¹ 1.ሰንበር ደኮሰና እን ግርጋ ጃበሪል እን ኡናሩኹል፡ማርያም መግደላዊትዲ፡እን ሊጘሪ ማርያምዲኻ ኤርብሲ ቋልድኖ ጉራብድ ፈርንኑዅ። ² 2.እናሐና እንሲን ብራሒልድ ሐንቀልቀሉዅ፡ውረድ መልአኽ ጃሩዅ ዓስተርልድ ገሞ እን ክርጛ ጎቊሲ አበዶ እርጋዅሲ ገለበዶ ኒዳግ ከፍዩዅ። ³ 3.ኒቋላ ምርክሰና፡ኒሰረንኻ በረድሰና ጫዕተው እርጉዅ። ⁴ 4.እን ተከወው ኒሰቋልነስና በኻኻድር ጓቊስኽር ናለፈክ ድዶሎም ክረውድሰና ብሪል ማልስኑዅ። ⁵ 5.እንሲን እን መልአኽ እን እኲንሲ ነዋይኹለን፡ ⁶ 6. “እንትን እን ሰቀልሳዅ ክርስቶስቲ ጀረብደነት አርኦ ህምበኩን፡ኤረጋ ላሪ ጓቊትጋ፡እን ኒዮ እርጋኹድሰና ጉዅ ነት እላ። ⁷ 7.ላዃ እን ኒደብተ እርጋ አካንሲ ቋላ፡ወለይዳ አሸሽኹድ ፈርድኖ ኒታለይቱትሲ “እናሐን ክሪልድ ጉዅ ገሊላትል በደርዶኩም ግን፡ኒል ቋልትኖሉ ግን” የሎም፡እናሐን ድወክን ህንበኩን”። ⁸ 8.ናውኻ ላገፍዳ ታንትጝድ ላገፍዳ ፈርሐትድ ኒልድ ኒ ታለይቱትሲ በሸርድድኖሎም ጋጚኒዅ። ⁹ 9.ናኺነ ፈሩኑ-ኻ እናሐን ኢየሱስ ሃደፍ ይኹለን፡ “ሰላም ወርክማ” ይኹለን።ናዋ ስኲርይኖ ኒልኩኲሲ ሻኽኖ(ለብኖ) ሰለምንኹሉ። ¹⁰ 10.ኢየሱስኻ “አርጋ ላሪ ጓቊትጋ ፈርድኖ ይሻንሲ ገሊላ ደኳ የሎም፡ኒልኻ ቋልድኖለግን”ይኹሎም። ¹¹ 11.ናው ፈርኖሰና እን ተከዉ እርገውልድ ላው ኮል አተይኖ ኒትክ እን አኻ ጋራትሲ አቅሽታ በህሊንድ ጂጝስቲኒኹሎም። ¹² 12.ናዋ ከዋ በህሊንዲ ዲቢል ዓገልስኖ ኰድጚነ እን ተከዉ እርገውድ ሰላዲ በጃኸድኖ ኡንኹሎም። ¹³ 13. “ቂር ገንጅኖ ዋንትኑንሲክ ኒታለይቱት እንትኖ ቂር ስዊኒኹሉ” ይዱኑ ድሪሳ(ወሪሳ)፡ ¹⁴ 14. ነስ ተካ ጋራት እን መሪ ዋሰን ይና ላውድ ፈሃሚስኖሉ ግን” ይንኹሎም። ¹⁵ 15. ነጛ ናሰላዲት ከለብርኖ ናው ኰድጚነሰነሎም እሲኒዅ።እና ጋር ኒን ናን አኽታሲክ አይሁድ ብሪል ጋብስተኲ እንኩዅ። ¹⁶ 16.እንሽካ ላዅ ታለይቱት፡ኢየሱስ ሐበሮሎም እርጋኹድሰና፡ገሊለር ጊሪል ፈርኑዅ። ¹⁷ 17.ኒል ቋልነሰነሉኻ ብሶትድ ኒጃብል ለብኑዅ፡ደአም ናልድ ላው ተሐደብኑዅ(ተዓነንኑዅ) ¹⁸ 18.ኢየሱስኻ ናል ስኲርዮ “ኒልክ ጃርዲ ብራዲትል ሕክም እውስቶለ ህምበኲ፡ ¹⁹ 19.እማ ፈራ ከውሲ ናትክ ሱጝ እኽሩዅድ፡እዅሪዅድ፡መንፈስ ቅዱስዅድ ጠመቅድዱኑ ይት ተለየው እሰሎም። ²⁰ 20.እን አን ድወዅሲኩም ኒትክ ተከውድኖ ክንሰሎም።እናሐን አን ደንጎቢ እዲኒዅ አኽራሲክ ዲማ እንተዲ ህንበኩን” ይኹሎም።