1 1.እን ግርጋ እንድሂትል ታለይቱት በጀኽነሰና፡እን አይሁድር እንጠሪ እን ነብራ በኒኹድ ግርጊል ናመብልዳንሲ ሸሊስኖ እርግኑኹ እማ፡እን እብራውያንዱ ጉሪምሪም ይኑኹ። 2 2.እንሲ ሽካ ለጛ ናዉኹ ታለይቱትሲ ኣክብኖ ይኒን ቆል ጃሩኹሲ ባርኖ መአዲሪል ከደምኖ ዋጅብ ኣኽላ። 3 3.እማ ገደም እንትን ይና ሻን እንተልድ ትክያኹድ መስከርሳኹሎም፡መንፈስዲ ጥበብዲ እንተኸው ለጛታ ግርዋ ፍሪራ፡እና ጋር ኒስኻ ሸኺስንሎም። 4 4.ይንኻ ጸሎትዲ ኣገልግሎትዲ እና ቆል ንዲት በኾርድግኒን ሻኽንን ይንኹሎም። 5 5.እና ጋብ ነን ናውክ እንከውሲ ባህ ይኹሎም፡እን እምንዲ መንፈስ ሻትክዲ እንተኻኹሉ ግርወስ እስቲፋኖስዲ ፍሊጶስዲ ኒቃኖርዲ ጢሞንዲ ጰርሜናስዲ እን ጵሮሴሊትዲ ኒቆላዎስ ኣንጾክያርኹዲት ፍሪርኑኹ። 6 6.ታለይቱት ጃብልኻ ደውሲኒኹሎም፡ጸሎት እሱኑኻ ናናንትሲ ገምድንኹሎም። 7 7.ቆል ጃሩኹ ኮዶ ፋሕዩኹ፡ሺብ እን ታለይቱትኹኻ መራ በጀኹፈሩኽ።ገሪዉ እን ካህናተልድኽር እን እምነትሲ አዘዝትኑኹ። 8 8.እስቲፋኖስኻ ገዲ ሖልዲ እንተኹሉ እርጉኹ እማ እንከዋ ነበክል በህሊን አምርዲ ተአምራዲ እሱ እርጉኹ። 9 9.ሊበር ጢኖን ይስትረሪ ልጝን ጸሎቱኹልድ ቄሬኔዎስትል እስክንድርያትልድ ቂልቅያንትልድ ኤስየትልድኻ እስቲፋኖስትል ጉኑኹሉ፡ተኸራኸሩኑሉኻ እርግኑኹ። 10 10.እኒጋቡሉ እርጋ ጥበብዲ መንፈስዲትኻ ተማጐትድኖሉ ገረስትለሎምኒ። 11 11.እንሲንኻ ይን ሙሴዲ ጃርዲትል ቆል ጀኸኒኹ ጋቡ ዋስንኹንሉ የው ኮው ደላብብኑኹ። 12 12.እክዲ በህሊንዲ ካትባንዲት ረበሽኑኹ፡እንትኖኻ መንተልኖ ዲቢል አድንኹሉ እማ፡ 13 14 13-14.እና ግርዋ ኒን የሱስ እን ናዝረትሩኹ እና ኣካን ንሂቲ ፋሕሲየላ እን ሙሴ እዋኹሲና ስርዓትሲኻ ቀየርየሉግን ዩንጒሲ ዋስኖሎ ህምብናኩን እማ፡እና ሻትኪ ኣካኒ ንሂዲ ፍትሕዲት ቆል ጀኸኑኹ ጋብኒልድ በታተን ፊኹላ የው ምስክር ቡጙት ጉድንኹሉ። 15 15.እንዲቢል ኮፍይኖ እርገው ናውክኻ መርኪስንኹሉ እማ ኒገሽ መልኣኹኽ ገሽ ኣኰ ቋልስትኹሎም።