¹ وبعد هاذا أبسرت ملاك ثاني نازل من السماء ، ومعه سلطة عظيمة ، وضوا بهأه الأرض .. ² وصيح بصوت عالي : سقطت ! سقطت بابل العظيمة ! وقد وقعت وكر للشيطاين ، ومأوى لكل روح شرير، ولكل طاير نجس ومكروه .. ³ لأن الأمم كلها شربت من خمر فسقها وشرها ، وملوك الأرض زنو معاها وتجار الأرض غنيو من كثر نعيمها ⁴ وبعدها سمعت صوت ثاني من السماء بيقول : أخرجو منها يا شعبي علميد لا تشتركو في ذنوبها ، وتجي عليكم مصايبها .. ⁵ لأنهو قد أمتلت ذنوبها لاما وصلت لا السماء ، وما نسيش الله جرايمها .. ⁶ أفعلو بها سعما فعلت بكم ، مابلا ضاعفو لها جزاء مافعلت ، والكاس اللي مزتها أسقوها منها لنصيب أثنين ⁷ وعذبوها وغثوها بقدر ماعظمت نفسها وتنعمت لأنها بتقول في نفسها : أنا جالسة ملكة وماشنا مرملة وما بين أطعمش الزعل دايمآ . ⁸ وعلميد هاذا تجي عليها المصايب في يوم واحد ، الموت والزعل والجوع وبتحترق بالنار ، لأن الله اللي حكم عليها هو المولى القدي ⁹ عيبكي عليها ويندبها ملوك الأرض اللي زنو معها وتنعمو معها ، حين كانو بيبسرو دخان حريقها .. ¹⁰ وموقفين بعيد خوف من عذابها وبيقولو : الويل ! الويل لك يالمدينة العظيمة ! يا بابل القوية ، في ساعة واحدة وحل فيك العقاب ! ¹¹ وعيبكي عليها وعيندبها تجار الأرض ، لأن بضاعتهم ما عيشتريها أحد .. ¹² بضاعة من ذهب وفضة وحجر كريم ولؤلؤ ، وكتان وأرجوان وحرير وقرمز ، وعطور متنوعة ، ومصنوعات من العاج والخشب الغالي ، ونحاس وحديد ورخام ، .. ¹³ وقرفة وتوابل ، وبخور ومر ولبان ، وخمر وزيت ، ودقيق وحب ، وبهايم وغنم وحيل وعربيات ، وناس بأجسامهم ونفوسهم ¹⁴ وبيقولو : ضاع منك الثمر اللي بتشتهيه نفسك ، وكل الغنى والنعيم وسار عنك وما عتلقيه .. ¹⁵ والتجار اللي كانو بيبيعو هاذه الأشياء وأغتنو من هاذه المدينة وعيوقفو بعيد خوف من عذابها ، وبيبكو ويندبون .. ¹⁶ وبيقولو : الويل ! الويل لك يالمدينة العظيمة ! وهي اللي كانت بتلبس الكتان والأرجوان والقرمز وبتتحلى بالذهب والحجر الكريم واللؤلؤ ¹⁷ وفي ساعة واحدة ضاع كل هاذا الغنى .. وكل قادة السفن والركاب والبحارة ، وكل اللي بيترزقو من البحر ، وعيوقفو بعيد ¹⁸ وبيشاهدو دخان حريقها وبيصيحو : وأي مدينة ساع هاذه المدينة العظيمة ! .. ¹⁹ وبيرجمو التراب فوق رؤسهم وبيبكو وبيصيحو وبيصرخو : الويل ! الويل لك يالمدينة العظيمة ! وهي اللي من ثروتها أغتنى أصحاب سفن البحر كلهم . في ساعة واحدة وخربت ²⁰ وسبي فيها ياسماء، وأفرحو ياصالحين ويالرسل والأنبياء لأن الله عاقبها على مافعلت بكم ²¹ وأكل ملاك قوي حجر سعما حجر طاحون ضخم ، ورجمه في البحر وقال : بهاذا العنف عترجم مدينة بابل العظيمة وما عتتوجدش من بعد هاذا .. ²² وما عيسمعش فيك غنا ولا موسيقى ، ولا قيثارة ولا مزمار ولا بوق . وما عيوجدش فيك صانع أيا كانت حرفته . وما عيسمعش فيك صوت الطاحون ²³ وماعيضويش فيك نور ومصباح ، وما عيسمعش فيك صوت حريو أو حريوة . وكان تجارك هم عظماء الدنيا ، وسحرك قاد كل الأمم لا الضلال ²⁴ وفي هاذه المدينة بيوجد دم الأنبياء والصالحين ، وكل من قتل على الأرض ..