¹ 1.ሲመር ጃሩዅ ሽካ ደናግል ናቲዅቲዃስ አድኖ መርዓዊሪስ ከለብርድኖ ፈረውሲ ተከቲ። ² 2.ናልድ እን አንኳኻ ዐውስ፡ኣን አንኳ ደአም ለፈኩ እርግኑዅ። ³ 3.እን፡ዓወስ ቲዀስ አድኖ ደድ አድኒ። ⁴ 4.እን ለፈኩ ደአም ናቲዀዲ አቅታ ደድ አድኖ እርግኑዅ። ⁵ 5.መርዓዊራ ሺሾሰና፡ናውክ ህርግት ይኑዅእማ ገንጅኑዅ። ⁶ 6.ቂራ ነበክ እኾሰና “እናሐን መርዓዊራ እንቱዅ ጓ ከለብረሉ” ያዅ ድሪስ ዋስስቱዅ። ⁷ 7.እንሲን እን ደናግል ናውክ ከርተተፍ ይኖ ናቲዅሲ ሽኸስድኖ ተርሲኒዅ። ⁸ 8.እን ዓወስኻ እን ለፈኩሲ “ይናቲዅ ስንትሮ ፈረኲ እማ እና እንታ ደድልድ ወሸና” ይንኹለን። ⁹ 9.እን ለፈኩ ጸአም “ይነድር እንተድር አቅትና ብጊንና፡ፈርድኖ እን ክደውልድ ጅብደነን ኪዳኩክን” ይንኹለን። ¹⁰ 10.ናው ክብድኖ ፈርኖሰና፡መርዓዊራ ኣንቱዅ፡እን ደለሞ ድየውኻ ከለብርኖሉ ኒዲ እን ክኻንኹል ቱኑዅ እማ እድ አበስቱዅ። ¹¹ 11.ግጅኖሰና እን ከብተ እርጋ ደናግልኽር እንትኑዅ እማ፡ “ዎ ይና አደራ፡ዎ ይና ደራ ኲዓይብ ብዲና” ይንኹሉ። ¹² 12.እን መርዓዊራኻ “ ይእምንድክ ግን አን ያኹክን አርእሊክን” ይኹለን። ¹³ 13.እማ ኒወክትስኽር ኒ ግርገስኽር አርእድኒኒ እማ ገድም ተውሃ ሐሶሰያኩም። ¹⁴ 14.ግርዋ ደርብ ሺሽዶ አመማኹድሰና እማ ኒ ገንጂንሲ ሽጘ ኒ ገድሲ ኡዎ ባራኹድሰና ግን። ¹⁵ 15.ናትክ ናዓቅምሰነክ ላዅድ አንኳ መኪሊት፡ላዅድ ለጛ መኽሊት፡ላዅድ ላ-መክሊት ኡዎሎም ብርፍዩዅ። ¹⁶ 16.እን አንኳ መኽሊት ከለብራዅ ንርድ ንርድ ፈሮ አሪው አንኳ ከሰቡዅ። ¹⁷ 17.እን ለጛሩዅር ኒሰና አሪው ለጛ ከሰቡዅ። ¹⁸ 18.እን ላመኽሊቱዅ ደአም ፈሮ ጎቚ ግኽደ እን መክሊትሲ ኒል ትብስኹላ። ¹⁹ 19.ገሪ አመታት ደምብኻ ኣንማላ አደራ ኒማል አድሮ ዮ ናልወንተሩዅ። ²⁰ 20.እን አንኳ አዶ እርጋዃ ኒልስኲርዮ “ዎ ያደራ አንኳ መክሊት ኡሮለ እርግሩዅ፡እናሐን ኤሪው አንኳ ኲድኹንለን”ይኹሉ። ²¹ 21.እን አደራኻ “ውሃ ገንጂና ታውህ ኡቅቱትል መአኰቱዅ አኽሮ አርስራኽር ግን እማ ገሪውሊ ሰየምየካ ግን፡ፈርሐትድ ኲ አደሪዅሊ ትዊ’ ይኹሉ። ²² 22.እን ለጝሩዅር እንቱዅ እማ “ዎ ያደራ ለጛ መክሊት ኡሮለ እርግሩዅ፡እና ሐን ለጛ ኰድዅንለን” ይኹሉ። ²³ 23.እን አደራኻ “አጃና ዋሃ ገንጂና ታውህ፡እቊቱትል መአኰቱዅ አኽሮ አርስራኽር ግን እማ ገሪውሊ ሰየምየካ ግን፡ኴደራ ፈርሐትሊ ትዊ” ይኹሉ። ²⁴ 24.እን ላመክሊት አዶ እርጋኹር ስኲሩዅ እማ “ዎ ያደራ እንቲ ግርዋ ተባዅ፡ጐዲግራ ኪሽጝ አተይስራኽርዲ ከብራኽርዲ፡እንኩልኲልዳኽርዲ አኽረት አርኦ፡ ²⁵ 25.ጓቊትኹን እማ ኲመክሊትሲ ብሪል ደፈኖሉ ሰጘኩን፡እናሐኒ ኲማል” ይኹሉ። ²⁶ 26. እን አደራኻ “ነበንታ ገንጂና ሐዋን እንቲ ፈዲ ገውዲ አረሚገውዲ እክባኽር አርእርሩንሲክ፡ ²⁷ 27.ውራ ሰረፍዲውድ (ኤሪውድ) ኡግሪሉ አን ዪ ወንተር ኒልኻ እሽባአርዲድ ሻኽር ግን። ²⁸ 28.አኾ ደምቢ ላዃ ኒልድ አድኖ እንጫ ሽካ መክሊቱዅድ እወሉ፡ ²⁹ 29.ውረድ እን ሻዅ እውንስትሮኽር ኰስትሮኽር ግን።እን እንጋዅ ደአም፡እን ኒሻውስክር ባሪስድኖሉግን። ³⁰ 30.ኣንጫ ገንጂና ሐዋንስኻ እንደራ ጭልምሊ ማለሉ፡ኒልኻ ስረናዲ እርኩካ ሐርቀቅነዲ አኽሮ ግን” የኩንኩም። ³¹ 31.አዳሚንዱዅራ ኒመላእኽትድ ዓጀብሶ፡ኒሳቡርድ እንተራካክ ኒቂጦራ ሲመሩዅል ከፍይሮግን። ³² 32.ናውክ ከው እዲኒውኻ ኒጃብል እንኲልኲልስድኖ ግን።ምቃቃ በግሲ ፍንጢረልድ ዓደገሰና፡ንኽርና ገፍገስድ ሲዲሮሎም ግን። ³³ 33.በግሲ ኒ ላውል ፍንጢርስኻ ኒሸንገብል እሲሮ ግን። ³⁴ 34.እንሲን እንሲም ኒላውሊ ህንበውሲ ነዋ ይሮሎም ግን፡ “እንትን ይኽርድ ገውርስድናኽር ላዃ እርድ መሄድስጊ ተርሰ እንተድ ደለማ ሲመር ጃሩዅሲ ለዋ፡ ³⁵ 35.ውረድ ከአርቶ ቊስድንኹለ፡ስቋንቶ ጅእስድንኹለ፡ጋሺቶ ከለብርድንኹለ፡ ³⁶ 36.በሽቶ ሰስድንኹለ፡ሽዅሽቶ ዓደድንኹለ፡እንሸውሶ ገእይድንኹለ”። ³⁷ 37.እን ሻትካንኻ “ድዊይና አደራ አወካ ካአርትሮ ቊስንኹንካ ³⁸ 38.ወሪ ስቋንትሮ ጅእስንኹንካ፡አወካኻ ጋሺትሮ ከለብርንኹንካ፡ወሪይኸ በሸትሮ ስስንኹንካ፡ ³⁹ 39.አውጛ ሽዅሽትሮ ወሪ እንሸውስሮ ገእይንኹንካ ይድኖሉ ግን። ⁴⁰ 40.እንሲምኻ “እምንድክ ይየኩም እና ይሻን ግናቲትድ እስዲነኹክ ይድ እስዲነኹድሰና ግን” የኩንኩም። ⁴¹ 41.ንደምቢ ኮዶ እንሸንገብድ ህንበውሲ “እንትን ምቊል እሽትዲነኽር፡ፈራ እንደራ ስርግያ ይልድ፡እን ሰጣንዲ ኒት ተለየውዲሲ ደለሞ ህምባ ላኻ ዲማሲስ ንተጋኹል ቱዋ። ⁴² 42.ውረድ ከአርቶ ቊስድኒለ፡ስቋንቶ ጅእስድኒለ፡ ⁴³ 43.ጋሺቶ ከለብርድኒለ፡በሽቶ ሰስድኒለ፡ሽዅቶኽር እን ሸውሶኽር ገእይድኒለ”። ⁴⁴ 44.ናዋ “ድዊና ይና አደራ አውን ከአርትሮኽር፡ስቋንትሮኽር፡ጋሺትሮኽር፡ሽዅሽትሮኽር፡በሸትሮኽር፡እን ሰውስሮኽር፡ቋልኖካ ዋንትኑ ዓወንግናኽርካ” ይድኖሉ ግን። ⁴⁵ 45.ንኻ “እና ይሻን ግናቲትድ አከጝር ላሪ ትክያ ወራት እሲግድናኽር፡ይድ እሲግድናኽርሰና ግን” ይሮሎም ግን። ⁴⁶ 46.እንሲን እና ነን ምጨት ዲመሩዅል፡እንሻትካጛ ዲመር መናበረትሊ ፈርድኖ ግን።