¹ وذلحينه انتبهو انتو يا اغنياء ، ابكو وصيحو على المصايب اللي عتوقع لكم ² زلطكم فسدت وثيابكم اكلها العث ³ ذهبكم وفضتكم ملانها ذحل ، يشهد عليكم ويأكل اجسامكم ساع النار ، عتغثو للأيام الأخيرة ⁴ والأجور حق العمال اللي بيشتغلو في جربكم ما دفعتوهاش ، وهاذه الأجور تصيح بالشكوى ضدكم وصياح الشقاه سمعه المولى القدير ⁵ انتو تعيشو في الدنيا في نعمه ورفاهيه ، وسمنتو نفسكم ليوم الذبح ⁶ حكمتو على البريء وقتلتوه وما قاومكمش ⁷ اما انتو يا اخوتي اصبرو لاما يجي المسيح ، ابسرو كيف مراعي الشاقي لاما يبسر محصول الأرض الغالي ، ويصبر لاما ينزل مطر الخريف ومطر الربيع ⁸ فأصبرو انتو والكل ، وتشجعو لأن المسيح عيجي قريب ⁹ يا اخوتي لا تضبحوش على بعضكم البعض ، علميد ما يحاسبكمش الله على هاذا ، لأن الديان واقف على الباب ¹⁰ يا اخوه اقتدو بالأنبياء اللي تحاكو بأسم الله ، انهم اتوجعو وصبرو ¹¹ وهنيت للي صبرو ، سمعتو بصبر ايوب وعرفتو كيف كافأه الله ، فهو رؤوف رحيم ¹² وقبل كل شي يا اخوتي لا تحلفوش بالسماء ولا بالأرض ولا بشي ثاني ، ولاما يكون قصدكم ايوه قولو ايوه ولاما يكون قصدكم لا قولو لا ، علميد ما ينزلش عليكم العقاب ¹³ هل بينكم واحد فيه ضيق؟ لازم انه يدعي الله ¹⁴ هل بينكم واحد فرحان؟ لازم انه يسبح الله ، هل بينكم مريض؟ لازم يداعي شيوخ الجماعه ، ويدعو الله علميده ويدهنوه بزيت بأسم المسيح ¹⁵ والدعاء بإيمان يشفي المريض ، والمسيح عيقيمه ، فلو كان مرضه بسبب ذنب فعله يغفر له ¹⁶ اعترفو بيناتكم البين بالذنوب ، وادعو الله بعضكم علميد بعض علميد تشفو ، دعاء الرجل الصالح له مفعول قوي ¹⁷ كان إلياس إنسان عادي ساعنا ، وتضرع لله بقوه علميد ما ينزلش مطر على الأرض ، ومانزلش المطر لمدة ثلاث سنوات ونص ¹⁸ وبعدا رجع وتضرع مرة ثانية ، وامطرت السماء وطلعين المحاصيل ¹⁹ يا اخوتي ، لو ضل واحد منكم عن الحق ، ورجعه واحد ثاني ²⁰ اعرفو ان من يرجع مذنب عن طريق الضلال ينقذه من الموت ، ويستر ذنوب خيرات