¹ من اين به هاذه المشاكل والقتال بينكم؟ مشهي من شهواتكم اللي بتحارب داخلكم ² بتشتهو ومابش معاكم ترجعو تقتلو وتحسدو وماتستروش انكم تشلو ترجعو تتصايحو وتتقاتلو ، انتو محرومين لأنكم ما بتطلبوش ³ ولاما تطلبو ما يوقعلكمش لأن قصدكم مشو حالي ، لأنكم تشتو تستخدموه في شهواتكم ⁴ انتو خونه ساع زوجه زانية ، مش انتودارين ان محبة هاذه الدنيا هي عداوة لله؟ ايوه،، من يشتي يحب هاذه الدنيا هو عدو لله ⁵ قصدكم ان ماقاله باطل وهو ان الروح اللي اداه الله لنا ملانه غيره علينا؟ ⁶ لكن الله بيديلنا نعمه خيرات ، وعلميد هاذا يقول الكتاب :(يوقف الله ضد المتكبرين ، لكنه بينعم على المتواضعين) ⁷ يعني اخضعو لله ، وقاومو ابليس علميد يهرب منكم ⁸ اقتربو من الله علميد يقرب منكم ، اغسلو ايديكم يا مذنبين ، وطهرو قلوبكم ياللي بتترددو في الأفكار ⁹ ازعلو وصيحو وابكو ، خلو ضحككم ينقلب لصياح ، وفرحكم غم ¹⁰ اتواضعو قدام الله وعيرفعكم ¹¹ يا اخوتي لا تتحاكوش بالسوء بيناتكم البين ، لأن من بيتحاكا بالسوء على اخوه ولا يحكم عليه فهو بيتحاكا بالسوء على الشريعه وبيحكم عليها ، ولو انت بتحكم على الشريعه فأنت ساع اللي بيقاضيها وما بيعملش بها ¹² مابش إلا واحد وهو اللي طرح الشريعه ، وهو القاضي اللي يستر انه ينفذ ولا يهلك ، فمن تظن نفسك حتى تحكم على البقيه؟ ¹³ وذلحينه اوبهو انتو ياللي بتقولو :(عنسير اليوم ولا غدوه للقريه الفلانيه ، ونجلس هاناك سنه ونشتغل ونربح) ¹⁴ ريعو ،، انتو ماتعرفوش شي عن غدوه ، ولا تظمنوش حياتكم ، انتو بخار يجي قليل وبعدا يختفي ¹⁵ ولهاذا لازم انكم تقولو :(ان شاء الله نعيش ونفعل هاذا او هاذاك) ¹⁶ ولكنكم ذلحينه بتتفاخرو بتكبركم ، وساع هاذه المفاخره شر كلها ¹⁷ من يعرف انه يفعل الخير وما بيفعلش هو مذنب