¹ ባቴሙጥጥ እንእ ፥አታልልት እንእ ፥ ኸጥነድ ቅናድ ፣ኧቫኒማአር ኦዋድ ኧትጋጌዕት አፍኮዋ ። ² በክርስቶስ ተራኢተሁዋታ ትተርፉዋኸ ኧወያ ኧቴኤኝ ትከኸ አይቭ ይትሜኝመኸ አሁም ጥርር ኧኸረ ኧጎይታ ቃር ቴሜኙዋ . ³ ትትሜኝዋይ ይኸነሁዋታ «ጎይታ ወኼአር ኧኸረኸ በሀርሁዋን።» ⁴ ባቴ አያቭ እቭር ኧኸረ ኧጌታ ኢየሱሲ ተኤነዋ ፤ ሰቭ ቀንጠ ኧቼኧን ጎይታ ጭን ኧሽፐተንይከብርኩ ። ⁵ ኧጌታ ኢየሱስ ትቴኤነውታ ኧአያ እቭር ኸርሁም ኧጎይታ መንፈስ ይረቭርዳ ቢድ ትሆርዋይ እመኸቭ በኢየሱስ ክርስቶስ አጋድ ይሽርካ መንፈሳዊ ህትቭ ኧጎይታ ታቴኤንዋኸ ኧሸፖችኩዋ ቅዱስ ካሃን ትሁሪዋሴ ። ⁶ በቅድስ በመጣፍ ኧሸፖቺ ኑድ ኧኸረ ኧግብ ቢድ ያቁሟሙርካ ኧውረ እቭ በጽዮን አዎራኬ በሁዳዳ ያአቭርካ ሰቭ ስርም አቅቨጭካ» ይካ ቃር ተጣፈ ። ⁷ ባቴ ታአውርታ አሁዋ ዋ እቭር አሁዋ ኑድን ፤አያአውርዋ ሁኖዋ ጭን ኧግብ ቢድ ያረሽታ ሰቨ ቀንጩም ኧቃሸዊ ኧግብ ቢድ ይቁሟሙርካ ኧውረ ቡር እቭር ኸረ ። ⁸ እመኸ ኧዋረመኸ «እም እቭር ኧሰቭ እንቁርፊት ኸረታ አክታተፈታ ያድግኮዋ፤ ሰቨ ቃርኋ ባነኦርትሁኖዋ እንቁርፊት ይኸርዎምታ ይወድኡዋ ፤ይወዱኡዋኸ ጎይታ በተረታ አንጠዎም ⁹ ጎይታ አሁዋ ተጠነቫ ኧኑእ ኡዋዬ አዋአናሁዋ ኧሁዳ ወኼ ሜናኋ ቲኢጅዋይ ኧሸፐትሁዋ ዘር ፤ ኧንጉስካሃን ጎይታ ሜጠረታ ኧገግኋ ኤፐናሁዋ ቅዱስ ሰቨንሁዋ ። ¹⁰ ድረ አሁዋ ኧጎይታ ሰቨ አነፐርሁዋታ ዋአካ ጭን ኧጎይታ ሰቨ ኸርሁም ድረ አፍ አቧኩዋ ባንደ ዋአካ ጭን ጎይታ አፍ ባረናሁም ። ¹¹ ናማጂየኞ በዋ አለም ታነሁዋ ባዘራይ አሳተችኩዋ ሰቨ ኧኸርሁዋይ ተረብሳሁዋ ቲትዋኮታ ተውጥጥ ተሜኛት ሲሁዋ ባሁ ኧሰኧርሁዋ ። ¹² ማኒም ቢኸር « ሙጥጥ ሜና ዬውታ ሰቨነዋ » ቧርሙ ቢያኦኩዋ ስን ጎይታ ኢና ያዢ ቢቫወዳ ቀረ አረማዊ ሰቨ ወኼ ሜናሁዋ ቦዥትሁኖዋ ጎይታ ያሆብጅዋኸ በሁኖዋ ግት ትትረውርታ ወኼ አመር ኧበርሁዋ ። ¹³ አሁም ኧጌታ ኢየሱስ ትቱርዋ መሪ ኧሆርዋ ሰቨ እንእ ታአዘዙዋ ኧኑእ ኑጉስቭ ዋና መሪም ኧኸሬ ኧሁድቭ ታአዘዥዋ ። ¹⁴ ኧገኛ ዳኝ ታአዥዡዋ ፤ሁኖዋ ሙጥጥ ሜና ዬውታ ሁኖዋ ይቄጨዋይ ወኼ ዬውታ ሁኖዋ ያጋጊዥዋይ ተኑእየ ኑጉሲ ኬሸውዮም ። ¹⁵ አሁም ወኼ ዘንጋ ቦኖት ጋዋ ሁኖዋ ባኋርትሁኖዋ ቢጮጂዳ ጫወዳ ቁስ ታቲፒዮየኸ ዋዳ ኧጎይታ ፍቃድን ። ¹⁶ አሁም ኧጎይታ አገልጋየኸ ሁርሙታ በነጣ ንዎርዋ ባሀሬ ነጣ ሰቨ ኧኸርሁዋይ ሙጥጥ ዘንጋ አቶኖዋ ¹⁷ ሰቨ እንእ አሁብጁዋ፤በክርስቶስ አአሞርዋ ሰቨ ንዎጅዋ ፤ጎይታ ፉሮይዋ ፤ ኧንጉስ ሁኖዋ አሁብጁዋ ። ¹⁸ አሁም አገልጋይ ኧኸርሁዋ ኧአረፖሪያሁዋ ትታሆብጁዋ ታአዘዡዋ ፤ እማት ኧወኼ ኧቪራሁኖዋ ታይኸር ኧውሼእ ሁኖዋ ታአዘዡዋ ። ¹⁹ ሰቨ በግፍ መከራ ቲቴኤፐርካ ኧጎይታ ባሬያ ቢፈርህ ይዶሪ ። ²⁰ አሁዋ ሙጥጥአር ኤኝተሁዋታ ብትፈርሁዋ ምር ያቁጥሁዋሴ? ቢኸር ወኼ ዘንጋ ኤኝተሁዋ መከራ ትቴኤፖርታ ብትፈርሁዋ ተጎይታይ ደረድ ትኮዋሴ ²¹ ኧሸፖችኩዋ እእመዳምን ፤እሁም ኧክርስቶስመሰሮ ትሆርዋይ ክርስቶስ አሁዋ ቲይር መከራ ቴኤፐረታ አቴሸናሁም ። ²² ክርስቶስ እምት ባጢር ስን አኔፐዳ በአንፉኋ ምጥጣአር አንዝሬከዳ ። ²³ ቲቀርዊዳ አናትቃነ እመኸ እንእ መከራ ቲሰራወዳ ተስፈኋ ቂጢየ ቢፈርድካ ጎይታ አወና ባሃሬ አናትቃነቨዳ ። ²⁴ ተቫጢር ተቯቴርተነ ጎይታ ታአዘዥተነ ንርርቭኔ ፥ከርስቶስ ገግሞኋ ባጢንራ ፌነገታ በመስር ተሰኧረታ በሁዳይ መዛ አሁዋ ፈዘዝሁም ²⁵ አሁም ኧኧኝዋ ጣየኸ ዛፐትሁም ባንደ ፣ዋአካ ጭን ነብሳሁዋ ይኢየካ ኧዜማቻሁዋይ ተዠፐርሁም