27

¹ ولوما طلع الصبح ، تشاوروا رؤساء الكهنة والفقهاء على عيسى علميد يقتلوه ² وبعدا قيدوه وبزوه سلموه لـ بيلاطس الحاكم ³ ولوما ابسر يهوذا انهم قد حكموا على عيسى كذيه ، ندم وسار يرجع الثلاثين فضه لرؤساء الكهنة والشيوخ ⁴ وقال : انا اخطيت لأني خنت انسان بريء

فقالو له : واحنا ايش يهمنا ، دبر حالك

⁵ ورجم الفضه في بيت الله وخرج ، وسار شنق نفسه

⁶ فشل رؤساء الكهنة الفضه وقالوا : ما يجوز اننا نطرح تيه الفضه بين اموال الله لأنها قيمة دم انسان ⁷ وجلسوا يتشاوروا بيناتهم البين واتفقوا يشتروا بها جربة الفخاري علميد توقع مقبره للأجانب ⁸ وعلميد هذا يسموها الناس جربة الدم لليوم ⁹ وتم اللي قاله النبي إرميا :(وشلوا الثلاثين فضه وهي اللي اتفقوا عليها بعض بني اسرائيل علميد تكون قيمته) ¹⁰ ودفعوها قيمة جربة الفخاري ، كذيه امرني الله ¹¹ ووقف عيسى قدام الحاكم فسأله الحاكم :(هو انت ملك اليهود؟)

وجاوبه عيسى :(انت تحاكيت)

¹² وكان رءساء الكهنة والشيوخ بيتهموه وما يجاوبش ولا بشي ¹³ فقال له بيلاطس :(ما بتسمعش ايش بيقولوا عليك؟) ¹⁴ وما جاوبه عيسى ولا بشي ، لوما انه استغرب الحاكم قوي ¹⁵ وكان من عادة الحاكم في كل عيد انه يخرج واحد من المساجين يختاره الشعب ¹⁶ وكان عندهم في ذيك الوعد محبوس معروف اسمه ابن عباس ¹⁷ ولوما تجمعوا الناس سألهم بيلاطس :(من تشتوا اني اخرج لكم ابن عباس ولا عيسى اللي اسمه المسيح؟) ¹⁸ وكان بيلاطس داري انهم من حسدهم سلموا عيسى

¹⁹ ولوما كان بيلاطس جالس على الكرسي رسلت له زوجته تقول :(اوبه توجع ذيه الرجال الصالح ، لأني اليوم استوجعت قوي بسببه في حلم)

²⁰ لكن رؤساء الكهنة والشيوخ قالوا للناس انهم يطلبوا ابن عباس ويقتلوا عيسى

²¹ فلوما سألهم الحاكم :(من تشتوا اني اخرج لكم؟)

جاوبوا :(ابن عباس)

²² فقال لهم بيلاطس :(وايش افعل بعيسى اللي اسمه المسيح؟)

فجاوبوه كلهم :(اصلبه)

²³ فقال لهم :(ليش ، ايش الذنب اللي فعله؟)

وصاحوا اقوى :(اصلبه)

²⁴ فلوما ابسر بيلاطس انه مابش فايده وزادة الغاغه ، شل ماء وغسل يده قدام الناس وقال :(انا بريء من دم ذيه الرجال ! ابسروا لكم انتوا حل)

²⁵ فجاوبه الناس لهم :(دمه علينا وعلى اولادنا)

²⁶ فخرج لهم ابن عباس ، واما عيسى جلده وسلمه علميد يصلب ²⁷ وبعدا شلوا جنود الحاكم عيسى لقصر الولاية وجمعوا عليه الفرقه كلها ²⁸ وخلسوه ثيابه ولبسوه ثياب كبدي ²⁹ وظفروا له تاج من الشوك وطرحوه على راسه ، وطرحوا عصيه في يده اليمين ، وركعوا على ركبهم قدامه ، واتمهزؤا به وقالوا له : حياك يا ملك اليهود ³⁰ ومسكوا العصيه وجلسوا يضربوه على راسه بها ، وهم بيتفلوا عليه ³¹ وبعد ما استهزؤا به خلسوه الثوب الكبدي ولبسوه ثيابه وشلوه للصليب ³² ولوما كانوا خارجين من المدينه قابلوا رجال من القيروان اسمه سمعان ، وخلوه يشل صليب عيسى بالقوه ³³ ووما وصلوا لبقعه اسمها الجلجثة ، يعني بقعة الجمجمة ³⁴ ادوا له خمر بينها مر ، ولوما ذاقها مارضيش يشربها ³⁵ فصلبوه وشلوا ثيابه ووزعوها بينهم بالقرعه ³⁶ وجلسوا هاناك يحرسوه ³⁷ وطرحوا فوق راسه لوحه مكتوب عليها سبب الحكم عليه :(ذيه عيسى ملك اليهود)

³⁸ وصلبوا شقه اثنين سرق ، واحد من يمينه والثاني على يساره ³⁹ وكان اللي يمشوا قدامه ويقولوا له ⁴⁰ يا هادم الهيكل وبانيه في ثلاثه أيام ، لو انت ابن الله فك نفسك وانزل من الصليب ⁴¹ وكان رؤساء الكهنة والفقهاء والشيوخ يستهزؤا به ويقولوا ⁴² نجا غيره وما استرش ينجي نفسه !، هو ملك اسرائيل ، ينزل ذلحين من الصليب ونؤمن به ⁴³ توكل على الله وقال :(انا ابن الله ، هيا ينجيه الله الان لو كان راضي عليه ⁴⁴ والسرق كان يعايروه كمان بنفس ذيه الكلام ⁴⁵ وفي الظهر وقع ظلام على الأرض كلها للساعه الثالثه ⁴⁶ وعند الساعه الثالثه صاح عيسى بصوت عظيم وقال :(ايلي ، ايلي ، لماذا سبكتاني؟) ومعناها الهي الهي للمه فلتني

⁴⁷ فسمعوا بعض الناس هاناك فقالوا انه ينادي النبي ايليا

⁴⁸ فجرى واحد منهم وشل اسفنجه وبللها بالخل ، وطرحها على عصيه طويله ، ورفعها له علميد يشرب ⁴⁹ فقالوا له البقيه :(راعي علميد نبسر عيجي ايليا ينجيه)

⁵⁰ وصاح عيسى مره ثانيه صيحه قويه قوي وطلعت روحه

⁵¹ واتقسمت الستاره الموجوده في الهيكل نصين من فوق لتحت ، واهتزت الأرض وتشققت الحجار ⁵² وافتتحت القبور ، وخيرات من الميتين الصالحين قاموا للحياة بأجسامهم ⁵³ وبعد قيامة عيسى ، خرجوا من القبور ودخلوا للمدينه المقدسه وبدوا على بعض الناس

⁵⁴ ولوما ابسر القايد وعساكره اللي يحرسوا عيسى الزلزال وكل ما وقع افتجعوا وقالوا :(الصدق كان ذيه الرجال ابن الله)

⁵⁵ وكان به هاناك نسوان خيرات مريعات من بعيد ، وهن اللي لحقين عيسى من الجليل علميد يخدمينه ⁵⁶ وبينهن مريم المجدليه ومريم أم يعقوب ويوسف وأم عيال زبدي ⁵⁷ وجا في العشي رجال غني من الرامه اسمه يوسف ، وكان من طلاب عيسى ⁵⁸ فدخل على بيلاطس وطلب منه جسم عيسى ، فقلهم بيلاطس انهم يسلموه الجثه ⁵⁹ فشل يوسف جثة عيسى ولفه في كفن نظيف ⁶⁰ وطرحه في قبر جديد كان قد حفره لنفسه في الحجر ، وبعدا ادى حجره كبيره على باب القبر ورحله ⁶¹ وكانت مريم المجدليه ومريم الثانيه مكوزرات قدام القبر من الجهه الثانيه ⁶² وفي اليوم الثاني بعد التجهيز ليوم السبت ، سارو رؤساء الكهنة والفريسيين لبيلاطس ⁶³ وقالوا له :(احنا ذكرنا يا سيد ، ان ذيك الدجال قال وهو حي انه عيقوم بعد ثلاثه أيام) ⁶⁴ ونشتيك تدي أمر بحراسة القبر لليوم الثالث ، علميد ما يجوش طلابه ويسرقوه ويقولوا للشعب : انه قام من بين الأموات ، لأنها عتوقع تيه الخدعه اخس من الأوله

⁶⁵ فقال لهم بيلاطس :(عندكم العساكر وسيروا احرسوا القبر ساع ما تشتوا) ⁶⁶ فساروا وتأكدوا من القبر وطرحوا عليه حراس