ሊጛር ፊዃ(ፊዃ-2) ኢየሱስር ኡዃርስና ¹ እና ሰከር ግርጋትሊኻ፡ናውክ ከው ከተብስድኖ አውገስጦስ ቄሳር አወጁዅ፡ ² ኒጛ ቄሬኔዎስ ሶርዪ ሰየምሶ ዋኑ፡ኒሰልፍ አኻ ክቱብ ግን። ³ ናውክ ከዋ ከተብስድኖ ላዅክ ኒኮል ፈርኑዅ። ⁴ ዮሴፍር-ዳዊትር ፈራዕልድር አሰልድር እርግነዲን ድገ ናዝሬት ገሊለትሪትልድ፡ ⁵ ማርያም ኒ ሕጪት ጐድጉሪዲ ቤት ልሔም ይስትረሪ ድገ ዳዊትሪትል ይሁዳር ብሪል ከተብስሮ ዮ ፈሩዅ። ⁶ ኒል ዋንቱኻ ማርያም ንርአርባ ገእይነዲን፡ ⁷ ንር ባኽር ቁራ እዃርቲ።ሸለቱትድ ጣብለልዶ መስከብ ጋሻዅል አካን ብርነዲንኻ ሻንኪል ገንጂስቲሉ። ⁸ እን አካናት ገፍዳ ቂር ናማልዲ ጊትል ካው ምቃቕ እርግኑዅ። ⁹ ንሽቕ ጃሩኻ እንትንኹሎም እማ ናጃብል አንጦጥልኑዅ፡ጃር በሪህኻ ከለብኽሎም አቅትራሲክሎምኻ ጓቊትኑዅ። ¹⁰ እን ንሽቃኻ አረጋ ጓቊትጋ እናሐን ንኪ ናድክዲክ ኣካዅ ፈርሓት በሄርኮት በሸርደኩንኩም እንኩዅን ይኹሎም። ¹¹ ንኪ ዳዊትር ድገትል ላዅ ደኤንዳዅ አደራ ክርስቶስ እዃርሶኩም ህምበኲ ይኹሎም። ¹² ፈራ ቋልትኖሉ፡ኒ እላመትኻ ነዋያዅ ግን፡ሸለቱትድ ትብልሶ ህምባዅ ዓለታ፡ሻንካ ማላዅል ገንጆ ህምባዅ ኤርትኖ ግን ይኹሎም። ¹³ ንርድ ንርዳ ሃደፍድ ሺብስተገው መላእኽቲ ዓስተሩ እን መልአኽዲ ሕበርሲነ፡ ¹⁴ ዓስተርሊ ጃርድ መእኰት አኽኒ፡ብሪላ ከው ትክያ ምራድ ሻውድ ሰላም አኽኒ ዩኑ ጃርሲ ጀንጀኑዅ። ¹⁵ እን መላእኽቲ ባርኖሎም ዓስተርሊ ወንተርነሰናኻ እንምቃቕ ናሹር ናሹ “የሄው እናጃር አርእሲሶና ህምባ ወራትሲ ቋልኖ ጐና ቤትልሔም አኽታሲክ”፡ ይስትጚኒዅ። ¹⁶ አሼሽኖኻ ኒል ፈርኑዅ፡ማርያምዲ ዮሴፍዲ እንዓለታ ሻንኪል ገንጆ ህምባዅዲት ኤርኑዅ። ¹⁷ ቋልነሰነሉኻ እን ዓለቲ ሰበትድ ድውስተሎም እርገውሲ ወሪስኑዅ። ¹⁸ እን ዋሰውሎም ናውካ፡እን ምቃቅ ወሪሰናዅድሎም ፈከርስኑዅ። ¹⁹ ማርያምኻ፡እና ወራት ኒስ ንርለበኪል እንኩርዱሉ እርግቲ። ²⁰ እንምቃቕ፡እንድውስተዅድሎምር፡እንቋልናዅ ድር ጃርሲ ሐመዱኑ ወንተርኑዅ። ²¹ ኒ-ሶኾተር ግርግላ ሰመተርሱዅ።እን መልኣኽ ኒ-ገና ሐነንግሪ ድወሎም እርገሰና ኒ ሱጝሲ ኢየሱስ ይኑኹሉ። ²² እን ሙሴር፡ፍትሕሰናኻ፡ከበንናር ደኮሰናኻ፡ ²³ እን ፍትሕ ጃሩዅ “ኒውክ ኒገነር፡ካድሲ ብዳዅ በኽር ነሳዅራ ጃርድ እውስታዅ አኽኒ” ያዅ ክቱብ፡ህምባዅድ ሰና፡ ²⁴ እን ፍትሕ ጃሩዅ አደደሰና፡ለጛ ኳትራ ወሪ ለጛ ጫቊት ኳትሩ፡ሰደቀት፡እውድኖ ጃርልኽር ስኩስድኖሉ ኢየሩሳሌምትል፡አድንዅሉ። ²⁵ ኒልኻ ስምኦን፡ይስታዅ ግርዋ እርጉዅ።ኒን እስራኤልዲ ደፍኤት፡ጨበሩ ሰጛዅ መንፈስ ሻትክ ኒል፡ገሞሉ ሰጛዅ ግን። ²⁶ መሲሕ ጃሩዅሲ ቋልጊ ክረገት መንፈስ ሻትክ ጋበሉ እርጉዅ። ²⁷ መንፈስ ሻትክድ፡ትንክብሶኻ ቤተ መቅደስሊ እንቶ ዲዊዅ።ኢየሱስ ዓለተስ እን ፍትሕ፡ያኹድሰና ኒኽርዲ ኒገነዲ ኒል ናዕስነሰነሉ። ²⁸ ናልድ ኒናንትተል ከለብሮሉ፡ዎ አደራ ይዕልል እን፡ከውድ በሪህ አኾ ቋልስትሮሎም፡ ²⁹ ኩእስራኤልዲ ከውዳ፡ሳቡር አኽሮር መታን ³⁰ ይኸ ናድካ ከዋ፡ጃብልኻ ደለምድራዅ፡ደኤንዳዅሲ ኒስ ቋልነዲን፡ ³¹ እነሐን፡ናን ኩገንጂነስ ትክያዅድ፡ስብዲሉ ዮ ጃርሲ ሐመዱዅ፡ ³² ኒኽርዲ ኒገነዲኻ እን ኒ-ጋብድ ፈከርስኑዅ። ³³ እንሲን፡ስምኦን ገውሮሎምኻ ኒገና ማርያምቲ “እና ሐን ኒን፡እስራኤልትል ገሪውድ ናለብነዲ ናጉነዲ ³⁴ እን እንጠረውድሉ ሻሮት ናድዲዅአኽሮ ግን። ³⁵ ኩትኽር ገሪውድ፡ሃመት ለበካ ጋሊህስሮ ኩርሕሲ ሴፍ በጢስሮኪ ግን፡ይኹላ። ³⁶ ኮዶ ኒል ይኸ ሐና ይስትረሪ ነቢራ ፋኑኤልድቊራ፡አሴርዲ አሰልድ እኲና በህሪ ንርወክት ደኮ ህምበሪ ኢዊቲ ኒኒ፡ንርሽጉድ ክኻንስረ ንራጝዲ ለጘታ አመራ፡ካያ መንደርትቲ። ³⁷ ሰኾ ትረጝንዲ ሰጃ አመራኻ ባይኦራ፡ከብትረ ቂርዲ ገርክዲ ሹምሩኽር ጸለይሩኽር ልጝን፡ጃሩዅልድ ሲረ ግሪ፡ ³⁸ ንሪኽር ኒል ዲውረ ጃርሲ ሐመድቲ።እንደኤና፡እየሩሳሌምዱዅሲ ጨበሩ ሰጘውድ፡ጂጝስቲቲሎም። ³⁹ ኒገነዲ ኒኽርዲኻ፡እን ፍትሕ ጃር አደዳዅሲ፡እሲነኻ ገሊለትል ናዝሬት ናኮል፡ወንተሩዅ። ⁴⁰ እን ዓለታኻ ለገዱዅ ብሰር እንታኾሉኻ ተረዱ ፈሩዅ ገድ ጃሩኻ ኒአወይሲ እርጉዅ። ⁴¹ ኒገነዲ ኒኽርዲኻ ኤመራ በዓል ፋጅኺዅድ እየሩሳሌምትል፡ፈሩኑ ሰጘነኲ። ⁴² ኒኻ ሽካ ለጛ አመራ እሰሰና በዓሊ ናዲ ፈሩዅ። ⁴³ በዓል ደኮሰና ናኮልወንተሩኑ ኢየሱስ ዮሴፍዲ ኒገነዲ፡አርእግኒ ሽልቁሮ ኢዮሩሳሌምትል፡ከብቲዅ። ⁴⁴ ፈረውዲ ሕበርሰ፡ፈራዅ ተኪሲነኻ ላግርጊ ጉግ ፈርኑዅ፡ብነሰናኻሉ ናወንድስኽር ናው ኤርእነውሲኽር ወንቀርኑዅ። ⁴⁵ ብንሰነኻሉ፡ጀረቢድኖሉ እየሩሳሌምትል ወንተርኑዅ። ⁴⁶ ስዃ ኳራ ደምቢኻ ቤተ መቕደስሊ ጸሎት ልጝሊ አምራና ነበክል ከፍዮ፡ሸኑሩንሲክሎምኽር ወንቀሩንሲክሎምኽር ኤርኑዅሉ። ⁴⁷ እን ዋሱሉ፡እርገዋ ኒለበኪትነድ አከጝር ኒፈጠኖ ወንተስነድ አከጝር ፈከርስኑዅ። ⁴⁸ ኒ-ገነዲ ኒኽርዲኻ ቋልነሰነሉ ባኻኽርኑዅ፡ኒገናኻ “ድዊ ይዅራ፡ውሪዅ እና ሃብሪዅንና እነሐን፡ይዲ ኩዅርዲ ሳደድስኖ ጀረብኑካ ሐቀፍንዅን” ይቲሉ። ⁴⁹ ኒኻ “ውሪዅ ጀረብዲነለ፡እን ይኽርድ ወራትሲ እስያ አኸት አርእምብዲነ ማ” ይዅሎም። ⁵⁰ ናዋ እን ጋብኒው ፈሀምስለሎም። ⁵¹ ናዲ ወንተኦ ናዝሬትል እንቱዅ ናው ይናዅሲክሉኻ እሱ ሰጘኲ።ኒገናኻ ነስ፡ናትክ ንርለበኪል እንኩርዶሎም ሰጘቲ። ⁵² ኢየሱስ ጃርዲ ከውዲር ጃብል ለበኪትነድር በስርድር ሺርጝድር ገድድር ለገዱዅ።