1 - 2 እንትጝ እንከልሰው እና ናን ከተበሪልኩም ይሊጘሪ ጀዋብ ግን፡ሰልፍ ሻትካን ነብያትድ ይስታኹ ቆልዲ እን ሃዋርያት እንተውድር ይና-ኣደራ እየሱስ ክርስቶስ ደኤንዱራ አርድናኹሉ ትእዛዝሲ እሲትኖ መታን ዮ፡ለጘርዲሲክ እልብዱኩም እን ገሪ እንታ ሓሳብ እንታኹሲ ነቅሕዳኹኑ እንኩኹን። 3 እን ደምበር ግርጋትል ናፊኹት እንከለሰና ወንተተርው፡ቓበበውር ቃበቢሰውዲ ከም ዋንቲነት ኒድክ ጃብ ኒስ አርኣ። 4 ናውኻ ፡ሳዳ ኒእንተርኒኹ ደአም ኣዊል ህንበኹን፡እን ይና እክል ገንጅናኹ ግርጋትልድ እን ሰልፍ ኸልቀትልድ ሸኾ ኒውክ እን እርጋኹሰና ግን ኒ-ህምባኹ ይድኖ ግን። 5 ሰማ እኒ እማና ወክትልድ ቆል ጃሩኹድ ከም ዋንተት፡ ብራኽር ዓቕዲ ዓቕልድ ኣክረት ኒስ እንከልኖ ምኺረነኩሉ እንኩኑኹ። 6 እማና እርግረሪ እዲና ኒድ እን ዓቕድ ከም ሸረብስሮ ድድረት። 7 እና ናን ህንባኹ ብረዲ ሰመዲ ኒ ቆልድ ደውዮ ህምባኹ፡እን ግርጋ ፍርዱኹ ኮዶ ድዳ እን ጃርሲ ጒኢተገው ከው ላኸድ ተከውሳኹ እንኩኹ። 8 ገድም እንትጝ ይሻን እንከልሰው፡ጃርሊ ላኳራ ስሕ አመራ ሰና፡ስሕ አመራኽር ላኳራሰና ከም ኣከት እና ላሪ ጋር ኒኒ ከውሊትግሪንኩም። 9 ይና አደራታ ናውክ ነስሕስትኒል ወንተርፍኖ ግራ ላኹ ድኳ ድድሮ ጀረበጋኹ ሰበት ኣኸውድ፡እንታ መታን ሰበር እሳኹ እንኩኹ ግራ እን በልጝሰና ሺሻኹ ተካኹሎም ኒሰና ሺሻላኒ። 10 ይና-ኣደራ ግርጋ መላኪን ስዋነሰና ኣኽሮ እንትቶ ግን፡ንርድ ሰማትት ጠዋዕዋዕ ዩንሲክ ደኩሮ ግን፡መሀድ ሰሚኹ ረሰነድ መኸኽሮ ግን፡እን ብረዲ ንርትል ህምባኹ ኒውክ ሓው ይሮ ግን። 11 - 12 እማ ገድም ኒን ኒውክ ሲራኹ ኣኾ ደምቢ፡ኒመታን ሰማታት ለኸድ ሸኪሮ ሲራኹ፡መሀድ ሰሚኹ ረሰነድ ሸኪራኹሉ፡እን እንተርና ይና-አደሪኹ ጨበርዱኑ፡ኣሸሽድዱኑ ሻትካን እራኲድ ጃር ጒእትነድ አወየው ኣኽትኖ ግን ተገበኣኹኩም። 13 ይን መላኪን እን ኒ-ሳዲሰና ጫድቕ መንደርታኹሉ ሓዲስ ሰማታትዲ ሓዲስ ብረዲ ጨበርነኩን እንኩንኹን። 14 እማ ገድም እንትን ኣን እንከለውኩም፡ኒስ ጨበርዱኑሲክ፡ኣከጃህ እንገትር ገለ ሙቅላ እንገት ሰላምድ ኒጃብሊ አርስትኖ ተጋደላ። 15 እን እንከልሳኹ ይና ዳን ጳውሎስ፡እን እውስታኹሰነሉ አርእጝ ኒ-ጸሓፍኹልኩም፡እን ሰብር ይናደሪኹሲ እንታ ዴአነድ ኮሸረሉ። 16 ኒ እን ኒልክ ኒ-ጀዋብሊ እና ጋር ንድ ሰበት ጋቡ፡ኒል ኣስተብሀልድነድ ጨገምደው ገሪ ጋር ህምባኹ።እን አእምሮ እንግገውዲ ተበገውዲ፡እን ኤሪው ክቱባንሰና ድዳ ናሹሩኹድ ጨወየናኹሉ እንኩኑኹ። 17 ገድም እንትጝ ኣን እንከለውኩም፡ኒስ ጃቢቶ አርእዱኑሉ እን ከትና እን ኣከይ ደርብ ፈረውድ ወተርስድኖ እንታ ተብኒልድ ለብግድኒን ተከውሳ። 18 ይናደረዲ ደአንዱረዲ እየሱስ ክርስቶስር አርእጝዲ ገዲሲ ለገድንን።ኒድ ናጝር ዲማ ዳይምር ክብር አኽኒት፡ኣሜን።