¹ 1 ኧሰማቶ ኢና አሁዋይ ኧአነ ሁዳ እመኸ አኸረኸ ሁም ገግማሁዋ ቲሂሩዋ። ² 2 አሁም ቲሂሪመኸ ኧዋ ኢፍቲ በፊሊጵሲዩስ ኖኦራ ጅጓረ አሰንኦኮንረ እንእመኸቭ አድዋⶉዉንረ ። ³ 3 ብእም ኧቫአ ንሰኧርኔኩዋታ ሁዳ በቩጥጥ ተመናት ተሸተነታ ዌ ንቄቅኔኩዋይ ባይተነታ አኸረንዳ ። ⁴ 4 ዘንጋ ጭን ጎይታ ወንጌል አራ አመረ አወናወ ሰቨኸ ኸርነ ፤ንዝሬኲነ እመዳቭ ኔቭነዳ ሁዳ ሂራ ያካ ጎይታ ባኸሬ ኧሰቭ ናቲሽኔ ባይተነታዳ አኸረንዳ። ⁵ 5 ኧቄቅነድ ቃር አዝሬኪነኸ ዌ ዳኲድነድንራ ባይተነ ቄቃ አኸርነኸ አሁም ቲሂሩዋ እመዳ አአር ሄቶንራ ጎይታን ። ⁶ 6 ታሁምቭ ኸረ ቴኤኛ ሰቭ ቢኸረ አትዎኋ ቢኸር ያጒያጊዘዪ አንሲካ ፤ኧጌታ ኢየሱስ ክርስቶስአአር ኧኸርዂ አደግርሁዋ ባንደ ። ⁷ 7 ዘንጋ ጭን አዶድ ኧትከሻ ትእየካ አአረኸ ኢናቭ ዱሶ ኸነ ታሁዋ ነፐርነ ። ⁸ 8 እማት ኧጎይታ ቃራ ታይኸርቭ ሉሁመንራ ተህም ኒቭኔኩዋታ አአህር ነመድኔኩም ፤ኧቭር ኢና አሁዋ ንረድኔኩዋይ ኧኸረዴ ። ⁹ 9 ኧሰማቶ ምርአካ አአህር አትቫቀርነመኸዪ ቂጭናመንራ ቲሂሩዋ ፤አአትዎኋ ታናጀግርነ ዋአናዪ ኧዳርቭ ትኔቭነ ወንጌል ኤኤድኔኩም ። ¹⁰ 10 ባሁዋ ጎይታ ባአመርሁዋ ሰብ ግት ታነነ ኧተኸ በጥርርነድቪ በፅድቅቭ ቅነጨ አይቫር ኧረፐነኸ አምቪ ጎይታቭ ሄቶንሁዋ ። ¹¹ 11 አቭ ኤኤኘን ትከኋ ኢኸረኸ ኢናቭ አሁዋ ኧተኸ ኧኸነ ቲሂሩዋ ፤ ¹² 12 መንግስትሞኋዪ ክብርሞኋ ኢሁዋይ ኧኸናናሁዋ ጎይታ ኢሽርኩኸ ትረዉሩዋኸ አቁሟሞርኔኩም ኖኦራቭ አአር ሳአርኔኩም ። ¹³ 13 ባሁዋ ኧቫአ እንእ ግዚየ ጎታ ናትሸኩርኔኮዳ አአር አነንረ ፤ ሁድቭ ቲና ኧቴኤፐርኊ ኧጎይታ ቃር ኧቴኤፐርሁዋ ግዚየ ፤ባሁዋ ባአመርሁዋ ሰቭ ዬቭካ ዋ ቃር ኧቴኤፐርኊ ሁዳ ኧሰቭ ቃረኸ ታይኸርቭ አታአር ኧጎይታ ቃረኸ ኤፐሁም ታነዳን ኧቴፐኊ፤ኧዉረቭ ኧጎይታ ቃርን። ¹⁴ 14 ኧሰማቶ አሁም በክርስቶስ ኢየሱስ አሞርሙታ በይሁ ገኘ ኢረቩርታ ጎይታ አብያተ ክርስቲያን መሰርሁም ፤ሁኖዋ በይሁዳ ገኘ ሰቭ ወቀሳ ኧሰንአዎኸ አሁም በገጋሁዋይ ገኘ ሰቭ ወቀሳ ኢሰርአቨሁዋ ። ¹⁵ 15 ሁኖዋ ጌታ ኢየሱስቪ ነቢያትቭ ኦቶርሙ፤ ኢናቭ ሰተጅንረ ፤ኧጎይታቭ አናትሳሪዳ ፤በሰቭ ፎር እንእ ኢፋድ አዎኦሙ። ¹⁶ 16 እመዳቭ እንእ አረማዊ ሰቭ ኢተርፍኮዳ ቃር እኒኢድነነኸ ፤ብእመዳ ኧቫአ በቫጢርሁኖዋ ፎር ባጢር ቁጥ ዪንኦዋ ።ቀጥዎሞኋኧጎይታ በላእ ኢዎትዎቴ ። ¹⁷ 17 ዘንጋ ጭን ኧሰማቶ እማት በጭሞጨ ታይኸርቭ ኢፍት ቲኢፍት ታንትራከቭነ አታአህሪ ኧቸናኔ አሁዋ ኤራሁዋ አሴኤንረታ ኢፍት ቲኢፍት ናዥኔኩዋይ አትቫቀርነ። ¹⁸ 18 አሁዋይ ንቫአኔ ሴኤነ ባንደ፥ አቸ ኢያሽ ጳዉሎስ ኖኦራ ግዚየ ኧቫአይ ዣቭሁ ባንደ ፥ዘንጋ ጭን ዝክ አቴፐንረ። ¹⁹ 19 ጌታንራ ኢየሱስ ቲቫአካ በሁዳ ኢፍቲ ተስፋንራ ዌ ኧሳርትንራ ዌ አክሊልንራ ማንተን ? አሁሽ አኸርሁዋታ? ²⁰ 20 ኧዉረቭ ክብርመንራዪ ኧሳርትመንራ አሁተንሁዋ።