3

¹ وطلعوا بطرس ويوحنا لهيك الصلاة الساعة ثلاثة بعد الظهر ² وعند باب بيت الله اللي اسمه الباب الجميل كان به رجال كسيح من يوم ولادته ، وكان الناس يشلوه كل يوم ويطرحوه هاناك عسب يشحت صدقات من اللي يدخلوا للبيت ³ فلوما ابسر بطرس ويوحنا يدخلوا الهيكل ، شحت منهم صدقه ⁴ وثبتوا بطرس ويوحنا عيونهم عليه وقالوا له : ابسر لنا ⁵ وابسر ليهم وكان قصده انه عيوقع له صدقه منهم

⁶ فقال له بطرس :(مابش معي لا فضه ولا ذهب ، ولكني شديلك ماعندي بأسم يسوع المسيح الناصري ، قم وامشي) ⁷ ومسك بيده اليمين وقومه ، وعلى طول قويت ارجيله وكعبه ⁸ فقام وقفز على ارجله وبدأ يمشي ، ودخل معاهم لبيت الله وهو يمشي ويتقفز ويسبح الله ⁹ وابسروا الناس كلهم انه بيمشي ويسبح الله ¹⁰ ودروا انه هو الشحات اللي كان يكوزر عند الباب الجميل واستغربوا قوي من اللي وقع له ¹¹ ولوما كان الرجال واصل مع بطرس ويوحنا ، جروا الناس كلهم صليهم في قاعة سليمان ¹² فلوما ابسرهم بطرس على تيه الحاله قال لهم :(يا بني اسرائيل مالكم مستغربين من اللي وقع؟ وليش بتبسروا لنا ساع اللي بقدرتنا وتقوانا خلينا ذيه الرجال يمشي؟ ¹³ إله ابراهيم واسحق ويعقوب ، إله ابائنا ، هو اللي مجد خادمة يسوع ، اللي سلمتوه عسب يقتل ، ورفضتوه قدام بيلاطس ، مع انه كان يشتي يخرجه ¹⁴ ورفضتوا القدوس البار ، وطلبتوا العفوا عن قاتل ¹⁵ انتوا قتلتوا واهب الحياة ، ولكن الله اقامه من الموت ، واحنا شاهدين بذيك ¹⁶ وذيه الرجال اللي بتبسروه وتعرفوه تقوى بواسطة الايمان باسم يسوع ، لأن الايمان بيسوع ادى له ذيه الشفاء التام ساع ما تبسروا كلكم

¹⁷ والان يا اخوتي ، انا داري انكم انتوا وقادتكم فعلتوا ذيه من جهل ¹⁸ لكن الله بذيه تم ما جاء به من قبل بواسطة كل الانبياء ، وهو ان مسيحه عيتوجع ¹⁹ فتوبوا وارجعوا عسب تغفر خطاياكم ²⁰ ويرسل لكم المسيح اللي اختاره لكم ، يعني يسوع ²¹ فهو لازم يجلس في السماء لوقت تسبر كل الأمور ، ساع ما اوحى الله من زمان لأنبيائه الصالحين ²² فان موسى قال :(عيقيم لكم المولى إلهكم من بين شعبكم نبي مثلي ، فاسمعوا كل ما يقوله لكم واطيعوه ²³ ومن ما عيسمعش لذيه النبي ، يباد من بين الشعب

²⁴ والأنبياء كلهم من صموئيل إلى اللي جو بعده تكلموا وأنبأوا هم والكل بجية تيه الأيام ²⁵ فأنتوا أبناء الأنبياء والعهد اللي عقده الله لأبائكم حين قال لإبراهيم : بنسلك ابارك كل شعوب الأرض ²⁶ فلكم اول شي اقام الله خادمة وارسله لكم بركه ، ترد كل واحد منكم عن خبثه)