¹ ኢስቻ አሀም ኧቭሳሀ ታአዘዣ ፤ አታት በጎይታ ቃር አያአውርዋ ገማ አነዋይ ፤ቢኸርቭ ቢኢስቻሁኖዋ ወኼነድ ኧጎይታ ቃር ቢኢጅያዮዋ ኧይታይ ይዎኦዋይ ይኸነዋ ² ሁንም ኧጎይታይ ይዎኦዋይ አንዳ ኢስቻሁኖዋ ጫዋ ኸራምታ ኧሰቭ ቲያኸብጃታ ቦሽቱሁኖተ ። ³ አሀሜ መርክ ጉረራሀ ባትቂማሙቲ ኧወርቅ ጌጥ ባጠረጡርቲ ቢየኸይካ ወይ ኑድ ውጅር በትሆተርት በሰቻይ ይትረከቭካ ጌጥ አይኽር ። ⁴ ቢኸር መርካሀ በጎይታ ኢፍቲ ዋጋኋ ኑእያአር በኸርንባየኧፋ ጌጥ በቪርነዲ በኋርት መንፈስ ኧትሄመረ በሂንተደኧረ አንዳ ፥ኧከሲ ምሲየ ኧህር ። ⁵ በድረ ዘቨር ተስፋህና በጎይታ አወና ኧትቀደሻ ኢስቻኸ በዋ አይነት አጌጫታ ኧቭስህና በታአዞዥት ባንደ ። ⁶ ኧታአዘዣ ሳራ ኧቭስህና ኧአብራሃም « ዳቭኞ » ባረች ትታአዘዝነ ኧረፐርመኸ ፤ አሀም ኧወሄ ዘንጋ ብቴቫ ስርም ታትቅቭጫ አሃም ኧሳራ ግሬድንሃ ። ⁷ ገማ አሁም ቲኢስቻሁዋመጋ በዎስርት እማትሜ ንዎርዋ ታሁዋ ይረእ ኤቄጫ ፍጥረት ኧኸራይ ታሁመጋ እማትሜ አያ ዬቭካ ጠጋ ይወርሻይ ኧኸሬ ኧህናም አህብጅያ ፤በዋ አይነት ኧጎይታ ትሶኦርዋ እንቁርፊድ ይኸርካአር አይበርወሁዋ ። ⁸ ባቴ እንማሁዋ አሁም ታሁም ተስዋዎም ንዎርዋ ፤ ኤኤኛኋይ ሰቨ ብካና ኧገጋሁዋመኸ ኧዙዋ ፤ኧኧሰማትመኸ ተራወጁዋ ወሄ ሚራ ሁርዋ። ⁹ ዳርዋ ባሀሬ ኧውጥጥ ዘንጋ ሙጥጣአር አውርዋ ፥ በቂናወ ሟሪ ቂናወ አዣውርዋአሁዋ ኧቬጠርኩዋ ዋኸ ቦኖት በረካ ትዎርሹዋኔ ። ¹⁰ መጣፍ ይርመኸ « አያቭ ኧረ እን ቀረ ሳረን ይረቭሪ ይሲካ ሰቨ በአነድኋ አይቅማምር ፤በከፈርሞኋ ሙጥጣአር አይዘንግ ። ¹¹ ተውጥጥ ዘንጋ ኧሲህ ወሄ ዘንጋ ኧና ወገሬይ ይሲኩዳ ኧቲሄተርኩ ። ¹² ኧጎይታ ኤር ኧጻዲቅ ሰቪ ያዥ ። እዝርሞኋ ሳአየሁኖዋ ይሰኦዋይ ተኮፎጁም ሙጥጥ ቢዬቭካ ሰቨ ጭን ኧቫአት ኢፍትኋ ያቲሽኩ »ባርብ ። ¹³ ሁዋ ወሄ ዘንጋ ቴዋይ ጃድ ብቱርዋ ግዳት ያሰራወሁዋታ ማንተን? ¹⁴ ወሄ ዘንጋ ቦኖት መከራ ብቴኤፖርዋ ዳር በረካ ትረሁዋ ኧሰቨ ኧትሃጭት አትፍሮይዋ አጠሮዋ ። ¹⁵ ጌታ ኧኸረ ክርስቶስ በሂናሁዋ አሁብጂ ፥ ባሁዋ አንዳ ተስፈ ይሳአርሁዋታ ሰቨ እንእ መልስ ቲዋታአር ኋሩምታኧሮዋ ። ¹⁶ ቢኸር መልሳሁዋ በቭርነድ ባሁብጅት ኧህር ኧክርስቶስ ኧኸርሁዋ ወኼ ዘንጋ ትቴውታ ሙጥጣአር ቲኢጅኩኩዋታ ሰቨ በዋራይሁኖዋ ይቁዎጩዋኸ በወሄ ቀልባሁዋ ንዎርዋ ። ¹⁷ ኧጎይታ ፍቃድ በኸረ ወሄ ዘንጋ ቦኖት መከራ ብቴኤፖርዋ ይፈዝሁዋ ብሀሬ ሙጥት ዘንጋ ቦኖት መከራ ቲቴኤፖርዋይ አኸረዳ ። ¹⁸ ክርስቶስ ኢና ኧጎይታይ ያቲኢንቭንሬይ ቲይር ኧቫአ አት ግዚየ መከራ በተኦዎርት ሁዳቭ በቨሰር ሞደ በመንፈስ ጭን አያቭ ኸረ ። ¹⁹ በጠነቫ ኧታአጎጅዋ ነቭሲ በመንፈስ ወረታ ኧፍርድ ቃር ኤኤዳኖም ። ²⁰ ዋኧታአጎጅዋ ሁኖዋኢኢፍቲ በኖህ ዘቨር መርከብ ቲጌክርካ ጎይታ ፈነኸታ ቲይኢየኮዋ አንታአዘዝካ ኧዋርዋ ሁኖዋበመርከብ ሁዳ ከስ ገፖም ብእሀ ኧተነፉዋ ሁኖዋ እማት ሱንት ሰቨባነውተ ። ²¹ እም እሀ ዋአካ አሁዋ ያተርፍካ ኧጥምቀት መሰሮን ፤ እም ጥመቀት ኧሚሲየ ጠቫ ኧታኦውት ታይኸር በወሄ ቀልብ ኧጎይታይ ይቴኤነቭካ ሳአየን ። አሁም ኧትሮፍታሁዋ ኢየሱስ ክርስቶስ ተውንድ በቶሾትኖኋ ። ²² ሁዳቭ ኧሳቫይ ዋአታ በጎይታ ቀነ አጋድኋ አነ መላይካ ሁኖዋ፥ ኑኡየ ኧኸረ ደረግ አነኖታ ኧሁዳ ተጎዦነ