1 - 2 አን ገሪኹ ጓሃይነዲ ደውያጋኹ ምጨትዲ ይለበኪል ከም ዋነትለ ይሙኹ መንፈስ ሻትክድ መስከራኹለ እንኩኹ።ክርስቶስድ እምን የኩንኩም እንኩኹን ቡጚተሊ። 3 ኣን የኣኾርድ እን ስኸድ ይሻንዲ ይኾውዲር መታን ወገድሳኹ ኣኾ ክርስትልድ ፈለይስያ ጀረቢሪድ። 4 እንራኤልድቁርግን እማ እዃርስነዲ ክብርዲ ማእኮትዲ ፍቲሕ ፈትሕነዲ ጃርሲ አገልገልድነዲ ሳደዲ ናኹ ግን። 5 እን እክልኽር ናዉክ ናው ግን።ክርስቶስኽር ስኸድ ናልድ ግን ኒዲመሲ ገውርሳኹ ጃር ናድካ አወይሲ ግን።ኣሜን። 6 ላኪን እንስራኤልዲ ገፍልድ ኣኸውክ ናዉክ እስራኤዱ ኣኽኒ እማእን ቆል ጃሩኹ ብላሽ ኣኾ ከብቲላኒ። 7 ፍደን ኢስሃቅድ ሽጝስትሮካ ግን ግራ ኣብርሃምር ፈደን ኣኽንነዲ ናውክ ኒቁር ኣኽኒ። 8 ማለት እን እቁር ሳዲው ግን ፈደንሊ ሺብስተው ግን ግራ እን እቁር ስኺውታ ጃር ቁር ኣኽኒ። 9 እን ቆል ሳዲኹ ፡እማር ንድ ሁመት እንትያግን፡ሳራኻ ቁራ እኻርቶግን ዩኹ እማ። 11 10 ኒንካያ ኣኽላ፡ርብቃኽር ላኹልድ ማለት ይናኽር ይስሃቅ ትልድ ጎድጕ እስረሰና ኒሰና ኣኹኹ። 12 - 13 እን ሽጛኹልድ ግን ግራ ወራትል ኣኽላኒ እማ፡እን ጃር ሓሳብ ቋልነድ ተብሮር መታን እን ያእቆብቲ እንከልዅን አሳውቲኻ እንጠርኹን ያኹ ክቱብ ህምባዅ እንቆል ልሳዕ እዃርስግኒ ዋንቱኑ ትክያኹ ኣኽን ምቁላ እሰግኒ እን በሀር እን ግናሹ ገንሺንትሮሉ ግን ይስትኹሉ። 14 እማ ገድም ውረይኖ ግን፡ጃርልማ ዓመጭና ዋነ ያእ እላኒ። 15 ሙሴየት ኒ ማሓራኹሲክ ማሓርዶ፡ራሓማኹሲክ ረሓምሮ ግን ይኹሎ እማ። 16 ገድም እን ማሓራኹ ጃሩኹ ግን ግራ፡እን ጀረባኹዲ ጋጝየኹ ዲሩኹ ኣኽላ። 17 እን ኩቱብ ፈርኡንቲ ይሒል ኩል ቋሊስያ ይሱጙስኽር ንርዉክ እድንያትል ዋስስትሮ፡ ንድ መታን ግን ጉዳኹካ ይኹሉ እማ። 18 እማ ገድም ጀረባኹሲሉ ማሓራኹሉ፡ጀረባኹሲሉኽር ተብዳኹሉ። 19 እማ ውሪኹ ደአም ናንኽር ሃደደኹን፡እኒፍቓድሲ አውኒ ተጫረረኹንሉ፡ክትብል ኢኻ። 20 ምንኮር፡እንፋ ኣዳም ጃርሲ ሸከይራኽር እንቲ ኣውኒ ግን?ገበርሳኹማ እንቲ ገበራኹሲ ውሪኹ ናህብራ ገብረዳኹንለ ዮ ያኩመሉ ኣኸ። 21 ወሪ ሓበጣ ከደማኹ እን ላሓበጣ ብሪኹልድ በልጛስ ትክያኹል፡በልጛስኻ በዳንሊ ኣካኹ እራኳ ከደምሮ እን ሓበጢል ምልክ እንግጋኹማ። 22 ጃር እን ኒሓሩቆትሲ ቋልስሮር መታን፡ኒሒልኽር አርእሲስሮ ጀረበታ እን ድዲል ደለመው እራኲ ምቁሊውሲ ኒገሪኹ ሰብርድ ምኹረኩሎም። 23 ኒንኻ እን እማና ኒክብርሊ ደለምደውሎምሲ እራኩ ምሕረቱ እንተጀርና ኒክብረቱ አርእሲስሮሎም መታን። 24 ይናኽር ማለት ቆምያተልድኽር ግን ግራ ይሁድልድ ካያ ኣኽግናኽርሲ ሽጛኹና። 25 - 26 እን ሆሴእትል ያኹሰና፡እን ይእክ ኣኽጋኹሲ ኒት ይእክ የሉግን።እን እንከልስግረሪትኽር እንከልስረሪ የላ ግን።እንትን ታዲ ይእክ ኣኽድኒኒ ይስተውሉ ኣካንልኻ ንርትል ዲማ መንደርታኹ ጃር ቁር ክም ይስተነት ኣኽሮ ግን። 27 - 28 ጃር ኒቆልሲ ልክዕዲ ሓሰብሳኹዲ እሰ ብሪል እሲሮሉ ግን እማ፡እሰያስ እስራኤልዱ ሰበትድ፡ሺብ እስራኤልዱ ቁሻ ባሓሩኹሰና ኣከንኽር እን ባረና ካያ ግን ደኣናኹ ዮ ዋዕ ዩዅ። 29 እን እሰያስኽር ጃቢሶ፡ጃር ጻባኦት ፈደን ባረገንነታ ሰዶምርሰና ኣኽንድ፡ጎመረትኽር ተኪንድ ያኹሰና ግን። 30 ገድም ውረይንን፡እን ጭድቕ ጀረበገው ቆምያት ጭድቕ አርኑኹ፡ኒንኻ እን እምነትልድ እንተራኹ ጭድቕ ግን። 31 እስራኤል ላኪን ፍቲሕ ጭድቑ ጀረቡኑታ እንፍቲሕ ጭድቑኽሊ ገእይኒ። 32 - 33 ውሪኹኻ እናሓን ጽዮንትል ክርጛ ዓንቀፊሰና ሸሻ ሸተትሲሰናዲ ገምደኩን እኩኹን።ኒድ እምናዅኻ ሸኽስተለሉኒ ያኹ ክቱብ ህምባኹ ክድመትልድ ግን ግራ እምነትልድ ጀረቢገው ኣኽንነዲን ክርጛ ዓንቀፊሰነድ ዓንቀፍስኑኹ።