1 ካርግልኻ ብራ ጌርጌሴንርዅል እንትኑኹ። 2 ገሞሰናኻ ላግርዋ ሸጣን፡ሻዅ ኤርፍፈልድ ፌ-ጋጙ ሃደፍ ይኹሉ። 3 ኤርፍፈል ሰጘዂ ኚጥ ጠብድዕ እንሸዋዅ ኒኾርስክ ገመር ትሩድ ሰጘላ። 4 ገመትዲ መዓጪዲሲ፡ተብድኖ ከረውሲነ እንሸዉኑሉ ሰጘነኲ፡ድአም ናትክ ከተተቦ ባሩ ሰጘኲ እን ኒ-ህምባ ኣካንድኻ ላዅ ኣዊ ይኮት ያዅ ደኩሮ ገረሳዅ ሰጘላ። 5 ቂርዲ ገርክዲ፡አርፍፈልኽር ጊትልኽር አከክ መውዒታት እሱ ኒፊዅትሲኽ ሕንጩንድ በጠኢሱ ሰጘኲ። 6 ኢየሱስቲ ቋለሰና ጋጙ እንቶ ኒጃብል ሐርበጡዅ። 7 “እንቲ መንፈስ ሙቁላ ፈሪ ፊ እና ግርዊልድ ዩሉ፡ 8 ጋብሲ ክብሰ “ኦ ኢየሱስ ጃርኹራ ይዲ ኩዲር ነበክል ውራ ዋነና።ጃር ጨጊር ምጨትድ ኣላላ እሲስግል” ዩንሲክ መውዒታትሲ ትቡሉዅ። 9 ኮዶ ኩስጝ ኤውኒ ግን ዮ ወንቀሩኹሉ ኒኻ ገሪው ኣኽንነዲን ይሱጝ “ለጌዎን ግን” ይኹሉ። 10 ኮልድ ፈስጊንሎምኻ ገሪዅ ሺዊኒኹሉ። 11 ጊሪ ቃሽል ወንኪር ሸፈልስሮ እርግቲ። 12 “እንጫ ወንኪርሊ ቱኖ ፈስቶና ኲ-ዓይብ ይኖ ሺዊኒኹሉ፡ኒኻ ፈራ ቱዋ ይኹሎም። 13 እን ግርዊልድ ፍኖ ወንኪርሊ ቱኑዅ፡ናውኻ ገለብሮ ቅራርድ ትንኩሪርዶ ናውክ ዓይግል ለብሮ ተረቅቲ እን ወንኪርኻ ለጛ ሊኽልድ በጃኽሩ እርግቲ። 14 ንምቃቅልድ ኒልድ እግረው ድገትል ኒትክ ድሪስኑዅ ኮቁርኻ ውራ ተካ ወራት አከት ቋልድኖ እን ኩልኩልስኖ እንትኑኹሉ። 15 እን-ግርዋ ሸዋጢኑዅ፡እቢሮ ኒታኲን ሰሮ ኢየሱስዲ ከፍ-ዮ ህምባኲሲ ቋልነሰና ጓቑትኑዅ። 16 ኢየሱስ ሃበውዲ እንወንኪርሊ፡አኾ ብሲራትዲ እን ኒል ዲወው ትክሲነ ጂጝስቲኒዅሎም። 17 ናኮልድ ፈርዶሎም ሺዊኒኹሉ፡ 18 ተር-ዮ-ሰና እን ሸዋጢኑኹ ሰጛዅ ኒዲ ፈርዶ ሺዊዅሉ። 19 ኢፋልካ፡ፈሪ ኩልጝል አተይሮ ኒትክ እንጃር ኩድ እሰ በሺርሲ ኩከውድ ድዊሎም ይኹሉ፡ 20 ወንተሮ ሽካ ደገጊተል ኒትክ ኢየሱስ ኒድ እሴዅሲሉ ድሪሱዅ። 21 ኮዶ ታንኳትድ ኒራድ ቅብልሊ ካሩዅ፡ኒላ ከው ገሪው እንኩልኩልሱዅ ኒኻ ዓይግ፡ሸልሊ ደውዩኹ። ያኢሮሱቕረት እቢሰት ንርድኽር ብር ፈሩላ ሰጘሪ እዅና እቢሰት 22 ላግርዋ ያኢሮስ ይስታዅ እን ጸሎት ልጝሊ አደራ ቋለሰነሉ ኒልኩል ለቡዅ እማ፡ 23 ግናዪ ክርቶለ ፈረቲ ላዅ እንትሮ እቢርቶ ኩናንሲ ገምዲላ ዮ-ሺዊኹሉ። 24 ብሩፍ ዩዅ ከው ብጅኽድ ደረኩኑሉ ተለይኑዅሉ። 25 ከውዲ ሕበበርስረ ላእዅና ብር ፈሩላ ሽካ ለጛ አመራ እስረሪ እርግቲ፡ 26 ትልለውሊ ንር-ማል ገሪውሊ ድሂስረሪ ግን ድአም ጂባ አከገን ላሪ ኪድለላ፡ 27 ጋበውሲ ዋስርነዲጛ ከውዲ ሕበርስረ እንትቲ እማ ጉርበትድ አኽሮ ኒታዊነስ ትምድሲቲ። 28 ኒታዊናስ ተመድን ግራ እቢርድያ ግን ይሮ ሳድሩ እርግቲ 29 እን-ላኸን ብር ኒድ ጀበብ-ዩላ ሰጛዅ እቢሩዅ እቢርደትኻ ንር ገሮብሊ አርእስቱኹላ። 30 ኒሹትልድ ሒል፡ፈት፡ዋስስቱኹሉ፡እማ ከውሲ ማኸኸልቶ “ኤውንኒ ይታውይነስ ተመዳዅ” ይኹሎም። 31 ኒድክድ ከው ትንክበውሲ-ካ፡ቋልዱ ኤዊ፡ተመድኹንለ ይሮ ወንቀርዳኹን” ይንዅሉ። 32 እን ተመድረሪትሉ ኤርዶ-ዮ ኒ-ጂልዋንል መኽሽልቱዅ። 33 እን እዅና አርሱዅን ይሮ ጉኢሲ አልኮተቲ፡ውረድ፡እን ንርትል አኻ በሽር ኤርእሰቱኹላ።ሲንኒ ጃብል እንትሮ ገሽድ ሐርበጥሮ ኒትክ ድዊቲሉ። 34 “ኩአማነት ግን ኩት እቢሳዅ፡ይቊራ፡ፈሪ፡ንኪትልድ ተርስረ ኩሹዅዲልድ እቢርዱዅ” ይኹላ። 35 ጋቡ ላው እን ቤት ጸሎት ልጝልድ እንሸቕስኖ ኒል እንትኖ “መምህርሲ ግምሽ ተዓብድግሉ ኩቊራ ክርቲ” ይኑኹሉ። 36 36.ኢየሱስ ና ጋብሲ ዋሱዅ እማ እን ጸሎት ልጝን አደረስ “ላሪ ጓቊትግ እምኒ ካያ ይኹሉ። 37 ያዕቆብዲ ዮሐንስ ያዕቆብሲ ኒዳንዲት ኒዲ አዶኻ ኤሪውሲ ተለይድኖሉ፡ጀረቢላ። 38 እን፡ጸሎት ልጝን፡አደሪ ልጝሊ ገእዮሰና ከው የዉ-የውዲ ስረውዲት ቋሉዅ፡ 39 39.ልጝሊ ትዎኻ “ውሪዅ ስርደናዅን፡እና ኤኢ ክርዶ እልላ ገንጅሮ ህምበቲ” ይኹሎም፡ 40 .ናዋ እንቋሪኒኹሉ ናትክ ልጝልድ ፍዶኻ፡ኤኢር እኽርዲ፡ገነዲ ኒዲ እርገውሲ ኤዶኻ-እን-ኤኢ ሕምብርእ ኣካንሊ ቱውዅ። 41 41.ናንሲ አዶኸላ፡ጣቢታ ቁሚ ይኹላ፡ንኻ አዪ ኤኢ ጒ የኩንኪ ይና ግን። 42 42.ንርድ ንርድ እን ዓንቂ ሽካ ለጛ አመሪሪ እርግቲ እማ ጉሮ ፈርቲ።እን ኒል እርገዋ ገሪዅ ፈከርስኑዅ። 43 43.እና እስተዅሲ ላዅ ድኳ ዋስጊንሉ ተብዶ አደድዅሎም፡እን ኤኢስኻ ቊስታዅ እወላ ይዅሎም።