¹ ባተነፈንረ ብእግዜር ፤ ተስፋመንራ በኸረ ቢኢየስስ ክርስቶስ እዝዝ ፤ ኧክርስቶስ ኢየሱሲ ኪሸረኘ ተኸረ ተጳዉሎስ ፤ ² ብኢየሱስ ክርስቶስ በኧዎርታኸ ኧዉረሚየ ትከኛ ኧኽር ኧጢሞቲዮስ ፤ ታአባንራ ትእግዜሪ ተጎይታመንራ ቲኢየስስ ክርስቶሲ ጠጋቭቪ ምረትቭ ወገሬትቭ ኧህር። ³ መቄዶኒያ ኦዎርሁ ግዝየ አደራ ኧቫከመኸ ፤አታት ሰቭ ተዋቴ አአሰት ትምርት አያትሞሩዋኸ ቲኢዝዝኮዋኸ አኸ በህሜ ቤኤፌሶን ቸራ። ⁴ ባቴ አትቭ እእቊትቪ ያትሸኩኮዳ ኤነነ ኧድረ ዘቨር ሰቭ ታሪክ አይቮትትኮዋኸ ኧዝዝኮዋ።እም ዘንጋ ኢረእካ ዉርጀ ኢረሾዋ ባኸሬ ብእምነት እእግዜር ዪንኤዳ ሜና ዪንኧዪ አያጔኪርታ። ⁵ እእም እዝዝ ቡር ዘንጋኋ ተጥርር ሂን ፤ተወሄ ቀርብቪ ፤ተዉረሚየ እምነት፤ ኢረሁዊዳ ንማጀን። ⁶ አታትሁኖዋ ተዋ ዘንጋ ተቫይተሩምታ አታ አአር አያጔኪር ዘንጋይ ተዠፖርሙ። ⁷ ኧቂጫ አስተማሪ ኢሆሩዋይ ኢሱኡዋ ፤ ቢይኸርቭ ኢዝረኲዳቭ ሁዳ ኧህር ዉርጀ ኢቴኤጅነዳቭ ሁዳ አአር አጪግተዉዋ አይሂርታ። ⁸ ዘንግኋ ጭን ሰቭ በቂጥየ ቤፐወ ቂጫ ወሄ አአር ኧኸረኸ ኒሂርነ ። ⁹ እመኸቭ ቂጫ ኧዋአ ኧጥርር ሰቭ ታይኸር ፤ቂጫ ኢጦሽታ ሰቭቪ አአመጠኘ፥እግዜር አይፎሩዋ ሰቭቪ ኧቫጢረተኘሰቭ፥ቅድስና ኤነነዋ ሰቭቪ ጎይታቭ ኢቆርጭታ ሰቭ፥አበዶድመሁኖዋ ዮኦትርታ ኧደቨኘ ሰቭቭ ኧኸረኸ ኒሂርነ ። ¹⁰ እመኸቭ ኧባለጌ ምስ ተቭስ ሁጅር ኢዶሙጅታ ሰቪቪ ፥ሰቭቭ ያስሮታዪ ኢስሮታቭ ሰቭ፥ኤነቭ አአር ኢኢጅታ ሰቭ፥ቤነ አአር ኢተርታ ሰቭ ፥ጤነኘ ኧኸረ ትምርት ኢትቃዎምታቭ ሰቭ እንእ። ¹¹ እም ጤነኘ ትምርት ኧትዳረ እግዜር ኢያ አደራ ባረ ታቬ ትእግዜሪ ተክብር ወንጌል ኢስምአምአካን አአር ። ¹² ኢያ አገልጋይ ኧኸረኸ ሾመታ በሙርቴነድ ኤቬዘሬ ደረግቭ አቬ ጎይታንራ ኢየሱስ ክርስቶስ ሽኩር ኧስርአኩ። ¹³ ኧዋ ኢፍቲ ማንኝእ አትሳትቭካ፡አትሳትድካዪ ፡አመጠኛቭ አአር ብንኸርቭ ባኋርትመኛዪ ባኖኦዎርትመኛ ኤፐሁነዋ አአር ኧረፐሬ ኧኸሬ አፉ ባረዪ ። ¹⁴ በክርስቶስ ኢየሱሲ ቲረሁዉዮታ እምነትቪ ንማጀቭ እማቲ ኧጎይታንራ ጠጋ ደበሰኒ። ¹⁵ ኢየሱስ ክርስቶስ ባጢረተኘ ያተርፊ ዋ አለም ማአ ይቭካ ቃር ኧታአመረዪ እንእ ሰብ ኢቴኤፐርኩዪ ያትሲእካን አአር ።ተቫጢረተኝቭ እንእ ኢይረእካ ባጢረተኘ ኢያትንሁ። ¹⁶ ዘንጋኋ ጭን ክርስቶስ ኢየሱስ በሁዳ አአሞሩዋ፤ ኧዘላለም ሂዎት ኢይቴኤፖርታ ሁኖዋ ዳር ኤነን ፋራይሂነድኃ፤ ተቫጢረተኘ እንእ በፎረ ባጢረተኝ በኸርሁ ቢያ ፤ኧትምርተኸ ኧኝኧተ ያቲሺ ኢያ አፉ ተቬርሁ። ¹⁷ ባቴ እንእ ግዚየ ኢረቭርካ ፤አይቮድቭ አያዢቭቪ እማት ኦጣኋ አምላክ ኧኸረ ንጕስ ፤ ክብርቪ ምስጋናቭ ተዘላለም ዘላለም ስን ኧሁዳ ኧህር አሚን። ¹⁸ ኧችኛ ጢሞቲዎሶ ኧዋ ኢፍቲ አኸ አአር በትንቢት ኤኤጂመኸ ዋ እዝዝ አደራ ባሁ ኢኸ እም እዝዝ ኤኤጅከ ትንቢት ተኸተይተኸታ ወሄ አርቭ ገክይተኸ ትትዋካነኸ ። ¹⁹ እምነትቪ ወሄ ቀርብቭ ኧምበርኸ ፤አታትሁኖዋ ቀርብሁኖዋ ቃሽዉምታ በቫህር ፎር አደጋ ሰንአዎታ የኧፋካ መርከበኸ አአሞሪ እእግዜር ቼኧዉምታ ዛፖቹም ። ²⁰ ተሁኖም ግት አያትቃንዉዋኸ ትምርት ኢኸርኮዋኸ ኧሴጣን አዋአሁ አአይፐርሁኖዋ ሄሜኔዎስቪ እስክንድሮስ አነዉዋ።