ሰልፋ ፉዃ (ፊዃ-1)

1 ኒ ጃበራ ኢየሱስ ክርስቶስ ጃርዅሪዅ ወንጌል ኒን ግን። 2 እናሐን ኢሳያስ ነቢትል “ጃር ጉግ ደለምዳ ኒደርፍፍሲ ጠለቓ”። 3 ያዅ አውከደንሊ ጨርሐዅ ላጋባ ኩጃብጃብል ኲጉግሲ መለዋልይዲ ጋባያንዲት ጠልቓኽር እርውሳኽር ያዅ ከተብሳኹድ ሰና፡ 4 .ዮሐንስ ዓገብሲ ብሕልሲሳዅ ጥምቀት ጢዒሱዅሲ ሰበኩ አው ከደንሊ እንቱዅ፡ 5 ይሁዳ ብሪውዲ ዮርሳሌሙዲ ኒል እንተሪነክ ናዓገብ እምኒነክ ብሕል ይስትሮሎም ዮርዳኖስር ወረቢል ኒድ ጠመቅሱኑ እርግኑዅ። 6 ኒሰረና ግሚሊ ዒዶራ እርጉዅ፡ኒ ሕቀቅል ማጨይሲ ደበልቶ ሰጘኩ፡ 7 “ይልድ ሒሊታዅ እካዅራ አን ኒጃብል ሉምዮ አስርከት ኒሻንፍፈውሲ ወጨልየሉ ወጀበጋዅለ ይደንቢ እንተሮግን” ዩንሲክ ሰበኩ ሰጘኲ። 8 .ኣን ዓቑድ ጠመቕደኩንኩም እንኩኹን ኒኻ መንፈስ ቅዱስድ ጠመቕድሮኩም ግን ዩ ሰጘኲ። 9 .እናሐና እንሰከር ግርገትል ኢየሱስ ናዝሬትልድ ገሊለትል እንቶ ዮርዳኖስትል ዮሓንስትልድ ጠመቕሱዂ። 10 ፋኻ ንርድ ንርድ ዓስተር ብስቱዅ መንፈስ ቅዱስ ኳትራ ተኩ ኒ አወይሲ ገሙ ቋልስቱዅ። 11 “እንቲ ይኹራ እን ፈርሕድራኽርለ ኣን እንከላዅ ግን” ያዅ ደሀይ ዋስስቱኹ፡ 12 .ንርድ-ንርድኻ መንፈስ ሙቁላ ኣው ከደንሊ ፍድኹሉ። 13 ሸጣንድ ወጠንሱ አርብያ ኳራ ጨበሩዅ።ዋኒንዲ ዋንቱኻ መላእኽቲ እንሻቕሱኑሉ እርግኑዅ። 14 .ዮሓንስ እንሸውሶሰና ኢየሱስ ሲመር ጃርዅሲ አበሸርዱ ገሊለትል እንቱዅ። 15 “ወክት አቅቱዅ ሲመር ጃርዅ ሱኩሩዅ እንተለፈክሲ ወንተራ ወንጌል እምና” ዮ ሰበኩ ሰጘኲ። 16 .ገሊለር ዓይግድ ሸልድ ደኩኻ ስምኦንዲ ኒዳን እንድርያስዲ ናውራት ዕሳ ሻክና እርግነዲን ናሰቀሊትሲ ዓይግል ማለውሲ ቋሉዅ። 17 “ላዃ ጓ ለሄከለ አን ከው ሻከው እሲየኩም ግን” ይኹሎም። 18 ና ሰቀሊትሲ ባርኖ ኒዲ ብርፍ ይኑዅ። 19 ላመደት ደኮሰናኻ ያቆብ ዘብዴዎሱኹረዲ ዮሓንስ ኒዳንዲት ታንኳትሊ አኽኖ ናሰቀሊትሲ ትክሱኑ ቋልኹሎም እማ፡ 20 ሽጙኹሎም።ናዋ ናኽር ዘብዴዎስዲ ናት ካበውዲት ታንኳትሊ ባርኖ ኒዲ ብርፍ ይኑዅ። 21 . ቅፍርናሆምትላ እንቱዅ ብራ ሰንበር እርግነዲጛ ኒድ-ኒድ ቤት ጸሎትሊ ትዎ ትክሰ ክንሲኹሎም። 22 ና ከታበንሰና አኸጊ አደሪሰና አኾ መሀርዳኹሲሎም ቋልነሰናኻ ፈከርስኑዅ። 23 ጸሎት ልጝሊ ላግርዋ ሸጣን ሻዅ እርጉዅ። 24 “ኦ ኢየሱስ ናዝሬትሩዅ ኩዲ ይነዲት ውራ ዋንተና እንቲ ድሂስቶና እንትሮ ህምብራኽር ግን አዊ አኽረት አርእኑዅንካ እንቲ ሻትክ ጃርዅራ አኽረት” ዮ ዋዕዩዅ። 25 ሰቖቢ ኩአብ ሻኽሮ ፊ ኒልድ ዩ ዋኺትኹሉ። 26 እን መንፈስ ሙቁላ ረግረጎሉ ደምቢ መውዒት ሸደቦ ኒልድ ፊዅ። 27 እን ኒል እርገዋ ፍክር ኣኾሎም ናሹርናሹ ኒን ውራ ተካ ወራትኒ ሒልድ ሐዲስ፡ክኒ ክንሳኹ ሸዋጢንሊ አኽራሲክ ኒምራድሰነክ እሳዅ ዩኑ ኣላ ጋዶ ግን ኒና ይኑዅ። 28 ገሊለር ብሪል ኒ ገእያ አካናትሊክ ዋስስቱኹ። 29 ጸሎት ልጝልድ ፈሰናኻ ኒድ-ኒድ ኒዲ ያቆብዲ ዮሐንስዲት አዶ ቤጥሮስዲ እንድርያስዲር ልጝሊ ቱውዅ። 30 ስምኦንዲ ተንሺኒ ሻማ ሻኾላ አርግል ዳዊቲሎም ንርመታጛ ሺዊኒኹሉ። 31 ንርትል ናንድ ሻኾ ጉድኹላ ንርድ-ንርድ እቢርዶ ከርተፍይሮ ዓወንቲሎም። 32 ኳራ ለብሮሰና ናትክ ሹኹሽተውሲኽር ሸዋጢን ሻኸውሲኽር ናቆስኑኹሉ። 33 ድገሩኻ ጭምድሊ እንኩልኩልስኑዅ። 34 ናትክ ናሽዅዲልድክ እቢሱዅሎም ገሪው ሸዋጢንኽር ፍዱዅ ኒን አውኒ አኸት አርኡኑሉ እርግኑዅ ኒ ደአም ኒሰበትድ ጋበግኒን ተብዶ ገብዅሎም። 35 ጭልግልግል ጐኻ ጭምዊታ አካንሊ ጸሎት እሲሮ ኮልድ ፊዅ። 36 እን ኒዲ እርገውዲኻ ጀረቢድኖሉ ፈርኑዅ። 37 “ናውክ ጀረበነኩካ እንኩኑዅ” ይኑዅሉ። 38 “እናይና ገቢል ህምባ ደገጊትልኽር ጐና ውረድ ናድር ሰበክያ ግን አን እንቶ ህንባዅ” ይኹሎም። 39 ጸሎቱዅል ኽር ሰበኩ ሸዋጢንስኽር ፍዱ ንርትክ ገሊለትኻ ጅልውኹላ። 40 ግርዋ በርሰቱዅ እንትኹሉ ኒጃብል ብሶትድ ሐርበጦኻ እንቲ ኩምራድ አከን ላጭሕድቶለ ገረስረኲ ዩንሲክ ሺዊኹሉ። 41 ሳኻንድኹሉ እማ ናንሲ ኒል አኽራሲ ጣለቆ ተመድኹሉ እማ “የዋ ይምራድ ግን ላጭሒ” ይኹሉ። 42 እንበርሰት ላጭሕኹሉ። 43 የሱስ ላኹድ ድወጊን ተብዶ መኾኾሉ ደምቢኻ፡ 44 እቢርደት ሳምዕ አኽሮካ እን ሙሴ አደዳኹሲና ቀሺረድ ቋልስቲ ዮ ስብድኹሉ። 45 ኒኻ ኒልድ ፈሮ ኒልክ አኻ አካንልክ ወሪሱዅ ንድኻ ኢየሱስ ትብታንድ ኤኤገን ደገጊተል ዔርና ገሪዅ ጅርበት አኩሉ እርጉዅ ንድ ሰበትድኻ ከደንድ ከደን ጭሙዊታ አካናትሊ ትብቱ እርጉዅ።ኒልር ዋሳኹክ ኣኻኮልድ እንተሩኑሉ እርግኑዅ።