ፊዃ 6

1 እማ ገድም ውራ ይኖግን፡ገድ በጀክሮታ ሓራምሊማ ተብንን ፡ 2 ያእ ይፋልና፡ይን ሓራምልድ ክርናኽር ኣዋሀብነ ናን ኒሰና እሲኖ። 3 ውሪይኸ የሱስ ክርስቶስድ ጠመቅስናኽርክ ናውክ ኒክረድ ከም ጠመቅስነት ማ አርእድኒኒ። 4 እማ ገድም እን ክርስቶስ ክብር ኒኽርዱኹድ ክሪልድ ጔኹድሰና ኒሰናኽር ይንን ሓዲስ ርሕድ ወንተተርኖር መታን ክሪልድ ጥምቀትድ ኒዲ ደብስትኒኹን። 5 ይና ክራ ኒክረስ ተከ ኒዲ ሕበርስናኽር ኣክነን ኒሰናኽር ኒጉነድ ሕበርሲኖሉ ግን። 6 - 7 እን ክራኹ ሓራምልድ ለጭሑኹ እማ ኒን ወንተሮ ሓራምሊ ገዝእስትጊን እን ሓራሙኹ ስኻ ድድሮር መታን እን ገናኹ ይና ፊኹት ኒዲ ከም ከርከርሰት አርእኖ ህንብናኩን። 8 - 9 እን ክሪልድ ጔኹ ክርስቶስቲ ወንተሮ ከም ክረገት ክራኽር ኒል ከም መለከገት አርእንኹን፡ይን ክርስቶስዲ ክርኖ ደምቢ ኒድኽር ይናፊኹትድ ከም መንድርትነት አርእኖ ህንብናኹን። 10 ማለት ኒክራ ላዶን ዲመሲ ሓራምልድ ግን ንክራኹ፡ኒፊኹት ላኪን ጃርሲ ግን ኒ-መንደርታኹ። 11 ኒሰናኽር እንትን ሓራምልድ ከምክርድነት ክርስቶስ የሱስድኻ ጃርሲ ዋነው ከም ኣኽድነት እንተሹቲ ሺባ። 12 እማ ገድም ኒምራሲ አዘዝትጋ፡እና ክሪዋ እንታ ስኺል ሓራም ነገስጊኒ። 13 - 14 ገድ ኣንቀይሊ ግራ ፍቲሕ ኣንቀይሊ ኣኽግድናኽር ኣኽድነዲን ሓራም መለክጊንኩም።እማ ክሮ ጔውሰና እንታ ሹቲ ጃርሲ እዋ ግራ እታ ፊኹትሲ ምኹር ዓመጩኹ ሓራምሲ እሰገሉ።እንታ ፊኹስታ ምኹር ጭድቑዅ ጃርሲ ደአም እሰሉ። 15 ውራንኻ ይንን፡ገድ ኣንቀይልግራ ፍቲሕ ኣንቀይሊ ኣኽግናኽር ሓራማ እስኒን፡ያእ ይፋልና። 16 ንድ አዘዝትነድ ገንሺን ኣኽትኖ እንተሹቲ አደናኹሉ ሓራምድ ኣከን ክረድ አዘዝትነድ ኣከንኻ ጭድቕድ ግን፡እን አዘዝትድናኹ ኒገንሺን ከም ኣኽድነት ማ አርእድኒን። 17 - 18 እማና ገንሺን ሓራሙ ዋንትዱኑታ ሓራምልድ ለጭሕድነሰና ጭድቕድ ገዝእስትድኑኹ፡እን እውስታኹሲኩም መስል ምህሮሩኹድ እንታ ለበኪል አዘዝትድነዲ ላኪንጃርድ ሞሳ ኣኽኒት። 19 እንታ ቂልስን ሰበትድ አዳምር ጋብድጋበኩን እንኩኹን፡እን ጂበዲ ገፍዕነዲ ፍቲሕሲ ፋሕ ስነዲ እንታ ፊኹትሲ ገንሽናርሊ ደክስድኖ ኡድናኽር ኒሰናኽር ናን ጭድቕድ ሸታከትድ ገዝእስትሮ እንታ ፊኹትሲ እዋ። 20 ገንሺን ሓራሙ ዋንትዱኑታ ጭድቕልድ ናጻ ፍድናኽር ግን እርግድናኽር ፡ 21 ኒኣኽር ክራ ኣኽነዲ እና ንኪ ሲመርደናኹድ ኣከገን እን ወክት እንድድ ውራ ፍራ አርሶኩም። 22 - 23 መህየት ሓራሙኹ ክራ ግን እውን ገድ ጃሩኹ ላኪን ክርስቶስ እየሱስ ይና አደረድ ዲመር ርሕ ግን።ናን ላኪን ሓራምልድ ናጻ ፍድነዲን ጃርሲኽር ገዝእስትድነዲ እንታ ፍራ ሸታከትድ ኣኾ ህምባኹ።ኒ-ደጎባኻ ዲመር ርሕ ግን።