1 1. ንድ ደምቢ ይኸ፡ እነሓን ሰሚል መራ ብስታዅ ቋልዅን። እን ይዲ ጋቡጙጉሲክ ዋሳዅሉ ደሀይ ዕንድሩዅሰና ኣኻዅ ሰልፋ ደሀይ ይኸ፡ እን ንድ ደምቢ ኣኽሮ ፈረውሲ ቋሊስየካ ነራ ዓረጊ ይዅለ። 2 2. እንሲን ላዶንትል መንፈስድ ሀነንዮ ዋኑ ሰሚል ቂጦራ ሰሚዅ ገሞ ቋልዅን። እን ቂጦራ ሰሚዅሊ ይኸ፡ ላዅ ከፍ ዮ እርጉዅ። 3 3. እን ኒል ከፍዮ እርጋዅ፡ ኒቋላ ክርጛ ያስጲስዲ ስርድዮስሩዅዲት ተኩ እርጉዅ። እን ጀውዲር ገባ ይኸ፡ ሕንጩን አሸላ ተካዅ ማርያምር-ቅናት ከለቦሉ እርጉዅ። 4 4. እን ቂጦሪ ክሊትሊ ለጘረጝንዲ ሰጃ ቂጦራ እርጉዅ፡ እን ቂጦታተል ኮዶ ጫዕዳዅ ሰረና ሰረው ጀውዲ ደሀቡ ናኣኾርሊ እሰው ለጘረጝንዲ ሰጃ በህሊን ከፍ የው ቋልዅን። 5 5. እን ቂጦራ ሰሚዅልድ ተልዋሕረው ምርክዲ ህማማትዲ ጓጝጒዲ ፊዅ፡ እን ቂጦራ ሰሚዅድ ጃብል ይኸ ለጘታ ቲዃ በርሁ እርጉዅ፡ ናውኻ እን ለጘታ መናፍስ ጃሩ ግን። 6 6. እን ቂጢራ ጃብል ኮዶ በሓርሰና መዓፈይ ኣኻዅ ሕንጩና ተካዅ እርጉዅ። ጃብረዲ ደምቢረዲሲ ዕልልድ እንሳኽሰው ሰጃ ኣርዋሑ መሀድሰው እን ቂጦራ ክሊትዲ ነበክዲትል እርግኑዅ። 7 7. እን ሰክፋ ርሑዅ-መሀድ ገመና ተከዅ፡ እን ሊጘር ርሑዅ መሀድ ቢራ ተከኵ፡ እን ሲዀር ርሑዅ መሀድ ይኸ አዳምር ገሽ ተካዅ ገሽ እርግዅሉ፡ እን ሰጀር ርሑዅ መሀድር ዋዋዅ ዓያ ተካዅ ግን። 8 8. እን ሰጃ ኣርዋሑ መሀድሰው ይኸ፡ ላዅክ ወልወልታ ካንፍፍ እርግዅሎም ናከደንዲ ናኮረዲሲ ይኸ ዕልልድ እንሰኽሰው ግን። ቂርዲ ገርክዲ ካረምግኒ፡ እን አደራ ጃር ኒትክ ገረሳዅ ሰጛዅዲ ህምባዅዲ እን እንተራዅዲ ሻትክ ሻትክ፡ ሻትክ ንግን ዩኑ ዘመርኑዅ። 9 9. እን እንሱስ ኣርዋሑ፡ እን ቂጦሪል ከፍ ያዅ ዲማ ዳይም መንደርታዅድ ክብርዲ ሳቡርዲ ሙሰዲ እውኑጙጉሲክ፡ 10 10. እን ለጘረጝንዲ ሰጃ በህሊን፡ እን ቂጦሪል ከፍ ዮ ህምባዅድ ጃብል ለብኖ፡ እን ዲማ ዳይምድ መንደርታዅሊ ፍግም ይንዅሉ፡ ናጀውዲት እን ቂጦሪ ጃብል ገምድኖኻ፡ 11 11. ይና አደረዲ ይና ጃርዲ፡ እንቲ ክብርዲ ሳቡርዲ ስልጣንዲ ኣድቶ ታምም ግን። ኒትክ እንቲ መሀድርዅሉ፡ ኵኪንድር ኣኹዅ፡ መሀድስዅር፡ ዩኑ ዘመርኑዅ።