¹ - ² እንትን እኲን፡ገለ እን ቆልሲ ኣዘዝተገው ዋንተነን፡እን ጒ ህባኹሉ እንታ ወንተተርነስ ቋልነሪ፡ቆል እንገት ናእኲና ወንተተርነድ ነፍዕስተውሰና ኣኺነ አርስድኖ መታን፡ኒሰና እንተ ግርውድ ሓከምሰሎም። ³ - ⁴ እንታ ከሸራ እን ትብታንድ እን ለበከ ኣዳምሩኹዲ ጃር ጃብልኽር ከበራኹ፡ራሕመትዲ፡ሃዲእ መንፈስ ኣኽኒ ግራ፡እን ገደልሳኹ ኣኾር፡እን ከደምሳኹ ሰርጎ ደሃቡኹ እንሸውና፡ሰራን ሰርዶ ጋፈሽትና ኣኽጊኒ። ⁵ ሰልፍኻ እን ሳድ ናኹሲ ጃርሊ እሰው ሻትካን እኲን ናግርውሲ አዘዝሱኑ ነወያ ደርብድ ግን ናው ሰርገይስናኹ። ⁶ ሳራ ኣብራሃምሪ ያደራ ይሮ ኣዘዝትራኹሰና፡እንትጝር እስደነን፡ላኹ በኻኽዳኹ ጋርድ ጒኢተግደነን፡እንትጝር ንርቚር ግን። ⁷ እንትን ግርው፡ ጠሎት እንታኹ ገበብትጒ፡ሓያማን መሀዲሰና፡እንቲ ለውተው ገድ ርሒኹ ሃብዲነ ከበርድዱኑለን፡ኒሰና እንታ እኲንዲ ኣእምሮሲ መንደርታ። ⁸ እን ኣኽርሊኻ ናኾርክ ላሓሳብነድ፡ራሓምስጘው፡ሻናር እንከለው፡በኸኸንቲ፡ለተቅየው ኣኻ፡ ⁹ ገውራ ለውትኖ መታን ሽጝስትድናኽር ግን እማ፡ገውራ ግራ ምቑላ ምቑላ ኣብሊ ወሪ ጀኸን ጀኸን ኣብሊ ወንተስጋ። ^{10 11 12} ዕልል ጃሩ ጫድቃንሊ ግን ናው መኸልተው፡ኒ-እንቚቚ ኮዶ ና-ጠሎትሊግን፡ገሽ ጃርኹ እን ምቁል እስውሲ ተጣረራኹሎም እማ፡እን ርሕ እንከላኹ ኪዳ ግርጋት ቋልዶ ጀረባኩ፡ኒ-ላንቀስ ምቅሊልድ፡ኒ-ከናፍርሲ እከይ ጋቢጊን ገበብኒ።ምቁሊልድ ስርግ ይን፡ኮዶ ኪሰሪ እሲን፡ሳልምቲ ጀረቢንላኽር ታከይንላኽር። ¹³ ኪሰሪ መታን ተዓብደነን ኣውኒ ግን እከይ እሰኹኩም? ¹⁴ ጭድቂ መታን ድኳ ይድኖ ጅርበትዲ ሕልፈትዲ ብደነን ብጹኣን ግን።እን ጒኢሰውልድ ጓቒትጋኽር በኻኽርጋኽር። ¹⁵ ይናደራ እየሱስ ክርስቶስቲ እንታ ለበከድ ቀደሰሉ ግራ፡እን እንተል ህንብረሪ ሳዳ ምስምሳ ወንቀረውሲኩም ወንተስትኖ ዲማ ደለመው ኣኻ፡መላኪን ዓቅልዲ ጒኢሲ ኣኽኒ። ¹⁶ - ¹⁷ ፍቓድ ጃሩኹ ንሰና ጀረብደን፡እከይ እስዱ ኣኽጊ ኪሰሪ እስዱኑ ጅርበት ብደነን ኪደኩኩም እማ እን ክርስቶስድ ኣኻኹ ኪዳ እንታ ፈርሲ ጀኸውኩዲ ልኸውኩምዲ ስማርድኖ መታን፡ኪዳ ቀልብ ዋንቲንኩም። ¹⁸ ክርስቶስ ኮዶ ጀርሊ ስኩስሮና ዮ ኒ እን ጫድቅ እን ዓመጨውድ ላዶን ሓራም መታን ክሩኹ፡ስኸድ ክሩኹ፡መንፈስድ ኮዶ ህምባኹ ኣኹኹ። ¹⁹ ኒድ ፈሮ እን ስጅንሊ መንደርተው መናፍስቲት ሰበኩኹሎም፡ ²⁰ ሰብር ጃሩኹ ግርጋት ኖህሩ ጨበርደሰና እን ዶናክ ከደምስሩኒሲክ፡ንርድ ከለለው ማለት ሰኾታ ፊኹት ዓቑድ ደአንኹ፡እን ሰልፍ እምንገውሲ ሰበኹኹሎም። ²¹ እን ኣቑ ኮዶ ናን ተምሳለትድ ማለት ጥምቀት ደኤንዳኹኩም እንኩኹ፡ኒንኻ ጉና እየሱስ ክርስቶስሩኹድ ሺዋን ኪዳ ቀልብ ጃርሊ ግራ እንቃርና ዓማቅ ስኺኹድ ኣኽላ። ²² ኒ-ሰሚል ዓረጎ ጃር ላውሊ ህንበክ፡ኒት መላእክትዲ ስልጣናትዲ ሒል ሸኽንኹን የውዲ ሓከምሰናኹሉ።