¹ አት ቀረ ጴጥሮስቪ ዮሃንስቭ በጠሎት ግዚየ ዋአና በዢኧ ሳአት ቤተ መቅደስ ያሩዋ ባንደ። ² በህሜ «ማርካማ»ቧርሙ ኢሆሬዳ አት ኡፎቻ ባንደ ፤በህም ኤኤዲ ተቴኤኘ ቆነሺታ ኧጀኘ አት ምስ ባንደ ፤ሁድቭ እንእ ቀረ በሄእዲ አዎኦም ያዎሮዪታ በኼኤዲ ቸና ቤተ መቅደስ ቲጎኦታ ሰቭ ኢሰኧር ባንደ ። ³ ሁድቭ ጴጥሮስቪ ዮሃንስ ቤተ መቅደስ ቲጎኦታ አሸኖምታ ዋጋ ሳአረኖም ። ⁴ ጴጥሮስቪ ዮሃንስቭ እማቲ ኧቭስ ሁዳ ኤፖሙ ቱኩ ኤፖሙ አሸዉምታ ፤ጴጥሮስ «እንዴ ኢይናይ ኧንአ ኧዥ»። ባረን ⁵ ምስቭ ሁዳ ተሁኖዋ አጨፈድ ኢረህቪ ዣቨታ ቱኩ ኤፐ አሸኖም ። ⁶ ጴጥሮስ ጭን« ኢያ ብርዊ ወርቅቭ ኤነኒዳ ዘንጋኋ ጭን አነኒዳ ሁዳ ኢቭኸዴ በናዝሬት ኢየሱስ ሹቭ ተሳታ ሆር» ባረን። ⁷ ቀነ ኣጅመኋ ጠበጠ ነሳን ህመጋ ኧግርሞኋዪ ጉርወድሞኋ ቶፖም። ⁸ ዘከረታ ቀጠ ባረ ተሸከቨ ፤ኧሆርትቭ ቀነሰ ፤እመዪቪ ህሜ ቲያርቪ ፎረኒየቭ ቲዘግርቭ ፤እእግዜርቭ ሽኩርት ቲያቲኢንቭ ተሁኖም እማቲ ቤተ መቅደስ ገፓ። ⁹ ሰቭ ሁኖዋ እንእ ዋ ምስ በኧግርኋ ቲያር እእግዜር ሽኩርት ቲያቲኢንቭካ ቢያዡዋ ፤ ¹⁰ ዋ ምስ ኧሃ ኢፍቲ ማርካማ ቢዩሪዳ በቤተ መቅደስ ኡፎቻ ቸናታ ኢሰኧር ኧረፐረ ሁዳ ኧኸረኸ ቦኋሩዋጋ በሁዳ ፎር ኧቴፐ ዘንጋ አሾሙታ ወግ ኸረዎም። ¹¹ አፊያቭ ኧኸረ ኢሰኧር ኧረፐረ ምስ ተጴጥሮሲ ተዮሃንስቭ አንጒያፈር ባረታ ኤኤፈ ኧጠበጠኖዋይ፤ሰቭ እንእ ወግ ኸረዎታ ሁኖዋ አኖኮዳ «ኧሰሎሞኒ ሜያ»ዩሪዳ ኤኤዲ ቲትራዉኡዋ ሞኦሙ። ¹² ጴጥሮስቭ ዋ ዘንጋ ቢያዥ ዋኸ ባረኖም «እእስራኤል ሰቮ ዋ ዘንጋ ኧቭር ወግ ኢኸርዎሁዋ ?ባቴ አትቭ ቢናይ ደረግ ዌ ቢናይ ወሄ ሜና ዋ ምስ አፊያ ህይተታ ተሸተ ኢትሸከቨኸ ኤፐነ አአረኸ አሰብሁምታ ኧቭር ኢናይ ኤፐሁምታ ቱኩ ኤፐሁም ታዡዋ ?። ¹³ አአቦንራይ እግዜር አአብርሃሚ፥ኧያዕቆብመዪ፥ኧይስሃቅሜ አምላክ ኧትከኋ ኢኢየሱስ አከበረን ፤አሁዋ ጭን ኢዎንደኸ አዋአሁም አአይፐርሁይ ፤ጲላንጦስ ኢፈዳኲ ቢሲእቭ አሁዋ ጭን በሁዳ ኢፍቲ ኸታሁይ ። ¹⁴ ቅዱስቪ ፃዲቅቭ ሁዳ ኸታሁምታ ደቨኘ ሁዳ ጭን ኢፎጆነኩዋኸ ሳአርሁም ። ¹⁵ ኧዘላለም አያ ዬካ ሁዳ ኧተርሁይ እግዜር ጭን ተቩድ ነሳን እእም ዘንግ ኢና ምስክርንረ። ¹⁶ ዋ ታዢዳ ቲሂሪዳ ምስ አፊያ ኸረ ኧትቁሟሞረ ሁዳ በኢየሱስ ሹቭ ቦኦዎርትነኋ ፤እንእማሁዋ ታዢመኸ ሙርአ አፊያ ኧረከቨሁዳ ኢኢየሱሲ ሹቩቪ በሁድሜ አጋድ ቢረሁዊዳ እምነትን። ¹⁷ «ዋአካቭ ኧሰማትኞ አሁዋ ዋ ዘንጋ ኤፐሁዋ ሁዳ አልቃማሁዋኸ ባንኋርትኃ ኧኸርኸ ኤሂር ። ¹⁸ እግዜር ጭን ኧሁዳ አአር ኧኸረ ክርስቶስ መከራ ኧተኧወርት አኖወኸ በተረ በነቢ ሁኖዋ አፉ ኧዝሬከን ቃርኋ ኤፐ ። ¹⁹ ባቴ አካ ባጢራሁዋ አፉ ይቩኩዋኸ ንስሃ ጉዉኦምታ እእግዜሪ ተዣዎሩዋ ተጎይታሜ ሃአዉም ሰሳ ኢሆርኮዳ ዘቨር ያአነሁዋሴ። ²⁰ እመኸቭ በተረ አሁዋ ኧትሸፐተነሁዋ ክርስቶስ ሁድቭ ኢየሱስ ኢኮሽነኩዋሴ ። ²¹ እግዜር በተረ በቅዱሳን ነቢኋ አፉ ኧዝሬከመኸ ፤እንእ አአር ወያ ዪንአዎዳ ዘቨር ቲቫአ ስን ሁዳ በሳቫይ ኦኦክሽት አኖወ ። ²² ሙሴም ዋኸ ባረ «ጎይታ እግዜራሁዋ ታሁም ግት ኢያኸ ነቢ ኢረሳነሁዋቴ፤ሁድቭ ኢኢድሁዋታ ሁዳ ሱቩኤ፤ ²³ እም ነቢ ኧቫረን ሁዳ አይሰቭአ እንእ ፤ተሰቭ እንእ ግት ኧትቫይተር እእፋ። ²⁴ ጪግቭ ተሳሙኤል ዘቨር ቆነሹምታኧትረሾዋ ነቢ እንእ ኧዋ ግዚየ አአር ዝሬኮም ። ²⁵ አሁምቭ ኧነቢ ዴንጋንሁዋ ፤እመኸ አት እግዜር አአብርሃም በዘራኸ አአፈር ጥቭ እንእ ኢትባረክኬ ባረታ ኧገፓን ጉርዳ ወራሽንሁዋ ። ²⁶ እግዜር ትከ ሁዳ ሸፐተ በረሳን ግዚየ ኦጣኦጣሁዋ ተቩጥጥ ሜናሁዋ ዣቪተ ኢደርሁዋኸ በተረ አሁዋይ ኬሸን ።