1

¹ من بولس عبد المسيح يسوع ، دعاه الله عسب يوقع رسول ، واختاره عسب يعلن بشارته ² اللي سبق وعد بها على لسان انبيائه في الكتب المقدسه ³ عن ابنه المسيح مولانا ، وهو كأنسان ولد من نسل داود ⁴ ولكنه بالروح القدس ، ثبت انه ابن الله وذيه بقيامته من الموت ⁵ وانه بواسطة يسوع المسيح وعسب اسمه ، وقع لي نعمه عسب اوقع رسول لأدعي الناس من كل الشعوب إلى الطاعه والإيمان ⁶ وانتوا والكل منهم ، دعاكم الله عسب توقعوا ليسوع المسيح

⁷ وانا اكتب لكم انتوا كلكم اللي في روما ، اللي يحبكم الله ودعاكم عسب توقعوا شعبه الخاص ، عليكم النعمه والسلام من الله أبينا ومن يسوع المسيح مولانا

⁸ اول شي أشكر ربي بيسوع المسيح عسبكم كلكم ، لأن ايمانكم العالم كله بيتحاكا عليه ⁹ والله اللي بين اخدمه بروحي ، وابشر بأنجيل ابنه يشهد لي اني بذكركم واصل ¹⁰ واسأل الله في صلواتي ان يتيسر لي اني اسير صليكم

¹¹ فانا مشتاق ان ابسركم عسب اشارككم في بركه روحيه اديها لكم عسب تقويكم ¹² عشان نشجع بعضنا البعض وانا عندكم ، بالايمان المشترك بيناتنا ¹³ وما اخبيش عليكم يا اخوتي ، اني حاولت خيرات عسب اجي صليكم عسب ابسر ثمرة خدمتي عندكم والكل ، ساع ما اثمرت بين الكل

¹⁴ لأن معي واجب على كل الشعوب المتحضره واللي مش متحضره ، المثقفه والجاهله سواء ¹⁵ وعسب ذيه اشتي ابشركم والكل انتوا اللي في روما ¹⁶ وانا ما استحيش بأنجيل المسيح ، لأنها القوه اللي بيستخدمها الله عسب ينجي كل من يؤمن ، يهودي كان او غير يهودي ¹⁷ لأن فيه أعلن الله في تيه الرساله كيف يعتبرنا صالحين ، وذيه بالايمان في الاول والاخير ، ساع مايقو الكتاب :(الصالح بالايمان يحيا) ¹⁸ ان غضب الله معلن في السماء على كل ما يفعله الناس من شر وفساد ، اللي بفسادهم بيغطوا الحق ¹⁹ لأن كل اللي يستروا البشر انهم يدروا به عن الله هو واضح لهم ، لأن الله وضحه لهم ²⁰ فمن يوم ما خلق الله العالم فإن صفات الله اللي ماتبسرهاش العين ، يعني قوته الأبدية وطبيعته الإلهيه ، هي ظاهره قوي وتعرفها العقول عن طريق مخلوقاته ، يعني هولا الناس هم بلا عذر

²¹ عرفوا الله فما مجدوه ولا شكروه ، وعادهم تلخبطوا بعقولهم ، وأظلم عقلهم الغبي ²² قالوا انهم حكماء وهم هبل ²³ وبدل من جلال الله الدايم بيعبدوا التماثيل الي مصنوعه على شكل الانسان المنتهي والطيور والحيوانات والزواحف

²⁴ عسب ذيه خلاهم الله لشهوات قلوبهم عسب يفعلوا النجاسه ، وهانوا اجسامهم بعضهم لبعض ²⁵ لأنهم فعلوا الباطل بدل الحق ، واتقوا وعبدوا المخلوق بدل من الخالق ، تبارك وتعالى للأبد ، آمين

²⁶ وعسب ذيه خلاهم الله لشهوات مش حاليه ، لأن نسوانهم بدلين العلاقه الجنسيه الطبيعية بممارسات مش طبيعية ²⁷ وكمان الرجال ، فلتوا العلاقات الجنسية الطبيعية مع النسوان ووقعت فيهم الشهوه لبعضهم البعض ، وفعلوا الفاحشه رجال مع رجال ، وبذيه ادوا لنفسهم العقاب من فسقهم

²⁸ ولأنهم مارضيوش انهم يعرفوا الله ، فالله تركهم لعقولهم الخاربه عسب يفعلوا اللي ما يصلحش ²⁹ وامتلوا بأنواع الشر والخطأ والفسق ، وامتلوا بالحسد والحقد والقتل والخصام والسوء ، نمامين ³⁰ يكرهون الله سبابين متكبرين ، يعملوا الشر وما يطيعوش الله ³¹ بلا فهم ولا شرف ولا حنان ولا رحمه ³² ومع انهم يعرفوا ان الله حكم بالموت على من يفعل مثل تيه الحاجات ، فهم ما يفلتوش فعلها ، وعادهم راضين على من يفعلها