28

¹ ولوما وصلنا ، درينا ان اسم الجزيره هو مالطه ² وكانوا اهلها طيبين معانا قوي ، ورحبوا بنا وولعوا نار عسب ندفى لأن الجو كان بارد ومطر ³ وجمع بولس شوية حطب ورجمهن في النار ، فخرجت حيه من الحراره وتعلقت بيده ⁴ ولوما ابسروا اهل الجزيرة الحيه معلقه بيده قالوا لبعضهم :(يمكن ذيه الرجال قاتل ، مع انه نجا من البحر لكن العدل ما يسمحش له انه يعيش) ⁵ ولكن بولس نبع الحيه من يده في النار ، وما وقش به اي شي ⁶ وكانوا مريعين ان يده تنتفخ ويطرح ميت على طول ، فلوما ريعوا خيرات وابسروا انه ماوقع به شي ، غيروا رايهم وقالوا :(ذيه إله)

⁷ وكان قريب من تيك البقعه مزرعه لبوليوس حاكم الجزيرة ، فأستقبلنا في بيته وضيفنا ثلاثة أيام ⁸ وكان ابو بوليوس مطرح على الفراش مريض حمى واسهال ، فدخل بولس لغرفته وصلى وطرح ايديه عليه وشفاه ⁹ ولوما وقع ذيه ، جو صليه باقي المرضى في الجزيرة وشفاهم ¹⁰ واكرمونا زياده ، وادولنا كل حاجتنا وقت سفرنا ¹¹ وبعد ثلاثة أشهر ركبنا سفينه من الاسكندرية عليها رسم (الإلهين التوأمين) وكانت ترسي فص الشتاء في الجزيرة ¹² فنزلنا لمدينة سراكوسه وجلسنا بينها ثلاثه أيام ¹³ وبعدا خطينا منها من شق الشاطئ لمدينة ريغيون ، وفي اليوم الثاني جت علينا ريح جنوبيه ، وبعدا وصلنا في اليوم الثالث إلى بوطيولي ¹⁴ ولقينا هاناك بعض الأخوه ، وطلبوا مننا نمسي عندهم اسبوع ، وكذيه لوما وصلنا إلى روما ¹⁵ وسمع الأخوه في روما بوصولن ، وخرجوا عسب ياقونا لساحة مدينة ابيوس والحواني الثلاثه ، فلوما ابسرهم بولس شكر الله واتشجع ¹⁶ وحين وصلنا لروما ، سمح الضابط لبولس انه يجلس في بيت خاص مع العسكري اللي بيحرسه ¹⁷ وبعد ثلاثه أيام صيح بولس لقادة اليهود ، ولوما اجتمعوا قال لهم :(يا اخوتي ، انا مافعلتش ولا شي ضد شعبنا او ضد عادات آبائنا ، ومع ذيه مسكوني في اورشليم وسلموني لأيدي الرومانيين ¹⁸ وحققوا في قضيتي ، وكانوا يشتوا يخرجوني لأننا مش مذنب بأي جريمه تستاهل الموت ¹⁹ ولكن اليهود عارضوا ، واضطريت اني ارفع قضيتي للقيصر ، لكن مش يعني اني اشتكي منهم ²⁰ عسب ذيه طلبت رأيكم واكلمكم ، وانا احمل ذيه القيد من سبة رجاء اسرائيل)

²¹ فقالوا له :(ماوصلناش أي رساله من منطقة يهوذا عسبك ، والأخوه اللي جو من هاناك ما حاكوناش بشي عليك ²² ولكننا نشتي نسمع رأيك ، لأن الناس في كل بقعه يقولوا حاجات على المذاهب)

²³ واتفقوا يقابلوا بولس في يوم معين ، واقبلوا لبيته وهم خيرات ، وجلس بولس يحاكيهم من الصبح للعشي ، يشهد لملكوت الله ، بيحاول يقنعهم برسالة يسوع وهو مستخدم توراة موسى وكتب الأنبياء ²⁴ فأقتنع بعضهم بكلامه وانكره الباقين ²⁵ وقبل ما يروحوا من عنده وهم مش متفقين ، قال لهم بولس تيه الكلمه :(صدق الروح القدس لوما قال لأبائكم بلسان النبي اشعياء: ²⁷ لأن قلب ذيه الشعب تحجر

وسدوا اذانهم وغمضوا عيونهم

عسب مايسمعوش بآذانهم

ويبسروا بأعينهم

ويفهموا بقلوبهم ويتوبوا

فأشفيهم

²⁸ عسب ذيه اشتي انكم تعرفوا ان الله ارسل نجاته لغير اليهود ، وهم عيسمعوا له) ²⁹ ولوما قال ذيه الحكا ، خرج اليهود من عنده وهم بيتكارحوا قوي

³⁰ وجلس بولس سنتين كاملتين في بيته اللي استأجره ، وكان يرحب بكل من يجي يزوره ³¹ فيبشر بملكوت الله ويعلن بكل جراءه وحريه تعليمه في السيد يسوع المسيح