሙ በድፍረት ኢዝሮኮዳ ደረግ አኸ አክዋ ። ³⁰ አፊያቭ ቲንአይ ኧጃኸ ዛጋ፤ በትቀደሰቭ ትካኸ በኢየሱስ ሹቭ ወግቭ ሽግቭ ኧኸረ ዘንጋ አተሽ ።» ³¹ ጠሎትመሁኖዋ ተጀፖሩዋ ቀጥወ ኧረፖርኰ ኤኤዲ ቅረቀረ ፤እንእመሁኖዋ በመንፈስ ቅዱስ ተቬንኦም ፤እእግዜርቭ ቃር አታአአር ትይፎርሙ ደፎርሙታ ዝሬኮም ። ³² አአሞርሙ ሰቭ እንእ እማት ሂንቭ እማትቭ አሳብ ባነኖተ ፤ዋጋሞሁኖዋቭ እንእ ብእማት ባንደ ባሃሬ «ዋዳ ኢያትን» አአር ይቭካ ሰቭ አነፐራ። ³³ ኧክርስቶስሜ ኪሸረኝ ጌታ ኢየሱስ ክርስቶስ ተቩድ ኧትረሳኸ በሩእ ደረግ አአዉጅት ቆነሹም ፤ብእንመሁኖዋ ፎር ኑእ እእግዜር ጠጋ ባንደ ³⁴ በግትሞሁኖዋ እማት አጀገረን ሰብ አነፐራ ፤እመኸቭ ኧኸረሁዳ አፈርቭ ኧህር ቢድ አነኖታ ሁዳ እንእ አስራዉምታ ዋጋኋ አዎኦምታ ፤ ³⁵ በኪሸረኘ ሁኖዋ ኧግሪ አዎኦም ያዎሮዪታ ፤እእንመኋ ያትሲእኩዳ ያቲሲእኩዳ አአህር ኢሻኩጂ ኧረፐረዴ ። ³⁶ በቆጵሮስቭ ኢረቭርካ አት ዮሴፍ ዩሪዳ ኧሌዊ ጥቭ አአር ምስ ባንደ ፤ኧሁድቭ ኪሸረኘ ሁኖዋ «በርናባስ»ቧርሙ ሹቭ አዎኖነ ፤በርናባስ ኧዋርትቭ፤«ኢሰቡርኮዳ ሰቭ» ኧዋርትን፤ ³⁷ ሁድቭ አፈርኋ አሲየታ በክርስቶሲ ኪረረኝ ኧግሪ አቫአ አዎናንቭ።