ወልተር ፊዃ (ፊዃ-6) ኢየሱስቲ ኒ ኮቁር ቃበብኑኹሉ

1 ኒልድ ጐዅ ኒኮል ፈሩዅ ኒታለይቶትኻ ለሄክኑኹሉ፡ 2 አኽነዲጛ ጸሎት ልጝሊ ቱዎ ክንሲሮሎም ተርሲዅ።ገሪዋ ዋስነሰነሉ ፍክር አኾሎም ኒን አዊልድ እንትኹን ንስኮ ለበኪትነዲ ንስኮ ሒለትዲ ኒና ንድ እሳዅን ይኖ ፈከርስኑኹሉ። 3 ኒን እን ካን ሸረበንታ ማርያምሲ ንርኹራ አኽለማ ኒ ሻንኻ ያዕቆብረው ዮሴፍረው ይሁዳረው ስምኦንረው አኽኒማ እን ኒሻን እንቃቅኻ ነት ይነዲ እልንማ እንቋራ አኾሎም ያኣይ ጉድዕድዕ ዩኑ እርግኑዅ። 4 ሲን ኢየሱስ ነቢ ኒኮልር ኒፈራዕልኽር ኒልጝሊኽር ቃበብሰኲ ይኹሎም። 5 ሰበትድኻ ከለለው ሽዅሽተውሊ ናንሲ ገምዱኹ ግራ ላሪ በሽር እሲላ። 6 አማነት ብነድ ፈከርሶኻ ና-ገባ እርጋ ደገጊተል ጅልልወክ መሀርዱ እርጉኹ። 7 ሽካ ለጘት ኒል ሽጞኻ ብሽራት ሒል ኡዎሎም ለጝ-ለጘሲ እንሻቁኹሎም፡ 8 ደርብልኻ ግምቢ አኽገት ማረኽን ሳንሰዓ ኣኽን ወሪ ሰወልዲራ እንታ ማሕፈደትሊ ኤድጋ ዮ ተብዶ መዀዅሎም። 9 ሻፍ እሳ።ለጛ መስደርየትኻ ኮዶ ሰርጋ ይኹሎም። 10 ልጝልክ ፈርትናሲክ ኒል አኻ። 11 ላድገትል ኤተይድነሰና እን ኮቁር ከለብርነስር ዋስነስር ጉሸነንኩም ኮልድ ፍድኖ ሳምዕ አኽሮኩም እንታ ሻምፍፈል ተከኖ ህምባ ዕባስሲ ናኤወይሲ ከፍከፋ ይኹሎም።ፍርድ ግርገድ እንጫ ድገ እንጨዲልድ ሶዶምዲ ጎመራዲሲ ስዳውሮ ግን የኩንኩም። 12 ከው ናውክ ናለፈክሊ ወንተርድኖ ሰበክኑዅ። 13 ሸዋጢንኽር ፍድኑዅ ሽኹሽተውሲኽር ደድሽመቲነክ ትልሉኑ እርግኑኹ። 14 ኒልክ ድሪስትነዲጛ ሄሮዶስር ዋሱዅ ዮሓንስ ጠመቅደንታ ክሪልድ ጉነዲን ኒሒል ኒል ካርነድን ግን ኒን በሽራት ኒ እሳኹ ዩ እርጉዅ። 15 ኤልያስ ግን ዩኑ ላዋ እን ነበዋትልድ ላዅ ግን ጐ ህምባዅ ዩኑ እርግኑኹ። 16 ሄሮዶስ ነስ ተካ ወረታትሲ ዋሶሰና ኒን ዮሐንስ እን አን ኩዊሳኹ ኒን ንግን ክሪልድ ጐ-ህምባዅ ዩዅ። 17 ሄሮድያዳ ኒዳን ፍሊጶስቊት ዔሶ እርግነዲን፡ 18 ኩዳንድቊት ለውቶ ወጀበለካ ዮ ዋኺትነዲንሉ ዮሓንስቲ ሄሮድያደር ሰበትድ እንሻቆ አድኹሉ እማ እንሸዊሳሉ እርጉዅ። 19 ሄሮድያዳ ነዓልዶሉ አክና በላ ግን ግራ ኩቶሉ ጀረብሩ እርግቲ። 20 ዮሓንስ ግርዋ ሐላልኹራኽር ሻትክር አኸት አርእነዲን ጉኢቱሉኽር ኒአመትር እሱ ሰጘኲ። 21 ኒ እዃርሳ አመሪል በዓል እሲሮ ዮ ሽማገለዲ አስያም ገቢለት ገሊለሩዲት ምዳስሮ ሽጝኹሎም። 22 ሄሮድያዳሲ ንርቁራ ቱቲ እማ ካተርቲ ንድኻ ሄሮድስዲ ኒገቢለዲት ፈርሕድቲሎም እምንድክ እማ ንጉስ እን፡ኤኢት እንቲ ጀረብራኹሲክ ኡዊየኪ ሺዊለ ይዅላ። 23 ገፍ ድኳ አኽኒ ኡውሪኪ፡ዮ ሸንህዱኹላ፡ 24 ኒልድ ፍሮ ንር-ገነት “ውራ ሺዊንሉ አደ” ይቲላ።ንር-ገናኻ “ዮሓንስ ጠመቅደንቲ አኾርሲ ናኽለ ይሉ” ይቲሉ። 25 ንጉስሊ ወንተርዶ “ናን-ናን ዮሐንስ ጠመቅደንታ አኾርሲ ግባርሊ እስረ ኡቶለ ጀረበኩን” ይቲሉ። 26 ገሪዅ ቊርቊርቱዅ፡ደአም ሸርነዲጝር፡እን-ኒል እርጋ ገቢለትሲ ስማርነድር ገብሮላ ጀረቢላ። 27 ሲም ንርድ-ንርድ ላዅ ዓስከሪራስ እንሸቆኻ ፈሪ ዮሐንስር ኣኾርሲ ናቅሲላ ይኹሉ።ኒኻ ሐብስኹል ፈሮ አኾርሲ ቀረጮኹሉ። 28 አኾርሲኻ ግባርሊ እሰ ኤዶ እንቶ እንኤኢሲ ላምሱኹላ ንርኻ አድሮ ፈርዶ ንር-ገናሲ ኡቲላ። 29 ኒስ ዋስነሰና ሐብሱኹል እንትኖ ኒበድንሲ ኤድኖ ደቢኒኹሉ። 30 ኒታለይቶት ኢየሱስትል እንትኖ እን ናው እሲነዅ ሲኽር ሰበክናዅሲኽር ድዊኒክውሉ፡ 31 ነብራ አድነስ ደልም ብድናሲክ ከው ከላእ ወንተተሩሎም እርግነዲንኻ “ላዃ ጓና አካን ጭምዊታኹል ላዶን ፊዅትኖ” ይኹሎም። 32 32.ብራ ክሰሰናኻ ታንኳትድ ናቱ አዶሎም ፈሩኹ። 33 ከው ገሪው ፈሩኑ ቋልኑኹሎም እማ ኤዊል ፈረነት ኤለለይኖኻ ናልኩኩድ በደርኖም ደኩኖ እንኩልኩልስኖ ዲዊኒኹሎም። 34 ታንኳትልድ ገመሰና ከው ከላእሲ ቋሉዅ እማ ሳኻንድኑኹሉ።በግ ምቃቃ እንግግረሪሰና አኽኖ ቋልስትኹሉ እማ አቅትራሲክ መሄርድኹሎም። 35 አኾሰና ኒታለይቶት ኒል ስኩር ይኖ “እና ይን ህምብና ኣካን ከደን ግን ኳራኻ ለብቲ። 36 ይና ገብገቢል ህምባ ደገጊትል ፈርኖ ሙነት ጀረቢድኖ እና ከውሲ ውራ ስብደለሎም” ይንኹሉ። 37 “ኒኻ ቊስታዅ እንትን እወሎም” ይኹሎም፡ናዋ “ለጛ ሊኽ ሶወልዲረድ ይን ፈርኖ ሳንስዕ ጅብነ ቊስኖሎም ይአይ!” ይንኹሉ። 38 “ውራካ ሳንሰዓ ሻኽድኑዅን እንደ ፈራ ቋላ” ይኹሎም።ናዋ ፈርኖ ቋልኖ “አንኳ ሳንሰዓዲ ለጛ ዓሰዲ ዋ” ይኑኹሉ። 39 ከውሲ ናትክ በንንጝዲነ እና ማሕረጥሊ ዓገለሎም ይኹሎም። 40 ሊኽ ሊኽድር አጝአንኩረጝንድር ዓገልስኑዅ፡ 41 አንኳ ሳንሳዓዲ ለጛ ዓሰዲት አዶ ኻ ዓስተርሊ ናዕሰ ዕልልሲ ጃርሲ ሐመድዱዅ እማ ሳንሲዕሲ ሸረረፎ ከውድ ስኲስድኖሎም ኒታለይቶትድ እውኹሎም።እን ለጛ ዓስስር እንዳሃበ ናድክድ በኒኹሎም። 42 ቁኖ ብትኑዅ። 43 ሽካለጛ መሶባት እንሳኽኖ ጉድኑዅ፡ኒሰና ዓሲልድኽር ጉድኑዅ። 44 ቈው ግርው ካያ አንኳ ሲሕ አኩኑ እርግኑዅ። 45 ኒታለይቶትሲ “ወለይዳ አሸሽድኖ አን ከውሲ ስብድሪሲክ ታንኳትድ ኒራ እንደራ ቤት ሳይዳር ካርጝል በደርድኖለ ዲዋ” ይኹሎም። 46 46.ከውሲ ስብዶሰናኻ ጸለይሮ ጊሪል ተረገሱዅ። 47 ለብሮሰናኻ እን ታንኳ ዓይግ ነበክል እርግቲ ኒኻ ኒቱ ዓይግ ሸልሊ እርጉዅ። 48 ጃብረድ ሒል እሰሎምኻ ፈርነስ ገቦሎም ገሪዅ ለጨጭሶ ህምበውሲ ቋሉዅ።ወክት ሰጀር-ሰዓት ቂራኹድኻ ዓቁድ ዓቊፈሩንሲክ ናል አኽታሲክ እንትኹሎም ደኩሮሎምኻ ዩዅ። 49 ዓቋ አወይሲ ፈራኹሲ ቋልነሰና ሸጫን ተከሎም መውዒታት እሲኒዅ፡ 50 ናውክ ቋልንነዲንሉ ሳደድስኑዅ።ደአም ኢየሱስ ንርድ ንርድ “አረጋ ታንተጋ አን ግን” ይኹሎም። 51 ታንኳትሊ ዓረጉዅ።እንሲንኻ ወልወል ሃናእ ዩኹ ናሹር ናሹ ናጐሱኩድ ውራ በስር ግን ኒን ይስትጊኒዅ። 52 በስር ሳንስዒዅ ናለበኪል ላሪ ፈሄምሶሎም እርግላ፡ 53 ካርኖኻ ጌንሳሬጥር ብሪል እንትኑዅ። 54 ገሞሰናኻ ንርድ ንርድ ኮቁር ኤለለይኑኹሎም። 55 ወረቢልኻ ኒ እንተርና ዋስስቱኹ እማ ኒህምባ ኹሊክ ናሽኹሽተውሲ ዓራታተል ምዅሪነክ ናቅስኑኹሉ። 56 እንታ ድገትል አከጝር እጝጊታተል አከጝር ዕርዲሪል አከጝር ኒ ደኳኹሉክ ሺኹሽተውሲ ምኹሪነክ ናቅሲነክ ኒጃብል ገምዱኑሎም እርግኑዅ።ናዋ ኒ-ታዊነስ ተመድኖ ሺዉኑሉ እንግኑዅ ተመደውክኻ እቢሩኑ እርግኑዅ።