ብሽራት ሉቃስሩዅ Luke ፊዃ-1 ¹ እና ይና ነበክል አኻ ጋራትሲ ገሪው ከተብድኖ ተርሲኒዅ ² አን ደአም ኒአንፍልድ ሻኾ እን ናዕልድ ቋለውዲ ቆል ንሽቅ አኽኖ ይነል ዶክሶሰና፡ ^{3 4} ዎ ሐይስ ቲዎፍሎስ እና ደኳ ግርጋትል እና ጋር ኒስ ኒትክ ኒ ሰልፍልድ ሻኾ ፈጠኖ ዋንቃሮ መመዮ ደምቢ፡እንጫ እንቲ ከለብርዶ ሻኽሮ ህምብራ ምህሮት ትክስረ አርእቶ ጣፍሕዶ ላዅ ላዅድ ከተብየልካ ትክ ያዅ አኾ ቋልስትዅለ። ⁵ ንጉስ ይሁዳሩዅ ሄሮድስር ወክትሊ አብያርዲ ፈንክልድ ዘካርያስ ይስታዅ ግርዋ ቀሺራ ሰጘኲ፡ኒ-እዂናኻ ኤልሳቤጥ ይስትረሪ አሮንድካ እንቃቕልድ እርግቲ። ⁶ ላጘካ ጃር ጃብል ኒጉግድ ፈሩኑ ላዅድ ልኽስተግኒ ሻትካን እርግኑዅ። ⁷ ደአም ኤልሳቤጥ ኩሪርዲ እርግርነዲን እዅራ እርግለሎም።ለጛካ ቅድኖ እርግኑዅ። ⁸ ዘካርያስ ተሪ ኒፈራዑዅ እርግነዲን አቅሸታ ክኒርሰና መቅደስ ጃሩዅል ትውዅ። ⁹ ጃር ጃብል ኒወራት ቀሺሪዅ እሲሮኻ ቅሻ ገእይኹሉ፡ልባነስ ትድጝድሮ። ¹⁰ እን ልባኒ ትድጝኒ ወክትላ ከው ናውክ ከደን አኽኖ ጸሎት እሱኑ እርግኑዅ። ¹¹ እንሲን እን ሰደቃቱዅድ ላው ገፍድ ንሽቃ ጃሩዅ አንጦጠላዅሲ ቋሉዅ። ¹² ዘካርያስ ቋሎሰነሉ ባኻኽሩዅር ታንቲዅር። ¹³ እን ንሽቃ ጃሩዅ “ዘካርያስ አረጊ ላሪ ጓቊትግ ኩጸሎት ዋስስቱዅ ኩእዂና ቁራ እዃርቶ ግን ኒስጝኻ ዮሓንስ ይሮ ሽጝቶሉ ግን። ¹⁴ ኒኻ ፋርሐትዲ ንግስዲ አኽሮካ ግን።ኒ እዃርስነዳ ገሪው ፋርሕድኖ ግን። ¹⁵ ውረድ ኒ-ጃር ጃብል ብሄር አኽሮ ግን ሚዲ ሸከርደውዲ ኒኾርስክ ጂእሮ አኽላ ኒገነር ካድልድ ተርሰ መንፈስ ሻትክ እንታኽሮሉ ግን። ¹⁶ ገሪውሲ እስራኤልዱርልድ ናጃርሊ ወንተስሮ ግን። ¹⁷ ኒ-ጃርድ ወጀበው ከው ደለምድሮ ይኸ እክላ ለፈክሲ ናቁርሊ ወንተስሮ ግን እን ጉሸውሲኽር ሻትካና ጉግሊ ግልጭሲሮ ኤልያስር መንፈስዲ ሒልዲሲ ኒጃብ ጃብል ገንደልዶ ግን፡ይኹሉ። ¹⁸ ዘካርያስ “አንኻ ቅዶ ህምባኽር ይእዅናኽር ንርግርጋት ደኰው እና ወራት ኒን አዋኸ አካዅን” ይኹሉ። ¹⁹ እን ንሽቃ ጃሩዅ አን እን ጃር ጃብል አንጦጠላኽር ገብርኤል መልአኽ ግን።እና ጋር ኒስ በሸርድየካ ኩል እንሸቅሶ ህንበኩን። ²⁰ እናሐን ናን እንቲ ይጋብሲ ኩ አምንና ብነድ እና አን በሸርዳዅካ ወራ አኽራሲክ ልጉም አኽቶ ግን ይኹሉ። ²¹ እን ከዋ ዘካርያስቲ ጨበሩ እርገው ቤት መቅደስ ዓንቀይሊ ኒ ሺሽነድ፡ ²² ፈከርስኑዅ።ፈሰናኻ ጋቢሮሎም ገረስላ።ቤት መቅደስሊ ላ ወራት ቋልስተትሉኻ አርእስትኹሎም።ኒኻ ናንድ ሃንተር-ተር ይኹሎም፡ለጐምሶ እርግነዲን፡ ²³ ዘካርያስ ኒተሪት፡ድጞ ኒልጝል ወንተሩዅ። ²⁴ እንሰከር፡ግርጋትሊኻ ኤልሳቤጥ ሐነንቲ። ²⁵ ጃር ቋሉኹለ፡ከዋ ጃብል ስማሱለ ሰጛ ዑረትሲ፡ናሃበ ይልድ ሺሽዳኹለ ይሩንሲካ አንኳ አርበስ ትብትቲ፡ ²⁶ ኒ-ወልተር አርቢላ፡ንሽቃ ጃሩዅ ገብሪኤል ጃርድ እንሸቕሶ፡ ²⁷ ናዝሬት ይስትረሪ ላድገ ግሊላትሪትል ዓንቂ ድንግሊ ግርዋ ዮሴፍ ይስታዅ ዳዊትካ ፈራዕልድ ሐጨይስረሪትል እንትዅ፡እን ዓንቂኻ ንርሱጝ ማርያም ግን። ²⁸ ንርትል እንቶኻ “ገድ እንተኸረሪ ደባንማ፡ጃር ኩዲ ግን፡እንቲ እኲነልድ ገውርስራኽር ግን”ይኹላ። ²⁹ ንርኻ ቋልደሰነክሉ፡እን ኒጋብድ በኸኽርቲ፡እና ደባንማ ይና፡ኒን ውራ አኽሮ ፈራዅ ግን ይሮኻ፡ገሪ ሀመትል ትውቲ። ³⁰ እን ንሽቃኻ አረጊ ማርያም፡እንቲ ጃር ጃብል ገድ አርዱዅ እማ፡ጓቊትግ፡ ³¹ እንሕን ሐነንቶ ግን፡ቊራኽር እዃርቶ ግን፡ኒስጛ ኢየሱስ ይቶሉ ግን። ³² ኒ-በሄር፡አኽሮ ግን፡ክብያዅድ፡ዅራ ይስትሮ ግን፡ጃርኻ ኒኽር ዳዊትር ቂጦረስ እውሮሉ፡ግን። ³³ ያዕቆብር፡ፈራዕሊኻ ዲመስ ሰየምስሮ ግን።ኒ-ሕክም ግንዲ እንግጋዅ አኽሮ ግን። ³⁴ ማርያም እን ንሽቀስ አን ድንግሊ ግን፡አርአ ግርዋ ሻኽሊ፡እና ወራት ኒን አዋኸ ግን ኒአኽና ይቲሉ። ³⁵ እን ንሽቃ ጃሩዅ መንፈስ ሻትክ ኲአወይሲ ገምሮ ግን፡ሒል እን ክብያዅዱዃ ሻሚስሮኪ ግን፡እን ኩልድ እዃርሳዅኽር ሻትክ ጃር ዅራ ይስትሮ ግን። ³⁶ እናሐን “ኲወንዳ፡ኤልሳቤጥር ኩሪርዲ ይስትሩ ሰጝረሪ ንር ገኒትሊ ቁራ ሐነንዶ፡ንር ወልተር አርባ ግን። ³⁷ ውረድ፡ጃርድ ላሪ ቢስታዅሉ እላ ዮ ወንተሱዅላ። ³⁸ ማርያማ “እናሐን፡አን ጃር ገንጂና ኲጋበርሰና አኽን ይት፡ይቲሉ እንሲን እን ንሽቃ ጃሩኹ ንርትልድ ፈሩዅ። ^{39 40 41} ማርያም ኤልሳቤጥትል ገእይቶላ ፈርቲ 39.እንሰከር ግርጋትሊኻ ማርያም ኤሸሽሮ መቃጥን እሮቱውድ ይሮ ላድገ ይሁዳትሪትል ተረገስቲ። 40.ዘካርያስ ልጝሊ ቱሮኻ ኤልሳቤጥቲ ሰላም ይቲላ። 41.ኤልሳቤጥ ማርያምር፡ሰላምተስ ዋስረሶና እን ዓለታ ንር ጐድጉል፡ፈርሐትድ ባንጉሩዅ።እንሲን ኤልሳቤጥቲ መንፈስ ሻትክ እንተዅዅላ። ⁴² ጋብሲ ክብስረ እንቲ ኡኲነልድ ገውርስራኽር ግን፡ኲካድ ሕኖትር ገውርሳዅ ግን፡ ⁴³ ያደሪ ገና ገእይቶለ እንተርደሪ ኒን ኤዊልድ እንተረለ ብሶት ኒን። ⁴⁴ እነሐን፡ቋሊ፡ኩጋባ ሰላሙዅ፡ይ እጝቁዊል ዋስስተሰና እን ዓለት ይካድሊ ንግስድ በረጅዅ። ⁴⁵ እን ጃርድ ድውስተኪ ጋባ አከት እምንዳኽር እንቲ ሻትኪ ግን ይቲላ። ⁴⁶ ማርያማ ይፊዅቲ ጃርሲ ጀንጀነቲ። ⁴⁷ ኒ-ገንጂነር ምእኺርሲ ቋልነዲንኻ፡ይርሒ፡ይኽር ጃር ይት፡ደኤንዳዅድ፡ነገስቲ። ⁴⁸ እናሐን፡እን ሒለቱዅ ይል በሄርኮት ወራት እሲነዲን ⁴⁹ ንደምብክ ናውክ አሰል ገድሪ ይድኖለ ግን፡ኒ ሱጝ ሻትክ ግን። ⁵⁰ ኒ ብሕልታኻ፡እን ጓቊተውድሉ ናአሰል አሶል አኽሮ ግን። ⁵¹ ኒ-ኒክርሽምድ ኒ-ሒልሲ ቋሊሱኽ፡አውኒ ግን፡ይኮት የውሲ ናለፈካ ሀመትሲ ፈተታሕ ሲዅሎም። ⁵² ሒለቱሲ ናቂቶታልድ፡ገለበድዅሎም፡ምእክራንሲኻ ክብ ሲዅሎም። ⁵³ ድቡራንሲ ኒገውረድ ብትስዅሎም፡ገዱስኻ ናንካያ ፈስዅሎም። ⁵⁴ እን ይእክልድ አብርሀምዲ ኒአሰልዲት ዲመሲ፡ሳዲሶሎም እርጋዅድሰና። ⁵⁵ ኒ ብሕልተሲ ኤልብድነዲን፡እስራኤል፡ኒ-ገንሺነስ እልልዅሉ፡ይቲ። ⁵⁶ ማርያም ንርድ ሰዃ አርባ እስረ ንርልጝል ወንተርቲ። ዮሓንስር ኡዃርስና ⁵⁷ ኤልሳቤጥ፡ንር-አርባ ገእየሰና ቁራ ኡዃርቲ፡ ⁵⁸ ንርአግዋርዲ ንርወንድዲኻ፡ጃር ገሪዅ ሰኸንተትላ ዋስነሰና፡ንርዲ ፈርሕኑዅ። ⁵⁹ ኒ-ሰኾተር፡ኳሪልኻ ዓለተስ ሰመተርድኖ እንትኑዅ፡ኒኽርድ ስጙድ ዘካርያስ ይኖ ሽጝድኖሉ ጀረቢኒዅ። ⁶⁰ ኒገናኻ ኢፋልኩም ኒሱጝ የሐንስ ይስትሮ ግን፡ይቲሎም። ⁶¹ ናዋ ኲወንድልድ ሱጝ፡ኒስ ሻዅ ላዅ እላ ይኑዅላ። ⁶² ንኽርስኽር አውኒ ዮ ሽጝሮሉ ጀረበት፡ሸረትድ፡ወንቀርንኹሉ። ⁶³ ኒኻ ኒል ከተባዅ ካና ሐምላ ናኻለዮ “ዮሓንስ ግን ኒሱጝ” ዮ-ከተቡዅ ናውካ ፈከርስኑዅ። ⁶⁴ ንርድ፡ንርዳ ኒ-ላንቂ እንክስትዅሉ፡ጃርሲ ገሪዅ ሐመዱዅ። ⁶⁵ ና-አግዋርሊኻ ጓቊ ትውኹሎም፡ኒልክ ይሁደር እሮሪሊኻ ኒድ ወሪስቱዅ። ⁶⁶ ሒል ጃሩዅ፡እን ዓለታዲ እርግነዲን፡ነስ፡ዋሰውክ እና፡ዓለታ ውራ አኽሮ ግን ዩኑ ናለፈከል እንኩርኩሩኑ እርግኑዅ። ⁶⁷ ኒኽር ደካርያስቲኻ መንፈስ ሻትክ እንታኾሉ ናዋዮ ጃርሲ መኤኰትዱዅ። ⁶⁸ ጃር እስራኤልዲ አደራ ኒ ከውሲ፡ገእያዅር እልላዅር ገውርስኒ ⁶⁹ ኒ-ሻትካነ፡ነቢታት ኤብድ፡እማና ጋበ እርጋዅድ ሰና፡ ⁷⁰ እን ይነት እንጠረውድ ናንተልድ፡እና ሙቁሉናር ጀረበውልድር ናድከልድ፡ ⁷¹ ደኤንድሮና ኒ-ሳዲሰና እርጋሰና ይና ከውሲ፡ይኸብሕል፡ይሮልና እን ይናኽር አብርሃምሲ፡ሸራዅድ፡ ⁷² ይነት እንጠረውድ ናንተልድ ደኤኖ፡ላሪ ጓቊትግኒ፡ ⁷³ ሸተክነድር በከትነድር፡ ⁷⁴ ዲማ ይና፡መናብረትሊ ትክያዅድ እንሸቅስኖሉ፡ ⁷⁵ ኒ-ንሽቃ ዳዊትር ልጝልድ ደኤንዳዅ ጉዅና። ⁷⁶ እንትኽር እና ዓለታ ኒ-ከውድ ናዓገብሲ ብሕልታ፡አርድኖ ኤርእሲስቶሎም፡ ⁷⁷ ኒ-ጉግሲ ጠፍሕድቶ ጃር ጃብል ፈርቶ ግን እማ ነቢ እንክብያዅድ፡ዅራ ይስትቶ ግን፡ ⁷⁸ ይና ልኩክሲ ጉግ ጣፍሕዳዲስሮና እንጭልምልኽር ክሪ፡ሻማ ዓንቀይሊ አኾ ህምበውስኽር በርህድሮሎም። ⁷⁹ ጃር ኒ ሰኸንትነድኽር ኒብሕልተድር፡ዓስተርልድ ኳሪሰና በርሆ ገእይሮና ግን፡ዮ ተምብሁዅ። ⁸⁰ እን ዓለታኻ ለገዱኽር መንፈስድ ተረዱኽር ሰጘኲእን እስራኤልትል ቋልስተሉ ግርግል፡አኽታሲክ አው ከደንሊ መንደርቱ ሰጘኲ።