¹ ጴጥሮስ ሃዋርያ የሱስ ክርስቶስሩኹ፡እን ጶንጦስትል፡ጋላትያትል፡ቀጶዶቅያዲ ኢስየዲ ቢታንያዲትል ፋሕ ዮ ህንበው ፍሪርሰው። ² እን አርእን ሰልፍድ ይና እኽር ጃሩኹ፡ቅድስና መንፈስድ ኣዘዝስና፡ብር እየሱስ ክርስቶስሩ ነጸግነድ፡ገድዲ ሰላምዲ እንተል በጀኽን። ³ - ⁴ እን ደኮጋኹዲ ረኸሳጋኹዲ ጠማለልሰጋኹዲ እን ሰሚል እክብሶኩም ህምባኹ ለውስታኹ፡እን የሱስ ክርስቶስር ጉና ክሪልድ ገሪ ምሕረትድ፡ዲማ ዳይም ሳደድ ሓዲስድ እዃራኹና ጃር፡እኽር ይናደራ የሱስ ክርስቶስሩኹ ሓመድስኒ። ⁵ እንትን ሒል ጃሩኹድ እምነትድ እን ደምበር ወክት ገለጽስሮ ደለሞ ህምባኹ ደአነድ ተከውስድኖ ህምብደናኹ። ⁶ - ⁷ እን ፈተንስና እንተ እምነትኹ ገሀስና እየሱስ ክርስቶስሩኹ ሓመስነድ፡ክብርድ ለኸድ መረጨሳኹ ደኳኹ ደሀብልድ ገሪኹ ከበሮ አርስሮር መታን ፡ናን ገሪ ናትናቱ ፈተናታትድ ጎሀይድኖ ደምቢ፡ኒድ ፈርሕትኖ ግን። ⁸ - ⁹ እና ቋልግድኒሉ እንከልደናኹሉ፡ናጝር ቋልግድኒሉ ኒድ እምንደናኹ እን ድጞንታ እና እመነቱ ንኮዶ ደአና እንታ ፊኹቱሲ አርድነሰና፡ድውስተጋኹ ክብርዲ ፈርሓዲሲ ፈርሕትኖ ግን። ¹⁰ እን እንተ ሰበትድ መደብሳ ገድ መታን ተነበየው ነብያት፡እና ደአና ንድ ሰበትድ ጀረቢኒኹር መርመርኑኹር፡ ¹¹ እና ናል እርጋኹ መንፈስ ክርስቶስሩኹ፡እን ስቃይ ክርስቶስሩኹ እን ኒጉርበትሊ ህንባኹ ክብርድ ጃቢሶ መስከረት፡አውን ወሪ አወያ ወክትሲ ቋሊሰት መርመርኑኹ። ¹² እንተድ ግራ ናሹቲ ከም ኣገልገልድግነት በርህኹሎም።ኒጝር እን ሰመሊድ እንሻቕሳኹ መንፈስ ሻትክድ እሲነ ወንጌል ሰበክነትኩ ናን ድውስቲኹኩም፡መላእኽቲ ኒል መርኪስድኖ በሃገናኩ። ¹³ እማ ገድም የውትት እንታ ለበኪውሲ ደበልትድኖ ጠንቀቕስዱኑ፡እን የሱስ ክርስቶስር ገሀድስነድ አረርደናኹሉ ገድድ ገሪ ሳዳ እሳ። ¹⁴ እን ኣዘዝሰው እቑርሰና ግራ፡እን ወክት ዓወድናሩኹድ ዋንትዱኑ እስዲነ ወራትሲ እሰጋ። ¹⁵ - ¹⁶ ኣን ሻትክ ግን እማ ንትጝር ሻትካን ኣኻ ያኹ ክቱብ ዋነውድ፡እማ እን ሽጛኹኩም ሻትክ ኣኸውድ እንትጝር ኒውክ እንታ እራኩድ ሻትካን ኣኻ። ¹⁷ እን ኣኻኹሲክ ኣኽን ገሽ ቋልና እንገት እን ኒወራትሰና ፈረዳኹ፡እንትጝር አቤ ይድኖ ሽጝደናኽርሉ ኣኽድነውድ፡እና ወክት እንታ ጋሺትኒኹሊ ጒኢሲ መንደርታ። ¹⁸ - ¹⁹ እን እንታ እክልድ ከለብርድናኽሉ ሳክት እራኩድ፡እን ብር እን ኣበር ረኸስና እንግጋኹ በጋ ፡እን ክቡር ብር ክርስቶስሩውድ ግራ፡ድዳኹ ሰንዓተድ፡ወርከድ ወሪ ደሃብድ ከም ደአንግድነት አርእድኑኹ። ²⁰ ኒ እድንጛ ተርይግሪ መደብሱኽ፡እን ኣኽርሊ ኻ እንታ መታን በርህኹ። ²¹ እንትናዲ እንታ እምነዲ እንታ ሳደዲ ጃርሊ አኽሮ መታን፡እን ክሪልድ ጉዳኹሉ ኮዶ ክብር እዋኹሉ ጃርድ እምንድኑኹ። ²² - ²³ ዋንተኹ ዲማ ዳይም መንደርታኹ ቆል ጃሩኹ፡እን ድዳጋኹ ፈድንልድ ግራ እን ድዳኹ ፈደንልድ ኣኽድኒ ሓዲስድ እኻርስድናኽር፡እምንሲ ኣዘዝስዱኑ፡ምልልጝና እንግግረሪ እንከሊ ሻንኹድ እንተ ርሕሲ ለጭሕዳ፡ጫሪ ለበከድ እኺርኺርሲ እምንድ እንከልስጛ። ²⁴ ኒውክ ስኻ እን ሻንክሰና ግን፡ኒውክ ክብርኽር ዕምባባ ሻንኪውሰና ግን።እን ሻንኪ ኢዳኹ እን ዕምባባ ኮዶ ከፍከፍሳኹ። ²⁵ ቆል ጃሩኹ ዲማ መንደርታኹ፡እን ድውስተኹኩም ቆል ብሽራቱኹ ኒን ግን።