1 ወሪ ይሻን አን ፍቲሕ አርአውሲ ግን አን ጋባኹ እማ ኣዳም ኒርሕድ ዋኒራሲክ ኒውክ ኒዕምርሊ ፍቲሕ መለከትሉማ አርእድኒኒ? 2 እዂና ንራን ኒርሕድ ዋኒራሲክ ፍትሕድ ኒል እንሸውስረሪ ግን፡ንራን ክረንኻ እን ፍቲሕ ንራንዱኹልድ እንክስትረሪ ግን። 3 እማ ገድም ንራን ኒርሕድ ዋኑ አሪ ግርወድ ኣክረን ፋይቶራ ግን ይስተቲ።ንራን ክረንኻ እን ፍቲሕልድ ናጻ ፋቲ እማ አሪ ግርወድ ኣክረን ፋይቶራ ኣኽላኒ። 4 ኒሰናኽር ይሻን እንትን ጃር ፍራ ፍሪትኖ መታን አሪውድ እንሪልድ ጔዅድ እኽትኖ ስኻ ክርስቶስርዅድ እን ፍትሕልድ ክርድኑዅ። 5 ስኸር እራኳ ዋንትኑክረድ ኣካዅ ፍራ ፍሪትያ ፍትሕድ ደረረክሶ ይና ፊዅትሊ ምራድ ሓራሙኹ ከደሙ እርጉዅ፡ 6 ናን ላኪን ገናዅ እራኳ ፊዴሉዅ ኣኽጊ ሓዲስ እራኳ መንፈስኹድ ገዝእስትኖ እን ሸኾና እርጋዅ ፍትሕልድ ክርኖ ኒልድ እንክስትንዅን። 7 ውራ ደአም ይኖግን እን ፍትሕማ ሓራምኒ-ያ ያእ ዪፋሉ፡ፍቲሕ እንገት ላኪን ሓራምሲ ርእጊድሉ፡እን ፍቲሕ ተምነትግ የገንታ እንተምነትሲ አርእጊድሉ። 8 ሓራም ፍቲሕ እንገት ክራዅ ግን እማ እን ሓራም ትእዛዝ ሰበትድ አዶ ትምነትሲ ጉድድጙዅሉ፡ 9 እማ ና ፍቲሕ እንገት ኣን ዋነዅ እርጉዅን፡ፍቲሕ እንተሰና ላኪን ሓራም ዋአዅ ኣኹኹ ኣንኻ ክርዅን። 10 ሓራም ሰበብ አሮ ትእዛዝድ ሰሓድዅለ ንድኽር ኩውዅለ እማ እን ርሕድ እውስታዅ ትእዛዝ ይድ ክረዳ ኣኾ አርዅንሉ። 11 12 እማ ገድም እንፍቲሕ ሻትክ ግን፡እን ትእዛዝኽር ሻትክዲ ጫድቕዲ ኪሰሪዲ ግን። 13 14 እን ኪሰሪማ ይድ ክራ ኣካዅለ፡ያእ ይፋሉ፡ሓራም ግን ክራ ኣካዅለ ግን ግራ ሓራም እን ኪሰሪሲ እሰ ክራ ናዕሳኹ ሓራም ኒኣክና ወድሕስትሮታ ሓራም ትእዛዝድ እሰ ትክሰ ሓራም ኣኽሮግን። 15 እን እንጣራኹሲ እሰኩንሉ እንኩኹን ግራ እን ጀረባኹሲሉ ኣኽሊ አን እሳዅ እማ እን ኣን እሳዅሲሉ አርእሊሉ።ፍትሕ መንፈሳዊራ ኣከት አርእንኹንሉ ኣን ላኪን ሓራም ኣንቀይል ክስታኽር ስኺኹ ግን። 16 እን ኣን ጀረባኹሲ እሰጋኽር ኣከን ላኪን ኣን ፍቲሕ ኪሰሪ ኣኸት ሕበርሰኩንሉ እንኩኹን። 17 እማኻ እን ይል ሓደሮ ህምባኹ ሓራም ግን ግራ ኣን ኣኽሊ እሳኹሉ። 18 ምራድታ ህምባኩለ፡ኪሰሪ እስነስኻ ቢስቶለ ህምባኩ እማ፡ እን ጀረባጋኹ እከይሲ እሰኩንሉ እንኩኹን ግራ እን ጀረባኹሲሉ ኪሰሪት ኣኽላኒ አን እሳዅ፡እማኻ ይል ማለት ይስኺል ኪሰሪ ከም ዋኒገት አርኦ ህምበኩን። 19 20 ኣን ጀረባዅሲ እሰገን ላኪን፡ንደምብታ እን ይል ሓደሮ ህምባኹ ሓራም ግን ግራ ኣን ኣኽሊኒ እሰኩሉ። 21 እማ ገድም ኣን ኪሰሪ እስያ ጀረባኽር እን እከይ ከም ተከነትለ ፍትሕ ኣኾ አርኹንሉ። 22 ይጅዋ ፍኹትድታ እን ፍቲሕ ጃሩኹድ ባህ የኩለ እንኩኹ። 23 እኽን ግራ ይስኺል ፍቲሕ መንፈሱኹዲ ዋኺታኹ እን ይስኺል ህምባኹ ፍቲሕ ሓራሙኹሊ ኣኽታሲ ኣዳኹለ ኣሪኹ ፍቲሕ ቋለኩን ኣንኩኹን። 24 ኣበራ ኣን ድኑስ ኣዳም፡እና ክሪኹ ስኺልድታ ኣውኒ ቶክ ደአንድሮለ ግን። 25 ጃርሲ ይናደራ የሱስ ክርስቶስድ ሞሳ ኣኽኒት።እማ ገድም ኣን ይላውድ ይሙኹድ ፍቲሕ ጃሩኹድ፡ይስኸድኻ ፍቲሕ ሓራሙኹድ ገዝእስታኹን እንኩኹን።