ፊዃ-3

1 1.መልኣኽ ማሕበር ሰርደስሩኹል ከተቢ፡እን ለጘታ መናፍስቲ ጃሩ፡ለጘታ ሽንግርውር ህምባኹሉ ንሰና የኩ፡ኣን ኩግብርሲ አርእኹንሉ፡ህምባኹ ይስትሮ ሽጝስትራኹ እንኩሩኹ፡መላኪን ክርዳኽር ግን። 2 2.ኩግብርሲ ይኽርጃር ጃብል ታምም ኣኾ አርሊሉ፡ነቕሒ፡እን ክርድኖ ይኖ ህምበነው አሪውሲኽር አራጋ ይሎም። 3 3.ገድም ኣዋሀብረ ከም ከለብርደት ከም ዋስረት እልብዲ፡ተከዊሉኽር ተነስሕኽር።ነቕሓግረን ስዋነሰና እንትያካ ግን፡ኣወይረሪ ሰዓቲትል እንተረትካኽር አርእላኒ። 4 4.ሰርደስትል ና ሰረጝ መንከልገው ከለለው ስጙጙ ህምበነኩካ፡ናው በቕዓው ኣኽነውድ፡ሰረጝ ጫዕተው ሰርኖ ይዲ ወንተተርድኖ ግን። 5 5.እን ቂላኹ ኒሰና ሰረጝ ጫዕተው ሰርዶ ግን።ኣጝር ኒስጙሲ ክታብ ርሕኹልድ ሓከከሊሉ፡ይኽርድ ጃብልኽር ኒማላእኽቲ ጃብልኽር ኒስጝሲ እምንስየሉ ግን። 6 6.እንቚዋ ህንብረሪሉ መንፈስ እን ማሕበራትሲ የውሲ ዋስን። 7 7.መልኣኽ ማሕበር ፊላደልፍያርኹል ኮዶ ከተቢ፡እን ቅዱስ እምንሳኹ፡መርሖ ዳዊትሩኹ ህምባኹሉ፡ኒብደን ላኹ ድኳ ኣበደጋኹ፡ኒ-ኣበደን ላኹ ድኳ ብደጋኹ፡ንሰና የኹ እንኩኹ። 8 8.ኩግብርሲ አርኦሉ ህምበኩ፡ኩዓቕም ከለላኹ ግን፡ይ-ቆልሲ ተከውርኹሉ ኮዶ ይስጙሲኽር ከሓድላ እማ ላኹ ኣበድሮሉ ገረሰጋኹ ብስታኹ መራ እዎካ ህምባኩን። 9 9.እናሓን እን አይሁድ ግን ይን የውልድ ማሕበር ሰይጣኑ እማ ብጚተናኩ እንኩኑኹ ግራ አይሁድ ኣኽገው፡እወኩንካ እንኩኹን።እናሓን ናው እንተረነት ኩልኩ ጃብሊ ከም ሰገደነትር፡ኣን ከም እንከለትካኽር ከም ኤርአነት እስየሎም ግን። 10 10.እን ይቆል ሰብርኹሲ ሰበት ተከውረትሉ፡ኣጝር ኮዶ እን ብሪል መንደርተውሲ ፈተንቶል እድንጛ ኒትከል እንተርደሪ ሰዓት ፈተኒትሪትልድ ተከውያካ ግን። 11 11.አሸሾ እንተረኹን እንኩኹን፡ላኹ ድኳ ኣኽሊልኩኹሲ መንጥልጊንካ፡እን ህምባኹሲካ ተብድሮ ሻኺ። 12 12.እን ቂላኹሲ እን መቕደስ ጃሩኹሊ መሱና እስየሉ ግን፡ኒልድ ወላ ፋላኒ።ስጙ ይጃሩኹዲ ስጝ ታንታርዋ ጃርትሪዲ፡ጃርልድ እን ሰሚልድ ገምረሪ ሓዲሲ እዮሩሳሌም፡እን ሓዲስ ይስጝሲ ከተብየሉ ግን። 13 13.እንቚዋ ሻኹ መንፈስ እን ማሕበራትሲ የውሲለን ዋስን። 14 14.መልኣኽ ማሕበር ሎዶቅዪልኽር ከተቢ፡እም ኣሜን፡ እምንሳኹ እምንዱኹ ምስክር፡ሰልፍ መሄድ ጃሩኹ ነወያኩ እንኩኹ። 15 15.ቀሽቀሻኹ ወሪ ብራኹ ከም ኣኽግረት፡ኩዋራትሲ ኤርኦ ህምባኩን፡ያረት ወሪ ቀሽቀሻኹ ወሪ ብራኹ ኣኽትድ። 16 16.ነወያኹ ልጡዕ ኩኣክነድ፡ወሪ ብራኹ ወሪ ቀሽቀሻኹ ኣኽግረውድ ይኣብልድ ጡፍ ይየካ ግን። 17 17.ታጅርዲ ብቁተኹዲ ግን ኣን፡ላሪ ድኳ ኣን ጀረበሪ ሻኽሊ ኩይነድ፡ረኺስዲ ረሓምዳኹዲ ሓግልዲ ዕውርዲ ካይተኹዲ ኣክረት ኤርእሮ እልላኒ። 18 18.ተጀርቶ ለኸድ ጨረያኽ ደሀብ ይልድ ጅቢቶ መታን፡ስማሳኹ ኩጎሮብ ካይትጊንር ሰርቶ መታጝር ሰረጝ ጫዕተው፡ቋልቶ መታን ኩዕልልሲ ኪልቶ ፡ኪላ ይልድ ጅቢቶ ኮድጛኹንካ እንኩኹን። 19 19.ኣን እን እንከለውሲክ ናትክ ዋኺተኩንሎምር ቀጽዓኹኖም፡እማ ቀንእሮ ተነስሒ። 20 20.እናሓን ደንአብ ልጝሊ ደውዮ ኳሕኲሓኹን እንኩኹን።ላኹ ድኳ ይደሃይሲ ዋሶ መረስ ብደንለ፡ኒል ትውያ ግን፡ኮዶ ኒዲ ድራትያ ግን ንኽር ይዲ። 21 21.ኣጝር ቂሎ ይኽርዲ ዝፋንሊ ከፍየሰና፡እን ቂላኹሲ ይዲ ዝፋንሊ ኮፍ ስየሉ ግን። 22 22.እንቚዋ ህምብረሪሉ መንፈስ እን ማሕበራትሲ የውሲ ዋስን።