ፊዃ-10

1 - 2 ይሻንጌ፡አምርድ ኣኽላኒ ግን ግራ ጃርድ ቀንአት ከምዋነትሎም ኣን መስከረኩንሎም እንኩኹን እማ፡ናው ደአንድኖር አታን ይከበኪኹ ምራዲ ይጃርሊ ይጠለይናዲ ግን። 3 ክርስቶስ እን እምናኹሲክ ኒትክ ደንጎባ ፍትሒኹ ግን እማ ጭድቕ ጃሩኹሲ አርእን ብነዲን ጭድቕ ናሹሩኹ ተከልድኖ ጀረቢነዲን ናሹቲ ጭድቕ ጃሩኹድ ዓንቀይሊ ገዝእስትኒ። 4 5 ሙሴ እን ፍቲሕ ጃሩኹልድ እንተራኹ ጭድቕ ሰበትድ እን እሰኹሉ ኣዳም ኒድ ኒርሕድ መንደርትሮ ግን ይስቶ ከተብሱኹ እማ፡ 6 እን እምነትልድ እንተራኹ ጭድቕ ላኪን ነወያኹ፡ኩለበከድ ኣውኒ ሰሚል ዓረግሮ ግን ይግ፡ነወይና ክርስቶስቲ ገምድሮሉ፡ 7 ወሪ ይኸ ቆርሊታ ኣውኒ ገምሮ ግን ?-ንሰና ማለት ክርስቶስቲ ክሪልድ ፍድሮሉ፡ 8 ውረኒ ደአም የኩን፡እን ቆል ኩኣብዲ ኩለበከዲ ኩገቢልኽር ግን።ንሰና ይኖ እን ይን ሰበክናኹ ቆል እምነቱኹ ግን። 9 - 10 እን ክቱብ ኒድ እምናኹክ ስማረላ ግን ያዅ።እማ ኣዳም ኒለበከድ እምኖ ጨደቓዅ፡ኒአብድ ተኣመኖኽር ደአናዅ እማ ፡ኩኣብድ የሱስ አደራ ኣኸት ድውረን ኩለበከድኽ ጃር ክሪልድ ጉደትሉ እምንደን ደአንቶ ግን። 11 12 - 13 ማለት ኣዪ ኣዳም ስጝ ጃርኹሲ ሽጛዅክ ደአንዶ ግን።ኒ ላኹ አደራ ግን እን ሽጘውሲሉ ናውክሲኽር ተጅርግን እማ ይሁዲ ጸርኣውያንዱ ነበክል ፈለለይና እላኒ። 14 ላኪ ንእን ኒድ እምንገው እዋህቢነ ሽጝድኖሉ ግን፡ኒሰበትድ ዋስግኒ ኻ ኣዋህቢነ እምንድኖ?ሰበካዅ እንገትኻ ኣዋህቢነ ዋስድኖ? 15 እን ትክያኹ ኣበሸርደውር ልኩክ ውሪኮት ትክያኹን፡ያዅ ክቱብ፡እንሻቕስግኒ ኣዋህቢነ ሰበኽድኖ ኣኽኖ? 16 ላኪን ኢሰያስኽር፡ይኣደራ ይና ሰምዕሲ ኣውኒ እምኖሉ ይዅ እማ፡ናውክ ወንጌልሲ አዘዝስትኒሉ። 17 እማ ገድም እምነት ዋስኒልድ ግን፡ዋስናኻ ቆል ክርስቶስሩኽልድ ግን። 18 ኣን ላኪን፡በታተንማ ዋሰኒኒ የኩን እንኩኹን፡ናደሀይ ኒድክ ብሪልክ ፊዅ፡ናቆልኽር አርድ ሸሊ ኣኽታሲክ ገእዩኹ፡እምንድክ እባ ዋስኑኹ። 19 ኣን ላኪን እስራኤልኻ ዋስጋኹማ የኩን እንኩኹን፡ሰልፍ ሙሴ እን እክ ኣኽጋኹድ ሕሊጥስየኩም ፡አምር እንግጋዅ እክድኽር ቆንደፍድየኩም ግን ይኹ። 20 ኢሰያስኽር ሓጠሮ እንጀረቢገውሲለ አረርሰኩንሎም፡ወንቀሪስገውሲለኽር ወድሕስተኩንሎም የኲ። 21 እስራኤልድ ሰበት ላኪን፡ኣዘዝትጋዅዲ ተቋወማዅዲ እክሊ ግርግ ሺራዅሲክ ይናንሲ ጠለቕዅን ግን ያዅ።