2

¹ عسب ذيه مابش عذر لأي حد ، ياللي تدين الثانين وتفعل افعالهم ، لأنك لوما تدينهم انت بتدين نفسك الكل ² واحنا دارين ان الله يدين بالعدل من يفعل مثل تيه الأعمال ³ وانت ياللي بتحكم على البقيه وتفعل افعالهم ، قصدك انك تهرب من عقاب الله ⁴ او انك بتتساهل لطفه العظيم وصبره وتحمله؟ مش انت داري ان القصد من لطف هو ان يبزك للتوبه؟

⁵ ولكنك عنيد راسك يابس وقلبك قاسي ، وانت بتخزن لنفسك عقاب اقوى يحل عليك يوم يعلن الله غضبه وعقابه العادل ⁶ ويجازي كل واحد بأفعاله ⁷ يا إما بالحياه الأبديه للي بيداوموا على العمل الصالح وسعوا للمجد والكرامه والبقاء ⁸ وإما بغضبه وسخطه على اللي يتمردوا ويرفضوا الحق ويسيروا مع الباطل ⁹ ويا ويله وله العذاب كل انسان يفعل الشر من اليهود اول شي وبعدا من اليونانيين ¹⁰ والمجد والكرامه والسلام لكل من يفعل خير ، لليهود وبعدا لغير اليهود ¹¹ لأن الله مايتحيزش لحد

¹² فاللي اخطوا وهم بغير شريعة موسى ، لأن بغير شريعة موسى عيهلكوا ، واللي غلطوا ولهم شريعة موسى بشريعة موسى يتحاسبوا ¹³ ومش من قد سمع تلاوة الشريعه هو اللي يعتبر صالح عند الله ، ولكن من يطيع الشريعه كلها ¹⁴ وغير ايهود مابش معاهم شريعة موسى ، ولكن عملوا بالفطره اللي تأمر به الشريعه ، فهولا اللي مابش عندهم الشريعه يوقعوا شريعة لأنفسهم ¹⁵ وذيه يبين ان ما تقول به الشريعه موجود في قلوبهم ، وضميرهم يحاكيهم به ، وافكارهم تقلهم ايحين ما فعلوا الغلط وايحين ما يفعلوا الصح ¹⁶ وعيبدي ذيه كله ساع ما ابشركم به ، يوم يحكم الله بالمسيح يسوع ¹⁷ وذلحينه تسمي نفسك يهودي وتتكل على الشريعة وتفتخر بالله ¹⁸ انت داري بالشريعة وعسب ذيه تفهم مشيئة الله ، وتدرا بالفرق بين الحق والباطل ¹⁹ وقصدك انك قايد للعميان ونور لمن هم بين الظلام ²⁰ ومؤدب للهبل ومعلم للجهله ، وانك وصلت في الشريعه لمعرفة كل شي ²¹ انت ياللي بتعلم غيرك ، ليش ماتعلم نفسك؟ تصيح : لاتسرقش ، وتسرق انت؟ ²² وتقول : لاتزنوش ، وتزني انت؟ انت تكره الأصنام وتنهب بيت الله؟ ²³ تتفاخر بالشريعه وتهين الله بعصيان شريعته؟ ²⁴ لأن الكتاب يقول :(بسببكم انتوا يا يهود يكفر الأجانب بأسم الله تعالى)

²⁵ فلو كنت تفعل بأوامر الشريعه ، يوقع لختانك قيمة ، أما لو كنت تخالف الشريعه فختانك مابش له معنى ²⁶ وإذا كان غير المختونين يوبهوا لأحكام الشريعه ، مش عيعتبرهم الله في حكم المختونين؟ ²⁷ ومن فعل بالشريعه وهو مشو مختون مش يحكم عليك انت اليهودي اللي يخالف الشريعه وله كتابها والختان؟

²⁸ لأن اليهودي الصدقي مشو اليهودي الظاهر ، والختان هو غير علامه خارجيه في الجسم ²⁹ ولكن اليهودي الحقيقي هو اليهودي في القلب ، والختان الحقيقي هو ختان القلب ، يعني الختان الروحي مش الحرفي ، وذيه الادمي يمكن ما يمدحوه الناس ، لكن الله يمدحه