4

¹ يا اخوتي الاحبة ، انا مشتاق لكم قوي، انتو فرحتي! انتو اكليلي! لازم تثبتو في المسيح يا احبابي.

² اطلب من سالمة ومن سعيدة، ان توقعو على اتفاق سوا ساعما لازم على المؤمنين. ³ وانت والكل يا صاحبي الوفي، اشتي منك تساعد هذولا الثنتين النسوان لانهن ساعديني في خدمة الانجيل مع كليمنت وكل الباقين اللي خدمو معي، اللي اسمائهم مكتوبة في كتاب ⁴ الحياة.افرحو بالمسح واصل، واقولها مرة ثانية: افرحو. ⁵ عاملو الكل بإحسان . المسيح قريب. ⁶ لا تقلقوش من شي، انما اطلبو كل شي من الله في الصلاة، بخشوع وشكر. ⁷ وسلام الله الذي بيملي فهم كل البشر، بيحرس قلوبكم وعقولكم بواسطة المسيح عيسى. ⁸ اخيرا يا اخوتي، فكرو دايما في كل ماهو حق وشريف، وكل ماهو صالح وطاهر، وكل ماهو محبوب وله سمعة حالية، وفي اي شي طيب ويستاهل المدح. ⁹ افعلو بحسب كل الامور اللي علمتكم فيها ، وحاكيتكم عليها، وسمعتوها مني، وابسرتوني بين افعلها. الله الذي بيدي السلام بايكون معاكم. ¹⁰ قد ملاني المسيح بالفرحة لانكم الان، طول هذا الوقت ، بينتو اهتمامكم فيني مرة ثانية. انتو مافلتونيش، لكن ما اتوفرتش لكم الفرصة على ميد تعبرو على هذا. ¹¹ مابين اقولش هذا لاني محتاج شي، فقد اتعلمت اني ارضى بحالي. ¹² انا داري كيف اعيش في ضيق او في خير. قد تعلت هذا السر: ان اوقع مقتنع ايش ما كانت الاحوال او الضروف، سوا كنت شابع او جاوع، سوا كنت متيسر او محتاج . ¹³ انا اقدر على كل شي بالمسيح اللي بيقويني. ¹⁴ لكن انتو فعلتو خير لانكم شاركتو في متاعبي. ¹⁵ وانتو يا شعب فليبي، انتو داريين اني لما فلت مقدونيا ، في بداية الدعوة بالانجيل بينكم، كنتو انتو الجماعة الوحيده اللي ساعدتني واهتمت بحساب الداخل والخارج. ¹⁶ حتى لما دورت مساعادة وانا في تسالونكي ، رسلتو لي اكثر من مرة. ¹⁷ انا مابين ادورش هديتكم، انما بين ادور لكم الربح اللي بيزيده الله لحسابكم. ¹⁸ فقد وقع لي كل اللي احتجت له وازيد. معي كفايتي لاني استلمت الهدايا اللي اداها ابو فريد من عندكم. هي ساع قربان لله حالي الشم، وضحية يقبلها ويرضى فيها . ¹⁹ ربي عيديلكم كل اللي تحتاجو له بحسب غناة العظيم قوي بواسطة المسيح عيسى. ²⁰ الجلال لربنا وابونا لا ابد الآبدين. آمين . ²¹ سلمو على كل مؤمن بالمسيح عيسى. الاخوة اللي معي بيسلمو عليكم. ²² كل المؤمنين هانا وخاصة اللي في قصر الملك، بيسلمو عليكم. ²³ نعمة عيسى المسيح مولانا مع روحكم.