¹ ቢኢየሱስ ክርስቶስ ቃር በገፓን ኧሂዎት ተስፋኸ ብእግዜር ፍቃድ ኧክርስቶስ ኢየሱሲ ኪሸረኘ ኧኸረ ጳዉሎስ፤ኧኬሸን ኪሸር ፤ ² ኢረጂዳ ትከኛ ጢሞቲዎስ ፤ጠጋ ፥ምረትቪ፥ ወገሬትቭ ትእግዜር አብ ተጎይታመንራ ተክርስቶስ ኢየሱሲ አኸ ኧህር። ³ እማት ግዚየ ታናትሸክቭ ዋአናዪ ምሳአረ በጠሎትኛ አኸ አአር ትናጫምጥካ ኧድረ አቦንራ ኤፐዉዋመኸ በወሄ ቀርብኛ ኧትገዛነዳ እግዜር ሽኩር እቭኩ ⁴ ኢምባኸ ትናጫምጥ ቡሼኧኸ ኢሽረዪታ አዥሄ ኧትሜኝ ። ⁵ ኸጥነድ ኤነወ እምነታኸ ኢትዘከዴ፤እእም አይነት እምነት አወተረ በቬታኸ በሎይድቪ ባአዶድማኸ በኤዉንቄ ባነደ ፤ዋአካቭ ባኸ አነኸ ሃርሁ። ⁶ ብእም ኧቫአ ኧጅኛ ባኸ ፎር ባተግሁ ግዚየ እግዜር አቨናኸ ስጦታ ኧመንፈስ ቅዱስ እሳድ ትሳሳኮኸ አዘግድኸ፤ ⁷ እግዜር ኧደረግቪ ኧርመጀ ገግቭ ተቫጢር ዩኡሮኮዳ ፤ መንፈስ ባኸሬ ኧፈራድ መንፈስ አናቨንረዳ ። ⁸ ባቴ ኧጎይታንራ አአር ቲኢዲሜ ኧህር ፤ኧሁድቭ ትንቭር በታአከድሁ ቢያ አትቅቀቭጭ፤ቢኸርቭ እግዜር ቢዪኸዳ ደረግ ኧወንጌል ትትቭር ቲያቭ እማቲ መከራ ተኧቨር። ⁹ እማትቭ ኢና ቴፐኔ ወሄ ዘንጋ ታይኸርቭ እግዜር በገግኋ ፍቃድ በፀጋኋ አተነፈንረ፤ንትቀደስነሜ ኧኸናንረ ሁዳን ፤እም ፀጋ ተዘቨር ዘቨር ኢፍቲ በክርስቶስ ኢየሱሲ አጋድ ቴቨንረ ። ¹⁰ ዋአካ ጭን ኧዉድ ደረግ አአፋ በወንጌሊ አጋድ ሙድ ኤነወ ሂዎትቪ እንእ ግዚይየ ኧቦርት ኡኡዋዬ ባዋአን ፤ባተነፈንረ በክርስቶስ ኢየሱሲ ቦኦት ተሄረ። ¹¹ ኢያቭ ኧዋ ወንጌል ወሄ ዋራይ ኢኢዳዲ ኪሸረኘዪ አስተማሪም ኸርሁ ተሾምሁ። ¹² እም መከራ ኢሰርአቪዳ ሁዳ በሃ ኧቫአደ ቢኸርቭ አአመርሁን ሁዳ ማን ኧኸረኸ ኧሂሪ ኧኸሬ አንቅቨጭካ ፤አሁንቭ አደራ ሃአ ቀረ ስን ይእዬ ኢኸነኸ ሃርሁ። ¹³ አኸ ቲያ ኧሰምአኸን በክርስቶ ኢየሱስ ባነዳ ብእምነትቪ በርመጀቭ ህርታ፤ጤነኘ ኧኸረ ትምርት መሰሮ ጥጥ። ¹⁴ ቢና ከስ ባነዳ በመንፈስ ቅዱስ ህርታ አዉከ ወሄ አደራ ኧየ። ¹⁵ ብእሲያ ገኘ አኖዉዋታ ሁኖዋ እንእቨሁኖዋ ኧሆቾኘኸ ቲሂር፤ፊሎጎስቪ ሄርዋጌኔስቭ በሁኖዋ ግትአነቩዋ ። ¹⁶ ኧሄኔሲፎሩዊ ቢደ ሰቭ ጎይታ ምረት አቭኮዋ ሁኖዋ ኖኦራ ግዚየ ኧጅኋ ፈታኒ፤በሰንሰነድቭ በታአጎጅትኛ አቅቨጨዳ ። ¹⁷ አቸሸኋ እሮም ገኘ ኧቫአ ግዚየ ሴኧዪ ሴኧዪታ ነከቨዪ። ¹⁸ በሃ ቀረ ተጎይታይ ምረት ኢረህቨኸ ጎይታ ምረት አቭኩ፤በኤፌሶንቭ ምርአካ አአር አጔኬሬኸ አኸ ጔከርኸ ቲሂር።