¹ اخيرآ يا اخوتي، افرحو بالمسيح. انا شا اعيد اللي قلتة لكم من قبل، هذا مابيتعبنيش، انما في امان لكم. ² بيقرح قلبي من الكلاب، بيقرح قلبي من عمال الشر، بيقرح قلبي من اللي بيصممو ان يقطعو جزء من الجسم! ³ لان احنا ختنا الختان الحق، واحنا بنعبد بروح الله، وبنفتخر بالمسيح عيسى، ولا بنتوكل على امتيازات بشرية. ⁴ ان كان بة احد بيظن ان معه الحق ان يتوكل على امتيازات بشرية، فمن حقي الاولى ان افعل هذا. ⁵ فقد ختنت لما كان عمري 8 ايام، وانا من بني اسرائيل، من قبيلة بنيمين، عبراني ابن عبرانيين، متعصب للشريعة ساع فريسي، ⁶ ومن قوة غيرتي لاحقت امة المسيح، ومن جهة الصلاح الذي بتطلبة الشريعة، كنت بدون عيب. ⁷ لكن هذي الامور اللي كنت اعتبرها انها مهمة، هي ذلحين في حسابي بدون قيمة على ميد المسيح. ⁸ انما ازيد من هذا، كل الحاجات هذي في حسابي بدون قيمة بالمقارنة مع عظمة معرفة المسيح عيسى مولاي. فأنا على ميدة خسرت كل هذي الحاجات، وهي في حسابي ساع القمامة، وهذا على ميد اكسب المسيح، ⁹ وانتمي لة، ويعتبرني الله صالح بالايمان. مش صلاحي على ميد اني فعلت بفرايض الشريعة، انما الصلاح اللي هو بالايمان بالمسيح. ¹⁰ اشتي اعرف المسيح ، واختبرة قوة قيامتة، واشاركة في الامة، واوقع ساعة في موتة، ¹¹ على ميد اقوم من الموت وارجع للحياة. ¹² انا مابين اقولش اني وصلت لا كل هذا، او وصلت الكمال. انما بين اسعى على ميد افوز بالجايزة اللي على ميدها بزني المسيح. ¹³ يا اخوتي انا مابين اعتبرش اني قد بزيتها للان، لكن انا بين افعل هذي الامور بس: انسى اللي ورايا، واجهد كل طاقتي صلا ماهو قدامي . ¹⁴ انا بين اسعى صلا الهدف على ميد افوز بالجايزة، يعني الحياة السماوية اللي دعاني الله لها بواسطة المسيح عيسى. ¹⁵ كل البالغين روحيا لازم يفكرو بهذي الطريقة. او ان كان هاناك من مابيتفقش مع هذا، فالله عيوضح له هذي الامور. ¹⁶ انما لازم ان نواصل سيرنا تابعين الحق اللي وصلنا. ¹⁷ اقتدو فيني كلكم يا اخوتي. وانتبهو للي بيعيشو بحسب المثل الذي قدمناة. ¹⁸ انا قلت لكم هذا كم من مرات خيرات، وذلحين اعيدها لكم وانا بين ابكي: ان به خيرات في افعالهم هم اعداء صليب المسيح. ¹⁹ هولا نهايتهم الموت، فهم بيعبدو بطونهم، ويفتخرو باللي يخجل، وكل تفكيرهم بس في امور هذي الدنيا. ²⁰ اما احنا فوطنا هو السماء، ومن السماء مورعين لمنقذنا وسيدنا عيسى. ²¹ فهو عيغير اجسامنا الحقيرة، ويخلينا ساع جسمة الممجد، وهذا بقوتة اللي فيها يخلي كل حاجة يخظع تحت امرة.