28

¹ ولوما كمل السبت ، وحين طلع فجر يوم الأحد ، سارت مريم المجدليه ومريم الثانيه علميد يزورين القبر

² وفجأه وقع زلزال قوي ، لأن ملاك الله نزل من السماء ودحرج الحجره على باب القبر وجلس عليها ³ وكان شكله ساع البرق وثوبه أبيض ساع الثلج ⁴ وافتجعوا الحراس من الخوف لوما ابسروه واوقعوا ساع الميتين

⁵ فقال الملاك للنسوان :(لا تحافينش ، انا داري انكن بتدورين على عيسى اللي صلبوه ⁶ هو مشو هانا ، لأنه قام ساع ما قال ، اقربين وابسرين البقعه اللي كان مطروح بينها ⁷ وسيرين طوالي لطلابه وقولين لهم : انه قام من بين الأموات ، وهو يسبقكم إلى الجليل ، وهاناك تبسروه ، انا بلغتكن الرساله)

⁸ وفلتين النسوان القبر سريع وهن خايفات وفارحات قوي ، وكانين يجرين علميد يبشرين الطلاب ⁹ فلقيهن عيسى في الطريق وقال لهن :(السلام عليكما) وقربين منه ومسكين ارجله وسجدين له ¹⁰ فقال لهن عيسى :(لا تخافينش ، سيرين لإخوتي وقولين لهم انهم يسيروا للجليل ، وهاناك عيبسروني) ¹¹ ولوما كانين سايرات رجع بعض الحرس للمدينه وحاكوا رؤساء الكهنة باللي وقع ¹² فأجتمعوا رؤساء الكهنة والشيوخ وبعد ما تشاوروا رشوا الحراس بزلط خيرات ¹³ وقالوا لهم :(حاكوا الناس الناس ان طلاب عيسى جو في الليل وسرقوه واحنا راقدين ¹⁴ ولوما يسمع الحاكم ذيه الخبر احنا عنراضيه ونبعد العقاب عنكم) ¹⁵ وشلوا الحراس الزلط وفعلوا ساع ما قالوا لهم ، وانتشرت تيه الحكايه بين اليهود لليوم ¹⁶ واما الطلاب ال11 ساروا للجليل ساع ما امرهم عيسى ¹⁷ ولوما ابسروه سجدوا له ولكن بعضهم شكوا ¹⁸ فقرب منهم عيسى وقال لهم :(وقع لي كل سلطان في السماء والأرض) ¹⁹ فسيروا وخلوا الناس كلهم طلاب وعمدوهم بأسم الأب والأبن والروح القدس ²⁰ وعلموهم ان يعملوا بكل ما وصيكم به ، وانا معاكم طول الوقت لوما ينتهي الزمان