¹ 1 ኧሰማቶ ኧዘቨር አርቪ ኧቨኘቭ አአር ኧጠፍነሁዋይ አያትሲእካ ። ² 2 ኧቭር?ፈገያ በግት ምሳአረ ኢቭአመኸ እመኸ ጌታ ኢየሱስ ኢቭአወዳ ቀረ ህመኸ ኧኸረኸ አሁዋ ጔኲርሁም ቲሂሩዋ ። ³ 3 ሰቭ «እንእ እንእ ወገሬትን »ቲይቭካ ዉርኤት አርዋ ምሽት መእ ኢጠጥዳ አአረኸ ኧጠነቃር ኢፋድ ኢቭአዎቴ ፤ስርም አይተርፉታ ። ⁴ 4 ኧሰማቶ አሁዋ ጭን ሃአ ቀረ ኧፈገኸ ሜኤተ ያደርሁዋይ በጠነቫ ከስ አኸርሁዋታ። ⁵ 5 አሁዋ ኧቭርሃን ኧዋአናቭ ዴንጋንሁዋ ፤ኢናቭ ኧኧዳር ዋ ኧጠነቫ ዴንጋአኸርነዳ ። ⁶ 6 በዋ ቃዠ ንቫርነታ ገግንራ ተቩጥጥ አአር ነኧየነ ኤኤኛሙጅቶዉዋ ዮኦርታ ሰቨኸ አንህርነ ። ⁷ 7 ኢሪእካ ሰቭ በኧዳር ኢሪእ ኢሰህርካቭ ሰቭ በኧዳር ኢሰህር ። ⁸ 8 ኢና ጭን ኧዋአ ሰቭ ኧኸርኔ ፤ንትጤፕነ ገግንራ ተቩጥጥ አአር ነኧየነ ንበርነ ፤እምነትቪ ንመጀቭ ኧቭረድ አጎኸ ንትኸደርነ ፤ ንተፍነዴይቭ ዩሪዳ ተመኛት በጉንኧር ኢዶፌዳ ኮፊታኸ ንድፋነ ሙጥጥ ሜና ንቴእነታ ንበርነ። ⁹ 9 ጎይታ ኧሸፐተንረ ሁዳ ኢኢፋድ አኸረዳ ዘንጋ ጭን ጎይታ ኧኸናንረ ሁዳ በጌታንራ እየሱስ ክርስቶስ ኧቫአ ንተርፍነኔ ። ¹⁰ 10 ክርስቶስ ኢና ባረ ኧዎንደ ሁዳ በዋ አፈር ብነቭነቭ ብነቭነቭ ተሁኖዋ እማቲ ንረቭርነኔ ። ¹¹ 11 አሁም ዋአካ ቴዊመኸ አትሁዳ አአት ሁዳ አቁሟሙር ፤አሁም ታሁም ተቁሟሙሩዋ ። ¹² 12 ኧሰማቶ ባሁዋ ግት በቬና ኢቂጭታ ሁኖዋ ፤በጌታ ኢየሱስቭ አላቃሁዋ ኧሆርሙ ኢሞሮኩዋታ ሁኖዋ ታሆቡጂዮኸ ኧቨህርሁዋ ። ¹³ 13 ኧገግሁኖዋ በርመጀ ጎኩርሙ አሁቡጂዮዋ ገግተገግማሁዋ በሽኛት ንዎሩዋ ። ¹⁴ 14 ኧሰማቶ ሜና አዬዉዋ ሰቭ ቱዎኦችኮኸ ፤ኢፎርታ ሁኖዋ ታቁሟሙሪዮኸ ፤አጀገረኖዋ ሁኖዋ ታአጉዝዮመኸዪ እንእ ሰቭ ቱፎሩዋኸ ንቨህኔኩዋ። ¹⁵ 15 ሙጥጥ አአ ቤፐዉዋ ሰቭ ፎር አዬቨኸ ኧትጤፕ ዘንጋ ጭን ገግተገግማሁዋዪ ቴኤኟቭ ሰቭ ቢኸር እንእ ግዚየ ወሄ አአር ቲንኦዋኸ አትዋቁሩዋ። ¹⁶ 16 እንእን ግዚየ ኧሳርሁ። ¹⁷ 17 ጠሎት ኧጠልይት ስርም እንቸኧሁዋ ። ¹⁸ 18 ብእንቭ አአር ኧጎይታ አትሼኩሪ ፥ኧቭር ? ትኢየሱስ ክርስቶስ እማቲ ብትረቩሪዳ ንቭረድ ጎይታ ኢሲእኩዳ ሁዳ ዋዳን ። ¹⁹ 19 ኧመንፈስ ቅዱስ ሜና አታትፏፉሩዋ፥ ²⁰ 20 ትንቢትቭ አትቁርጩዋ ፥ ²¹ 21 እንእ አአር ፉትን ኦዢ ፥ወሄይቭ ሁዳ ሶፑቹም ቶኦዎሩዋ። ²² 22 ተቩጥጥ አአር እንእ ሱሁዋ ። ²³ 23 ወገሬት ኢቭካ ጎይታ ገሞኋ እንእ ኤኤዳሁዋይ አቨጥርነሁዋ።መንፈሳሁዋ ሉኋሁዋ ምሲየማሁዋ ጌታ ኢየሱስ ክርስቶስ ቲቫአካ ተቅነጨ ኧቶኦሮዋ ። ²⁴ 24 ኧሸፐተናሁዋ ሁዳ ርቴ ኧኸሬ የንአኩሴ። ²⁵ 25 ኧሰማቶ ኢናቭ አአር ጠልይዋ ። ²⁶ 26 ክርስቲያን ኧሰማት እንእ በጥርነድ ሳአዉም ወጌም ቧሪዮዋ ። ²⁷ 27 ዋ ኪሸር ኧክርስቲያን ኧሰማት እንእ ያረቡቢኸ አደራ እቭሁዋ ። ²⁸ 28 ኧጌታንራ ኢኢየሱስ ክርስቶስ ወሄድ ታሁዋ ኧህር ።