ፊዃ 2

1 መላኪን ነብያት ብንዱ እን ቆም ነበክል ጉኖ እርጉኑኹ እማ፡ኒሰናኽር እንተነበክል ክንሱት ብጙ ጉድኖ ግን፡ናኣኾርሊ አሸሻኹ ድዳ ናቅሱኑ፡እን ጅበኹሎም ኣደረስ ድኳ ከሓድኖሉ ግን፡ናው ድዲኹ በስጝትና ሽሉቑ ሲነ ቱስድኖ ግን። 2 ገሪው ኮዶ ና-ርኽሰዲ ተለይድኖሉ ግን፡ናሰበትድ እን ደርብ እምንዱኹ ጀኽስቲሮ ግን። 3 ቀውሕስትነዲ ጋብ ምለውድ ሃቢነ ሸቀጢሰና ሃቢድኖኩም ግን፡ናፍርዲ እን ሰልፍ ሰልፍልድ ፊዃላኒ ናድዳ ኮዶ ገንጀላ። 4 ጃር እን ሓራም መላእክቲስ ድኳ እን ገሀናፍሳትሊ ማሎ ስልስልድ ጭልምሊ እንሸውስኖ ፍርድድ ተከውስድኖ ደክሶ እውኹሎም ግራ በርእጋኹሎም። 5 እን ሰልፍሪት እድንየት በርእጋ ደምቢ፡እን ሓራሙድ እድንያ ዓቕ ኣይሂ ገምዶሰና፡ኖህ ጫድቂ ሰበካኹ ሰኾተር ኒኣኾርዲክ ተከውኹሉ። 6 እን ደምብን እንተረው ዓመጨውድ ሰክሕደት እሲኹለን፡እን ዕርዲራታትሲ ሰዶምዲ ጎሞራዲት ባሪህ እሲኹን ገለበድስድኖ ኮዶ ፈረድኹለን። 7 እን ናዓመጭነዲ ረኸሳ ናእራኩዲሲ ሳቀዩ እርጋኹ ሎጥቲ ደአንዱኹሉ። 8 እን ጫድቕ ናነበክል መንደርቱ፡ክሰረድ ክሰራ ና ምቁላ ወኣራት ቋሉ እራጋኹዲ ዋሱ እርጋኹዲ ፡እን ጫድቒ ኒርሒ ሳቀይሩ እርግቲ። 9 እማ ገድም ኣደራ እን ጃር ጒኢተውሲ ፈተኒልድ ደአንድሮሎም፡እን ዓመጭ ከደመውሲ ኮዶ ቀጽዑንሲክ እን ግርጋ ፍርዲሩኹ ኣኽራሲክ ከም ተከወትሎም አርእሲሰኩ እንኩኹ። 10 ኒድክ አወይሲ እን ሩኹስ ስኻ ወራት ጉርበት ፈረው፡ኤርደድሲ ቃበበው፡ደፈራን፡ናሹቲ እንከለው፡ከበረውሲ ጀኺድኖ ፈጥፈጠገው። 11 ሻትካን ድዃ ሒልዲ ምልክዲሲ ኪደው ኣኩኑንሲክ፡ይና ኣደራ ጃብል ናት ተጣረራኹ ጀኸን ኣኽን ፍርዲ ናቅሰኒኒ። 12 ነን መላኪን፡እን ንሽወዲ ድደዲሲ መሀድስረሪ ቢህመት ሐዋንሰና ግን፡እን አርእግናኹሲ ጀኹኑ ናድደድ ድድኖ ግን። 13 ርዝቅ ና ዓመጭኒኹ አርድኖ ግን።እን ገርጊኹ ሓንቀቕነስ ታሚታኹሰና ሃቢነ ቛለናኹሉ እንኩኑኹ፡ረኸሰውዲ ስማሰውዲ ግናው፡ናምለነድ ቁኑንሲክ እንተዲ እን መኤዲሪል ቓነኩ እንኩኑኹ። 14 ቓሓብና እንታኽታኹ እን ሓራምልድ ደውየገው ዕልል ህንበኩሎም፡እን ተብገው ፊኹትሲ ምልልጛነኩ፡ቀውሓት ክንተኹ ለበካ ህንበኩሎም፡እሸና ቑር ግናው። 15 እን ጣፊሕ ደርብሲ ባርኖ ከቲኒኹ፡እን ደርብ ዓመጭኒኹ እንከላኹ በልኣም ባሶር ድኹረስ ተለይኑኹ። 16 እን ኒ-ኣበሳ ሰበትድኻ ቅጽዓት ከለብሩኹ፡እን ብሂመት ድዃራ ጨዓንሰሪራ ደሄይ ኣዳምሩኹድ ጋቢቲ፡እን ሻማ ነቢሩኹሲ ገበብቲ። 17 ናውኻ ዓቅ እንጋኹ አፍፍ ደሃፈት ከሎሉ ህንበኹ ብኳናኽር ግን፡ናስኻ ግብ ያኹ ጭልም ደለሞሎም ህንበኩ ዲመሲ። 18 ግምሽ ጋብ ትዕቢቱኹ ጋቡኑንሲክ፡ስኻ እንከሊዲ ርኽሰትዲ እን መንደርተውልድ ከለለው እግሪ ፈውሲ ምለነኩ እንኩኑኹ። 19 ለተቕሳኹ ኣዳም እን ለተቕዳኹድሉ ኒገንጂና ኣከኹሉ እማ ናሹቲ ገንሺን ድዲው ኣኩኑ፡ናጻ ፍትኖ ግን ዩኑ ሳዲሰነኩሎም እንኩኑኹ። 20 አርእጝ ይናደራ እየሱስ ክርስቶስርኹድ እና ረኸስረሪ እድንየትልድ ፍኖ፡ሓዲስድ ንርድ ዓብለልስኖ ቂልስተነን፡እን ና-ጃበሪልድ እን ናደምበራ ጂባኹ ኣካኹ። 21 ማለት፡ናው አርኡኑሉ እን እውስታኹልድሎም ሻትክ ትእዛዝልድ ደንቢራ ወንተርነውድ፡እን ደርብ ጭድቒሩኹሲ አርእግነንሉ ኪድርድ። 22 እን መሰል እምኑኹሰና፡ግድጝ ን-ፍዲሰውሊ ወንተሩኹ፡ካንዚራ እንቃርዶ ጭቂል አንገርገርቲ ይስታኹሰና ገእይኹሎም።