7

¹ يا خبره ، انتوا تعرفوا القانون ، لأنه لازم عتفهموا كلامي ، إن القانون ما يمشيش على الانسان وهو حي وبس ² مثلا المره المزوجه يربطها القانون بالرجال اذا هو حي ، لكن لوما يموت الزوج توقع حره ³ وان تزوجت برجال ثاني وزوجها عاده حي فهي زانيه ، لكن لو مات زوجها توقع حره بالقانون ، حتى لو تزوجت رجال ثاني ما توقعش زانيه

⁴ وكذيه انتوا يا خبره ، قد متو عن الشريعه بجسم المسيح لأخر ، الى اللي قام من بين الأموات ونفعل افعال نافعه لله ⁵ وحين كنا نعيش حياة الجسم ، كانت النفس الخبيثه اللي حركتها الشريعه تعمل في اعضائنا على ميد تتجهز للموت ⁶ ولكن ذلحينه قد تحررنا من الشريعه ، لأننا متنا من كل شي يقيدنا ، حتى نعبدالله في نظام الروح الجديد ، مش في نظام الحروف القديمه ⁷ فأيش نقول يعني؟ هل توقع الشريعه ذنب؟ ماشي ، ولكني ماعرفتش الذنب إلا بالشريعه ، فيعني لو ماقالتش الشريعه :(لا تشته) ماكنتش بدرا ايش هي الشهوه ⁸ لكن الذنوب لقت فرصه على ميد تفعل تيه الوصيه ، وطلعت كل أنواع الشهوة ، لأن الذنوب هي بلا قوة إذا مابش هاناك شريعه ⁹ وانا قبل ما اعرف الشريعه كنت حي ، لكن لوما جتني الوصيه بدأت الذنوب تبدي ¹⁰ فالوصيه اللي اساس للحياه ، شلتني انا للموت ¹¹ لأن الذنوب شلت من الوصيه طريق ، وغدرتني بها وقتلتني ¹² الشريعه يعني صالحه ، والوصيه والكل صالحه وعادله وطاهره

¹³ يعني هل الحاجات الصالحه هي سبب موتي؟ ماشي ، ولكن الذنوب فعلت لموتي على ميد يبدي ذنب ، وحملتها على الوصيه لوما توصل اكثر شي في الذنوب ¹⁴ واحنا دارين ان الشريعه روحيه ، أما انا بشر وعبد للذنوب ¹⁵ مشنا داري ايش افعل ، لأني ما افعلش اللي اشتيه واللي اكرهه بين افعله ¹⁶ ولوما افعل اللي اشتيه ، اوافق الشريعه انها على حق ¹⁷ وما اوقعش انا اللي افعل شي ما اشتيه ، ولكن الذنوب اللي تسكن فيني ¹⁸ انا داري مابش فيني اي شي سابر ، اقصد طبيعتي لأني اشتي افعل فعل الخير ، لكن مشنا ساطي اني افعله ¹⁹ فالخير اللي اشتيه مابين اعمله ، والشر اللي ما اشتيه بين افعله ²⁰ واذا كنت افعل اللي ما اشتيه فمشو انا اللي يفعله ، لكن الذنوب اللي ساكنه فيني

²¹ وتيه هي القاعده اللي لقيتها :(لوما اشتي افعل الخير ، بين القى اللي استر عليه هو الشر ²² ففي داخل نفسي افرح بشريعة الله ²³ ولكني بحس بشريعه ثانيه في جسمي تقاوم الشريعه اللي يقراها عقلي وتخليني اسير لشريعة الذنوب اللي هي في أعضائي ²⁴ ما اضيقني من ينجيني من ذيه الجسم اللي مصيره الموت؟ ²⁵ شكرا لله لأن سيدنا يسوع المسيح هو المنجي

انا بالعقل تابع لشريعة الله وبالجسم لشريعة الذنوب