6

¹ وايش نقول؟ هل نزيد نواصل في الذنوب على ميد تزيد نعمة الله؟ ² ماشي ، احنا قد متنا عن الذنوب كيف نرجع نعيش بينها؟ ³ مش انتوا دارين اننا تغطسنا على ميد نتوحد بيسوع المسيح ، تغطسنا على ميد نموت معه؟ ⁴ وذيه يعني اننا في الغطاس قد متنا معه واندفنا معه والكل ، وايحين مايقوم المسيح من الموت بقدرة الله وجلاله ، احنا والكل توقع لنا حياة جديده

⁵ واحنا اتحدنا في الموت ، يعني متنا ساع ما مات هو ولازم نتحد معه في القيامه ⁶ واحنا دارين ان الانسان القديم فينا صلب مع المسيح لوما تسير الذنوب ومانبقاش عبيد لها ⁷ لأن من مات قد تحرر من الذنوب

⁸ ولأننا متنا مع المسيح يعني احنا مؤمنين ان احنا عنعيش سوا ⁹ لأننا دارين ان المسيح قام من الموت وانه ما عيموتش مره ثانيه ، لأن الموت ماعبش له امر عليه ¹⁰ لأنه لوما مات ، مات على ميد الذنب مره واحده بس ، ولكن ذلحينه الحياه هي في سبيل الله

¹¹ وانتو والكل افعلوا ساعه انكم ميتين من الذنب ، احياء في سبيل الله لأنكم مع المسيح يسوع سيدنا ¹² على ميد ذيه لاتسمحوش لذنوب انها تزيد عليكم في جسمكم المنتهي ، وتسيروا بعد شهواتكم ¹³ ولاتخلوش اعضاء جسمكم سلاح على ميد الذنوب ، ولكن اقعوا لله احياء قاموا من بين الأموات ، وخلوا أعضائكم سلاح للخير في سبيل الله ¹⁴ وبذيه ما يوقعش للذنوب كلمه عليكم ، لأنكم مش انتوا في حكم الشريعه ولكن في نعمة الله ¹⁵ وبعدا ايش؟ عنغلط على ميد احنا في حكم النعمة مش احنا في حكم الشريعه؟ ماشي ¹⁶ مش انتوا دارين انكم لو خليتوا نفسكم لأحد لخدمته وطاعته ، فأنتوا توقعوا عبيد له ، اما الذنوب اللي تشلكم للموت او الطاعه اللي تشلكم للبر ¹⁷ ولكن نشكر الله ، لأن انتو من زمان عبيد للذنوب ، ومن قلوبكم بتطيعوا تيك التعاليم اللي تسلمتموها ¹⁸ وذلحينه تحررتوا من الذنوب ، ووقعتوا عبيد الصلاح

¹⁹ وتعبيري ذيه آدمي على ميد ضعفكم الآدمي ، وساع ما خليتوا من اعضائكم عبيد للناس والذنوب ، كمان ذلحينه تخلوهن عبيد للصلاح في خدمة القداسه ²⁰ وحين كنتوا عبيد للذنوب ، ماكنتوش مقيدين بعمل الصلاح ^{21 22} أما ذلحين انتوا محررين من الذنوب ووقعتوا عبيد الله ، والنتيجه هي الحياة السابره ، وبعدا حياة الخلود ²³ لأن أجرة الذنوب هي الموت ، ولكن الهديه اللي يديها الله هي حياة الخلود من طريق المسيح يسوع سيدنا