ፊኳ -5

1 1.ሃናንያ ይስታኹ ግርዋ ሰጲራ ይስትረሪ ኒእኲነዲ ኒብረስ ክዶ 2 2.እን ኒኣረኺልድኻ ኒእዂነዲ መቅርሖ በነ ከቢኹ፣እን ላበነስኻ ሃዋርያትል ልኩ ገቢል ገምድኹሉ። 3 3.ጴጥሮስኻ ድዊ ሃናንያ መንፈስ ሸትክሲ ብጚቶ እን ኪድጝ አረኺልድኻ በንዴ ከቢቶ ውሪኹ ሰጣን ኩለበከ እንታኹንሉ። 4 4.ክስትጊኽር ኩኹ እርግላማ ክስተሰናኻ ኩናንተል እርግለማ እዋህበኻ ና ሓሳብ ኒስ ኩለበከድ ሓሰብርኹንሉ፡ጃርሲ ግራ ኣዳምቲ ብጚትላ ይኹሉ። 5 5.ሃናንያ ና ቆል ኒስ ዋሰሰና ለቡኹ፡ኒርሕኽር ፊኹ።እን ኒስ ዋሰው ናዉክኻ ገሪኻኡ ጒኢትኑኹ። 6 6.ኣባጢሕ ጉድኖኻ ገነድንኹሉ፡ምኹርኖ ፍድኖኻ ደቢኒኹሉ። 7 7.ኣኹኽኻ ኒደንቢ ሰዃ ሰዓት ደንቢ ኒእኲና ኣኻኹሲ ደለይድግሪ ቱቲ። 8 8.እንከ ድዊለ እንተብረስ እና ነስከውድማ ክድንኹንሉ ዮ ወንተስኹላ፡ንርኻ የዋ ነስከውድ ግን ይቲ። 9 9. ጴጥሮስኻ አወይድኖኻ መንፈስ ጃሩኹሲ ፈተንትኖ ተሰማምዕድኑኹን፡ልኩክ እን ኩራኑስ ደበው እናሐናው ጭምል ህምበናኹ ኩትኽር ፍድኖኪ ግን ይኹላ። 10 10.ኒድኒድ ኒልኩክ ዓንቀይሊ ለብቲ እማ ንርሒ ፊቲ፡እን አባጢሕ ቱነሰና ኽርዶ ዲቲሎም።ምኹርኖ ፍድኖኻ ንራን ገቢል ደቢኒኹላ። 11 11. እን ማሕበርሊ ህንበውክ ናልድ እና ጋር ኒስ ዋሰውሊ ናድከል ገሪ ጒኢ አኹኽ። 12 12.ሃዋርያታ ናትትድኻ ገሪው እን ከዋ ነበክል እስቲኹ፡ናዉክኻ ላለበከድ ላገስሽ ኣኽኖ ሰለሙንር ጭምድሊ እርግኑኹ። 13 13.እን ኣሪውልድ ሓጥሮ ሕበርሰኹሎም እላኒ፡እን ከውኻ ሓሸምዱኑሎም እርድኑኹ። 14 14.ኪዳኹድ ድኳ ገሪው ግርውዲ እኲንዲ አደረድ እምነው ኰስቱኑሎም እርግኑኹ። 15 15.ጴጥሮስ ደኩንጉሲ ኒሻና ላውሊ ገምርል መታን ይኖ እን ሽኹሽታኹሲ ዓራዲ ባሬለዲትል እሲነ ምኹርንኖ ዲቢል ፍዱኑሎም እርግኑኹ። 16 16.ዮርሳሌምር ከባቢሪል ህምበው ዕርዲታተልድኻ ገሪዉ እክብስኖ ፈሩኑ እርግኑኹ፡ሽኹሽተውዲ እኩያን መጃኒንድ ሳቀይሰውዲኻ ናቅስኑኹ፡ናውክኻ እቢርኑኹ። 17 17.እንሲን እን ከዳ ኣዋኲ እንኒዲ እርገው ናትክዲ ኣኾ ናውኻ ሻራ ሸዱቃውያንዱግን ቀንኤትድ እንተኽትኖ ጉኑኹ። 18 18.ናናትት ጠለቅኖ ሃዋርያትሲ ሸኽንኹሎም፡ማሕቡስ ኣዋኹሊ ቱስንኹሎም። 19 20 19-20.መልኣኽ ጃሩኹ እድ ማሕቡስኹሲ ብዶ ከደን ፍዶ፡ ፈራ ልጝል መቅደሱኽሊ ደውይድኖ እና ኒትክ ቆል ፊኹትኹሲ ከውድ ድዋ ይኹሎም። 21 21.ኒስ ዋስነሰና ብርክስጚል ንጝን መቅደሱኹል ቱኖ መሄርድኑኹ፡እን ከዳ ኣወኹዲ እን ኒዲ እርገውዲኻ እንትኑኹ፡እንዲባዲ በህሪን እስራኤልድቁርዲ እክብስድኖ ሽጝኑኹ፡ማሕቡስልድ ናቅስድኖሎምኻ እንሸቅኑኹ። 22 23 22-23.እን ገንሺንኻ እንትኖሰና ማሕቡስሊ ኣርኒሎምኒ፡ወንተርኖ እን ማሕቡስ ልጝን ኣበስቶ ኒትክድ ተቦ ኣበስተት፡ እንተከወንቲኻ ጭምድሊ ደውይኖ ዲኒኹና ብድኖሰነክሉ ኒጅዊል ላኹ ድኳ አርኒ ይኖ ድዊኒኹሉ። 24 24.እን ሓለቃ ተከወንቲ መቅደስኹዲ ኣምራንዲ ከዳታትዲ እና ጋር ኒስ ዋስነሰና ውራ ቶክ ኣኽራ ኒን ይኖ ናሰበትድ የነውክ ድድኹሎም። 25 25.ላኹ እንቶኻ እን ልጝ ማሕቡስኹል ቱስድነው ከውታ እናሓናው ልጝል መቅደሱኹል ደውይኖ ከውሲ መሄርደናኹ እንኩኑኹ ይኖ ድዊኒኹሎም። 26 26.እንሲን እንሲም ልጝል መቅደሱኹ ተከወንቲሩኹ ኒገንጂስዲ ፈሮ ናቅስኹሎም፡እን ከው ክርጝ ማልኖ ኩጒኒንሎ ጓቂትኖኻ አጋፊዕኒሎም። 27 28 27-28.ናዕስነሰነክሎም እን ዲባ ነበክል ደውሲኒኹሎም፡ኤሊ ከዳ ኣዋኹኻ እና ስጙ ንድ መሄርድግ ድኒን መረርድኖ ጋቢንመኩም፡እናሓንኻ ዮርሳለምቲ እታ ሚህሮሲ እምታኽድኑኹላ።ብር እንግርዋ እንድዱኹሲ ይና እኰርሊ ናዕስትኖማ ጀረብደናኩን እንኩድንኹን ዮ ወንቀርኹሎም። 29 29.ጴጥሮስዲ ሃዋርያዲኻ አዳምትልድ ጃርሲ አዘዝትና ግን ወጀባኹ፡ 30 30.እን እንትን ካኒል ከርከርድድኖ ኩዱናኹሉ የሱስ፡ይና ክላ ጃር ጉድኹሉ። 31 31.እስራኤልቲ ነስሕስትነዲ ባርና ጂቢኹዲ ኣኽሮር መታን ጃር ኒት ኣዀርዲ ደአንደንታዲ ሀቤ ኒላውል ክብሲኹሉ። 32 32.ይንኮዶ እና ጋር ነኒስ ምስከርግን፡ጃር ኒድ ኣዘዝተውሲ እዋኹሎም መንፈስ ሸትክኽር ምስክር ግን ይኖ ወንተስንኹሎም። 33 33.ኒስ ዋስነሰና እን ኣሕሉቅ ኩድኖሎም የመምኑኹ፡ 34 34.ኣኽን ግራ ላኹ እን ናትካ ከወልድ ክቡር ክንሱራ ፍቲሒኹ ገማሊኤል ይስታኹ ፈሪሳዊራ እንዲቢል ጌ ሃዋርያትሲ ላዶን ስርግ ሲድኖሎም ኣዘዝኹሎም። 35 35.ይኹሎምኻ ይሀው ከው እስራኤልዱ እና ከውኔል እሲትኖ ሓሰብድኖ ህምብደናኹሊ ጠንቀቅሰሉ፡ 36 36.እና ግርጋት ነድ ጃብሊ ታዲዎስ ኣን ብሀር ግን ዮ ጒኹ፡ሰጃ ሊኽ እከው ከውኻ ተለይኑኹ ኒ ድዱኹ እንተለየዉሉ ከውኽር ፋሕይኑኹ እርግግነሰናኻ ኣኽኑኹ። 37 37.ኒደንቢ ይሁዳ ገሊለሩኹ እን ግርጋ ክቱብ ግብርድኹድ ጒኹ፡ገሪው ከውኻ ሰሓዱኹ ንኽር ድዱኹ፡እን ኣዘዝተውሉ ናዉክኽር ፋሕይኑኹ። 38 39 38-39.ናንኻ እና መዃኹና ንዲ እና ክድመት ንዲ ከወልድ ኣከን ፋሕይሮግን ጃርልድ ኣከንኻ ናክድመትሲ ፋሕሲትኖሉ ገረስደኒ እማ ጃርዲ ዋኺትዱኑ ኣርስግድኒንታ እና ከው ነስ ባረሎም ገለ ይገሎም ድወኩንኩም እንኩኹን። 40 40.አጃኻሲስኹሎም፡ሃዋርይትሲ ሽጝኖ ከትከትንኹሎም፡ሱጝ የሱስርኹድ ጋበግኒ ኣዘዝኖ ባርንኹሎም። 41 41.ናውኻ ኒሱጝ መታን ጀረብድኖ ኣስተሃለው ኣኽኖ ሺብስትነዲ እንዲባ ጃብልድ ፈርሑኑ ፍኑኹ። 42 42. ልጝን መቅደሱኹሊኽር ልጝ ሺባኽር ብሽራት የሱስ ክርስቶስሩኩ መሀርድነዲ ሰበክነዲ በዀርዱኑ እርግኒ።