2

¹ ولوما جاء اليوم الخمسين ، كانوا مجتمعين كلهم في بقعه واحده ² وفجأه وقع صوت في السماء كأنه صوت عاصفة ريح ، وملة الدنيا كلها بقعة ما كانوا جالسين ³ وبدت لهم لهبه كأنها نار ، وتوزعت على كل واحد منهم ⁴ وامتلوا كلهم من الروح القدس ، وجلسوا يتحاكوا بلغات غير لغاتهم ساع ما ادى لهم الروح القدس عسب يتحاكوا

⁵ وكان في اورشليم ناس صالحين من اليهود جو من كل امه تحت السماء ⁶ فلوما وقع ذيك الصوت اجتمع الناس وهم مطننين ، لأن كل واحد منهم كان يسمعهم يتحاكوا بلغته ⁷ وطننوا واستغربوا خيرات وقالوا :(مش هولا الي بيتحاكوا كلهم من الجليل؟ ⁸ فكيف يسمعهم كل واحد منا بلغت بلاده؟ ⁹ احنا من برثية ومادية وعيلام ومابين النهرين وكبدوكية وبنطس وآسية ¹⁰ وفريجية وبمفيلية ومصر ونواحي ليبية اللي جنب لقيرين ، وكمان زوار من روما ¹¹ وكريتيين وعرب ، يهود ومتيهودين ، ومع ذيه نسمعهم يتحاكوا بلغاتنا على أعمال الله العظيمه) ¹² وكانوا كلهم محتارين ومطننين ويقولوا لبعضهم ، ايش معنى ذيه؟

¹³ وغيرهم كانوا يتمسخروا ويقولوا انهم سكارى ¹⁴ فوقف بطرس مع الطلاب ال11 ، ورفع صوته وقال لهم :(يا يهود ويا كل المقيميين في اورشليم ، اسمعوا كلامي واوبهوا ¹⁵ هو مشهم سكارى ساع ما بتضنوا ، احنا عادنا في الساعه تسعه صباح ¹⁶ وذيه هو اللي قاله النبي يوئيل ¹⁸ وعلى عبيدي رجال ونساء

افيض من روحي في تيك الأيام

ويتنبأوا كلهم

²⁰ وتوقع الشمس ظلام والقمر دم

قبل ما يجي اليوم العظيم

يوم الأب

²² يابني اسرائيل اسمعوا ذيه الكلام :(كان يسوع الناصري رجال ايده الله بينكم باللي وقع على يده من العجايب والمعجزات والأيات ساع ما انتوا دارين ²³ ولوما اسلم ليكم بمشيئة الله المقضيه وعلمه السابق ، صلبتوه وقتلتوه بيد الكفره ²⁴ ولكن الله اقامه وكسر قيود الموت ، وماكنش يستر الموت انه يخليه اسير ²⁵ لأن داؤد يقول فيه:

ابسرت الرب قدامي دايماً

وهو عن يميني

عسب ما اقلقش

²⁷ لأنك ما تفلتنيش في عالم الأموات

وما تخليش قدوسك ان يتعفن في القبر

²⁹ يا اخوه ، خلوني اقول لكم بالعلن : مات ابونا داؤد ودفن ، وقبره هنيه عندنا لذيه اليوم ³⁰ وكان نبي ، فدرى ان الله حلف له بقسم ان من نسله يقيم من يستوي على عرشه ³¹ وابسر داؤد من قبل قيامة المسيح وتحاكا عليها فقال :(ما فلته الله في عالم الأموات ولا فلت جسمه يتعفن في القبر ³² فيسوع ذيه اقامه الله ، واحنا كلنا شهود على ذيه ³³ فلوما رفعه الله بيمينه للسماء ، اوقع من الأب الروح القدس الموعود به وادى منه علينا ، وذيه اللي تبسروه وتسمعوه ³⁴ لأن داؤد ماطلعش للسماء ، وهو نفسه يقول

قال الرب لربي

كوزر عن يميني

³⁶ وليدروا بني اسرائيل كلهم ويتيقنوا ان سيوع ذيه اللي انتوا صلبتوه ، قد خلاه الله المسيح سيد الكل

³⁷ فلوما سمع الناس ذيه الكلام اوجعتهم قلوبهم ، وسألوا بطرس وباقي الرسل : يا اخوه ، ايش نسوي؟

³⁸ فقال لهم بطرس :(توبوا ويتعمد كل واحد منكم بأسم يسوع المسيح ، فتغفر خطاياكم وينعم عليكم بالروح القدس ³⁹ لأن الوعد لكم ولعيالكم ولكل اللي هم بعيد ، ولكل اللي يدعوهم المولى إلهنا لنفسه)

⁴⁰ وكان بطرس يعلمهم بكلام ثاني خيرات ، ونبههم وقال :(نجوا نفسكم من شر ذيه الجيل الفاسد) ⁴¹ واللي قبلوا كلامه تغطسوا ، وفي ذيك اليوم انظم لجماعة المؤمنين حوالي 3000 شخص ⁴² وكانوا يداوموا عى الاستماع لتعليم الرسل وعلى الحياة المشتركة ويتناولوا الخبز والصلاة ⁴³ ووقعت عجايب وآيات خيرات على ايدي ارسل ، وامتلى الكل من الخوف ⁴⁴ وكان المؤمنين كلهم متحدين ، وكل شي مشترك بينهم ⁴⁵ يبيعوا املاكهم وكل ما معاهم ويتقاسموا ثمنها ، على قدر حاجة كل واحد منهم ⁴⁶ وكانوا يلتقوا كل يوم في الهيكل بقلب واحد ، وياكلوا الخبز في البيوت ، وياكلوا اكلهم بفرحة وبساطة قلب ⁴⁷ ويسبحوا الله ويلاقوا رضى الناس كلهم ، وكان الرب كل يوم يزيد المؤمنين اللي انعم عليهم بالنجاه