15

¹ وحين طلع الصبح ، اتخذ رؤساء الكهنة قرار مع الشيوخ والفقهاء والمجلس كله فقيدو عيسى وشلوه وسلموه الى بيلاطس ² فسأله بيلاطس : هل انت ملك اليهود ؟ فجاوبه : انت اللي قلت ³ واتهموه رؤساء الكهنة اتهامات خيرات ⁴ فسأله بيلاطس مره ثانية : للمه ما تجاوب بأي شيء ؟ ابسر كم بيقولوا تهم عليك! ⁵ وما جاوبش عيسى بشيء لاما استغرب منه بيلاطس ⁶ وكان بيلاطس في كل عيد يخرج واحد من المساجين يختاروه الشعب ⁷ وكان به رجال اسمه عباس محبوس مع جماعه من الثوار اللي قتلو ايام الثورة ⁸ وسارو الناس وطلبو من بيلاطس انه يسوي لهم ساعما عادتهم ⁹ فقال لهم : او تشتو اني اخرج لكم ملك اليهود ؟ ¹⁰ لأنه كان داري ان رؤساء الكهنة من حسدهم سلمو له عيسى ¹¹ ولكن رؤساء الكهنة خلو الشعب يختارو انه يخرج عباس ¹² فقال لهم بيلاطس مره ثانية : وايش اسوي باللي تسموه ملك اليهود؟ ¹³ ورجعو يصيحو اصلبه ¹⁴ فقال لهم : ايش الذنب اللي فعله ؟ وصاحو اقوى ( اصلبه) ¹⁵ وكان يشتي بيلاطس انه يرضي الكل ، وخرج لهم عباس وخلاهم يجلدو عيسى وبعدا سلمه علميد يصلبوه ¹⁶ واخذوه العساكر داخل القصر قصر الولاية، وجمعو الكتيبة كلها ¹⁷ وبعدا لبسوه مابس لونها ارجواني ، وضفرو له اكليل من الشوك وطرحوه على راسه ¹⁸ وجلسو يحيوه ويقولو له : السلام عليك يا ملك اليهود ¹⁹ ويضربوه بقصبه على راسه ويتفلو عليه ، ويركعو على ركبهم ويسجدو له ²⁰ وبعدما استهزؤ به ، بعدو منه الارجواني ولبسوه ثيابه وخرجوه علميد يصلبوه ²¹ وكان سمعان القيرواني ابو اسكندر وروفا في الطريق راجعين من الريف فخلوه يشل صليب عيسى بالصميل ²² وبزو عيسى لبقعه اسمها جلجثة ، يعني مكان الجمجمة ²³ وادو له خمر مع مر ، وما رضيش انه يشربها ²⁴ وبعدا صلبوه وقسمو ملابسه بينهم بالقرعة ²⁵ وكانت الساعه تسعه وقت ما صلبوه ²⁶ وكتبو في عنوان الحكم عليه : ملك اليهود ²⁷ وصلبو معه اثنين سرق على يمينه وشماله ²⁸ وتم كلام الكتاب اللي يقول : حسبوه مع الأشرار ²⁹ وكان الناس يخطو من قدامه ويهزهزو رؤسهم ويسبوه ويقولو له : اه يا هادم الهيكل وبانيه في ثلاث ايام ³⁰ خلص نفسك وانزل من الصليب ³¹ وكان رؤساء الكهنة والفقهاء يستهزؤ به كمان ، ويقولو لبعضهم : خلص غيره وما قدرش يخلص نفسه! ³² ينزل الان المسيح ملك اسرائيل من الصليب ، علميد نبسر ونؤمن ! وكان السرق اللي جنبه حتى هم يسبو فيه ³³ وفي الظهر ، نزل عليهم الظلام على الأرض كلها للساعه 3 العصر ³⁴ وفي الساعه 3 صاح عيسى بصوت قوي : ايلوئي ايلوئي ، لاما سبكتاني؟ . يعني إلهي إلهي ليش فلتني؟

³⁵ فسمعوا بعض الموجودين وقالو : هوذا هو بيصيح لإيليا ³⁶ وجري واحد منهم وشل اسفنجه وملاها بالخل وطرحها على عصيه ورفعها له علميد يشرب وهو بيقول : ريعو علميد نبسر هل عيجي إيليا علميد ينزله ³⁷ وصرخ عيسى صرخه قويه ومات ³⁸ فانشق حجاب الهيكل نصين من فوق لتحت ³⁹ وكان قائد الحرس واقف قدام الصليب ، ولاما ابسر كيف مات عيسى قال : بالحقيقة كان هذا الرجال ابن الله ⁴⁰ وكان به هاناك نسوان بيبسرين من بعيد ، وبينهن مريم المجدلية ومريم ام يعقوب الصغير ويوسي وسالومه ⁴¹ وهن اللي لحقين عيسى وخدمينه لاما كان في الجليل ، وغيرهن خيرات طلعين معه للقدس ⁴² وكان الليل قد حل ، وهو وقت التهيئه ماقبل السبت ⁴³ فجاء يوسف الرامي وكان من أعضاء مجلس اليهود البارزين ومن اللي ينتظرو ملكوت الله ، وتجرأ ودخل إلى بيلاطس وطلب جثة عيسى ⁴⁴ واستغرب بيلاطس من انه قد مات بهذي السرعه ، وصيح لقائد الحرس وسأله : مات من زمان ولا كيف ؟ ⁴⁵ ولاما سمع الخبر من القائد سمح ليوسف بجثة عيسى ⁴⁶ واشترا كفن ونزل الجثه من الصليب وكفنه وطرحه في قبر محفور في الحجر ، ودحرج حجره كبيره على باب القبر ⁴⁷ وابسرت مريم ام يوسي اين طرحه