¹ በከተማሞኋ ኧትረሳ መራክስ ጭን ቲቭካ ፤ጳዉሎስ በክርስቶስ አአሞሩዋ ኧክርስቶሲ ተማሪ መከረኖምታ፤ተስራፐተኖምታ ሜቅዶኒያ ገኘ ያሪ ተረሳ ። ² ቢያሩወዳቭ ኤኤዲ እንእ ኧሰቭ እንእ በሮኦራ እእግዜር ቃር ቲቨህር ግሪክ ገኘ ሰንአ፤ ³ በህሜ ሶኦስት በኘ ስን ቸና ። ሶሪያቭ ገኘ ያሪ ቂጥ ቂጥ ቲቭካቭ ኧይሁዳ ሰቭ ኢጠጪ አትዋቾኯይ ኧኸሬ ተሜቅዶኒያ ገኘ ኧኝኣተታ ያሪ አጫመጠ ። ⁴ ኧቤሪያ ከተማ ኧጳይሮሲ ኧች ፥ኧተሰሎንቄም አርስጥሮኮስቪሲኮንዱስቭ፥ኧደርቤንቭ ከተማ ጋይዮስ፥ትእሲያ ገኘቭ ኧዎኦዋ ቲኪቆስቪ፥ጥሮፊሞስ፥እመኸቭ፥ጢሞቲዎስቭ ተሁድቭ እማትሜ ዎርሙ ። ⁵ እምእ ሰቭ ኢኢፍትንራይ ቦተርንረ ዎርሙታ በጢሮአዳ ከተማ እራዉንረእ። ⁶ ኢና ጭን ኧፋሲጋ ባአል ተዋአ ቀጥወ ተፊልጵስዩስ በመርከብ ተረሳነታ ታአምእስት ቀረ ቀጥወ ቴኤኛሁኖዋ በጢሮአዳ ከተማ ተራከቭነ ፤በህሜ ሳቭአት ቀረ ቸናነ ። ⁷ በሳምትሞኋ በአወተራቸ ቀረ እንጀራ ንቭርአኔ በትደመድኔ፤ጳዉሎስ ብምረጋኋ ያሪ አጫመጤ ኧኸሬ ተሁኖዋ ኢትዝራይክ ባንደ ፤ግት ምሳአረቭ ስን ዘንጋኋ አዴከ ፤ ⁸ በደመድኔኰቭ ፎቅ ኖኦራ መብራት ። ⁹ አዉጤኪስ ዩሪዳ አት ዘርማቭ በመስኮት ፎር ቸና ባንደ።ጳዉሎስቭ ዘንጋ ቢያዴክ ዊኢንድ ዊኢንድ ባረንታአታአር አይሂረኸ ኔኧ ተሶኦትተኘ ፎቅ ገዳኒየ ውንደ ወተኧታ ሞደታ ነሸዪ። ¹⁰ ጳዉሎስቭ ወንደ በፎርኋ ዘፍ ባረ ወተኧ፤ ኤኤፈንታ ፤«ሉህኋ አነ ጫዉ ጫዉ አትዋሩዋ ባረኖም። ¹¹ ጳዉሎስቭ ሃአቨ ተዠፐረ ፎቅ ዋአታ እንጀራ ፈነቨ በንአታ ጋእ ቲቭር ስን ኖኦራ አአር ዝሬከታ ተረሳታ ወረ ። ¹² ሰቭቭ ሁኖዋ ሃአ ዘርማ ሁዳ አያ ኸረታ ወሰጂ ፤ሁኖም በዋ ዘንጋ ቡሼኧኸ ሳረኖምታተቁሟሞርሙ። ¹³ ኢና ጭን ጳዉሎስ በኧግርኋ ባአፈር ያሪ ኧሴኤ ኧኸሬ ሃአይ ቲቫአካ ብደይተነ ሆይተነ በሃይ ንቴኤፐርነዪ በተርነ ኧመርከብ ሁዳይ ወርነ በመርከብቭ አሶን ዩሪዳ ኤኤዲ ወርነ ። ¹⁴ ባአሶንቭ ተትራከቭነ ቀጥወ ፤ቴኤፐርነዪታ እማትሜ በመርከብ ሚጢሊኒ ወርነ ። ¹⁵ በቭረጋሞኋ በመርከብ ትናርነ ኪዩ ቲዩሪዳ ብእሃ ግት አንዳ ገኘ አጋድ አጋድ ማአነ ሰንአነ። በህም ምረገኘ ሳሞን ከተማወይአነ ዋአነ ፤በቭረጋሞኋቭ ሚሊጢን ሰንአነ ። ¹⁶ ጳዉሎስቭ ብእስያ ገኘ ኖኦራይ ስን ኢኢክሲ አንሴኤ ኧኸሬ ፤ኤፌሶን ታይጋአ ቴእተታ ያሪ አጫመጠ ፤ህይተነ ቢሰርአቭ ባአል አምሳ ቢዩሪዳመንፈስ ቅዱስ ኧወንደወአይሁዳ ባዓል ብእየሩሳሌም ኢዎኧሪ ተሃይንደ ባንደ ። ¹⁷ ጳዉሎስ በሚሊጢንከተማ ታነ ፤ ኤኤፌሶን ሰቭ ኬሸታ ኧቤተ ክርስቲያን ባሪቅ ሁሮዮዋ ባረ ። ¹⁸ ተዎኦም ቀጥወ ዋኸ ባረኖም «እስያ ገኘ ተገፓሁወ ታአወተረ ቀረ ቆነሺታእንእ ቀረ ታሁዋ ኧተኸ ኧረፐርሁኸ ቲሂሩዋ። ¹⁹ ማንኝእ ኧይሁዳ ሰቭ አትቫጀቶዉዋ ኑእ መከራ ቢያሰርኦኮኝቭ እእግዜር ገርነድቪ፤ቢኢምባቭ አጏኵርት አንቸኧሁንዳ። ²⁰ በጆፎረቭ ኸረ ቢድ ቢድ ትንዦዉር ፤አሁዋ ታትሞርትቪ ያጌክርሁዋቴቭ ኧቫሁን ሁዳ ተዘጕት እማትቭ ኢኢ አምባኋ ። ²¹ ንስሓቭ ጊቭ ኧተዉዋ እእግዜሪ ኢትዦፖሩዋመኸዪ ግጎይታመንራ በኢየሱስ ያአቩሩዋመኸ ፤አአይሁድቪ ኧግሪክቭ ሰቭ ጔከርሁ ምሰከርሁኖም ። ²² ዋአካቭ ኢያ ሃአይ ትንሰርአካ ምር ያትቻይኬኸ ባሂርቭ መንፈስ ቅዱስ ፤ኢየሩሳሌም አረኸ ኤዘዘዪ ። ²³ ዘንጋኋ ጭን ብናርዎታ ከተማ እንእ ኧታአጎጅትቪ ኖራቭ መከራ ዪኢዬኸ መንፈስ ቅዱስ ኤኤደዪ ። ²⁴ ኧህር ባኸሬ ዋአካቭ ኢያ ተጎይታ ኢየሱስ ኧቴኤፐርሁን እእግዜሪ ኧጠጋ ያተርፍካ ወሄ ዋራይ ኧሞስኩርት አገልግትት ብንጀፕር ኢያ ነብሱወድኛ ታአታአአር አንቬዝርኩኸ ሃኸ ማንኝእምን አአር። ²⁵ «ዋአካቭ ፤ቢኸር ዳር በግታዋ ዦርሁ እእግዜር መንግስት አአር ኤኤድኩዋ አሁዋ እንእቫሁዋ ተዋ ቀጥወ አት ኢፍትኛ ኧታዥኘኸ ኧሂር ። ²⁶ ህመኸ ኧኸረሜ ትእን ሰቭ ደቭ ጥርር ኧኸርሁኸ ኦኳ ናአዉድሁዋ ። ²⁷ እእግዜርቭ ፍቃድ እንእ አሁዋ ታአዉጅት ኢኢ ኧቫሁወ ቀረ ኤነዳ። ²⁸ ኧገግማሁዋዪ መንፈስ ቅዱስቭ ፤ዜማቸ ኤፐ በፎርኋ ኧሾመናሁዋ አቫአጋ እንእ አአር ተጦፑዋ፤ በገዛ ደብሏ ሲየ አተነፈን እእግዜሪ ቤተ ክርስቲያን አሮዋ። ²⁹ ኢያ ተወርሁ ቀጥወ ፤ ጣይ ኢትራጦቁታ ኡጎሮይየኸ እአር ሜኤተዉዋ በግታሁዋ ተስረረጭተዉ ኢጎኦዋመኺ አቫአጋቭ ሁኖዋ አያቨጥጥኮኸ ኧሂር። ³⁰ ታሁም ግት ዳር ኧገግሁኖዋ ያሄትርኮታ ሰቭኢንሳሾዋይ ኧዉረ አአር ኧኸረሁዳ ያጣሙታ አአር ኢትረሸቴ ። ³¹ ህመኸ ኧኸረሜ ተጦፑዋ፤አት ግዚየ ኢኢታንቭር ሶኦስት ዘቨር ሙርአ ዋአናዪ ምሳአረ ምርአካ አአር ቢኢምባ ኧቨከርኩዋኸ ኧትዘገድሁዋ። ³² ዋአካቭ እግግርር እመኸቭ ፤ያቁሟሙርሁዋመዪ፥በትቆደሹዋ ሰቭ እንእ ኢፍቲ ደረድ ዪቭሁዋይ ኸርነዳ ኧጠጋኋ ቃር አደራ ኢቭሁዋ። ³³ አአትቭ ሰቭ ብር ዌ ወርቅ|ቭ ኧህር ሁጅር ዝጐ አባኋ ፤ ³⁴ ዋ ኧጅኛ ኢያዪ ቲያቭ አኖዉታ ሁኖዋ እንእ ቢያትሲኣንረዳ አአር እንእ አጔኴርንረኸ አሁም ቲሂሩዋ። ³⁵ በደረግንራ ቂጭተነ አጀገረኖዋ ሰቭ እኦጎዥት አነቨንረኸ ቤፐሁን ሁዳ እንእ አቴሸኩም ፤<ቲቴኤፐርካ ኢረእ ዪቭካ ኢረእ ኧትዳረዳን አአር> ይቭካ ኧጎይታ ኢየሱሲ ቃር ኧትዘገደንረ ። ³⁶ እመኸቭ ተቫረ ቀጥወ በጉርወድኋ ወካ ትእንመሁኖዋ እማቲ ጠሎት ኤፐ ። ³⁷ እንእቨሁኖዋ ቡሼኧከ ቤኮሙ፤ ኧጳዉሎስቭ አንገድኋ ጠቦጩም ሳአዊ፤ ³⁸ ተቫረኖዋ ሁኖዋ እንእ ኧትሰምአኖዋ ሁዳ ተዋቴ አት ኢፍትኛ አታዥኝዳ ኧቫረኖዋቃር ባንደ ፥ተህም ቀጥወ ኧመርከብ ሁዳይ ስን ጔኴጂ።