¹ ولوم انتهى السبت اشترت مريم المجدلية ومريم ام يعقوب وسالومة شوية عطور علميد يسيرين ويسكبينه على جسم عيسى ² وفي صباح الأحد لاما طلع الشمس وصلين للقبر ³ وكان يقولين مابيناتهن : من يدحرج لنا الحجر من باب القبر؟ ⁴ ولاما ابسرين لقين الحجر قد تدحرج وكان كبير قوي ⁵ فدخلين القبر وابسرين شاب جالس من يمين القبر وعليه ثوب ابيض ، وافتجعين ⁶ فقال لهن : لا تفتجعينش ! انتين تشتين عيسى الناصري المصلوب ، مشو هانا ، وهذي البقعه اللي طرحوه بينها ⁷ فسيرين وحاكين الطلاب وبطرس : انهو عيسبقكم للجليل ، وهاناك عتبسروه ساع ماقال لكم ⁸ وخرجين من القبر هاربات من قوة الفجيعه ، وما حاكين احد بشي لأنهن كانين مفتجعات ⁹ وبعد ما قام عيسى صباح يوم الاحد ، بدا اول شي على مريم المجدلية اللي خرج منها سبعة شياطين ¹⁰ وسارت وحاكت الطلاب ، وكانو ينوحو ويبكو ¹¹ وما صدقوش لاما سمعو انه حي وانها ابسرته ¹² وظهر عيسى بعدا بهيئه ثانية لأثنين من الطلاب وهم سايرين للبرية ¹³ فرجعو وحاكو الباقين وماصدقوهمش ¹⁴ وطلع اخر مره لطلابه الباقين وهم بيتقاسمو الاكل ولامهم على قلة ايمانهم وقساوة قلوبهم ، لأنهم ماصدقوش اللي ابسروه بعد ما قام ¹⁵ وقال لهم : سيرو للعالم كله ، واعلنو البشارة للناس كلهم ¹⁶ كل من يؤمن ويتغطس ينجى ، ومن ما عيؤمنش يهلك ¹⁷ واللي عيؤمنو عتوقع معاهم هذي الأيات : يطردو الشياطين بأسمي ، ويتحاكوا بلغات جديدة ¹⁸ ويزقموا بأيديهم الحيات ، واذا شربو سم قاتل ما يضرهمش ، ويطرحو ايديهم على المرضى وعيشفوهم ¹⁹ وبعد ما كلم السيد عيسى طلابه ، ارتفع للسماء وجلس عن يمين الله ²⁰ واما الطلاب سارو يبشرو في كل بقعه ، والرب يعينهم ويؤيد كلامهم باللي يساندهم من الآيات