27

¹ ولوما قرروا يسافروا في البحر إلى ايطاليا ، سلموا بولس وبعض المسجين لضابط من الكتيبه الامبراطورية اسمه يوليوس ² وركبنا سفينه من أذر اميت خطايه صلى بعض المواني على شاطي ولاية آسيا ، وكان معانا رستركي المقدوني اللي من تسالونكي

³ وفي اليوم الثاني وصلنا إلى صيدا ، وكان يوليوس بيعامل بولس معامله حاليه ، وسمح له انه يزور خبرته في صيدا عسب يشل منهم اللي يحتاجه ⁴ من هاناك ابحرنا مره ثانيه ، ولأن الريح كانت ضدنا سافرنا قريب من شواطي قبرص ⁵ وبعد ما عدينا البحر قريب من كيليكية وبمفيلية ووصلنا إلى ميناء ميرا في ولاية ليكية ⁶ لقى الضابط سفينه من الاسكندريه مسافره إلى ايطاليا ، وطلعنا بينها ⁷ وخطيت بنا السفينه دلا دلا لأيام ، لوما قربنا بعد تعب خيرات من مدينة كنيدس ، ومنتعتنا الريح ان احنا ننزل هاناك ، ورجع سافرنا شق شواطئ جزيرة كريت عند رأس سلمونه ⁸ فوصلنا بعدما خطينا بطلوع الروح لبقعه اسمها (المواني الصالحه) قريب من مدينة لسائية

⁹ وكذيه خطى علينا وقت طويل ، ووقع السفر في البحر خطر لأن الوقت كان بعد الصيام ، وحذرهم بولس وقال : ¹⁰ (يا رجال ، انا بين ابسر ان سفرنا فيه خطوره وخساره قويه ، مش على السفينه ولا السامان اللي عليها وبس ، ولكن على ارواحنا والكل) ¹¹ لكن الضابط اقتنع بكلام القطان وصاحب السفينه اكثر من كلام بولس ¹² وكان الميناء مشو صالح عسب يقضوا فصل الشتاء هناك ، فقرروا الأغلبيه ان نكمل السفر ، متأملين اننا نوصل لميناء فينكس في كريت ونقضي الشتاء هاناك ، وذيه الميناء مطل على الجنوب العربي والشمال العربي ¹³ وحين هبت ريح جنوبيه خفيفة ، ظنوا انهم وقع لهم مايشتوا ، وخطوا من شق شاطئ كريت ¹⁴ ولكن بعد قليل ريح شرقيه شماليه عاصفه جت من الجزيره ¹⁵ وضربت السفينه وما استرتش السفينه تقاومها ¹⁶ واحتمينا من الريح لوما مرينا قريب من جزيرة صغيره اسمها كودا ، واسترنا نجهز قارب النجاه ¹⁷ فلوما رفعوا السفينه واوبهوا للموضوع ، وافتجعوا انها تدحرج للرمال المتحركه عند ساحل ليبيا ، فنزلوا الشراع وخلوها تسير على الأمواج ¹⁸ وقويت العاصفه في اليوم الثاني ، وجلسوا يراجموا السامان في البحر ¹⁹ وفي اليوم الثالث رجمو ادوات السفينه ²⁰ ومرت أيام خيرات ما ابسرناش فيها الشمس ولا النجوم ، وبقيت الريح تضربنا لوما اننا يأسنا من النجاة

²¹ وكان رجال السفينه بطلوا ياكلوا ، وسنب بولس وسطهم وقال لهم :(يا خبره ، كان عتسمعوني وما تسافروش من كريت ، وكنا عنسلم من تيه المخاطر والمخاسير ²² وذلحينه اقلكم يا اطمنوا ، ما عينفقدش اي احد منكم ، لكن السفينه لحالها عتتكسر ²³ في ليلة امس جالي ملاك من ربي اللي اعبده ²⁴ وقال لي (لا تفتجعش يا بولس ، لازم انك تجي لاعند القيصر ، والله ادالك حياة كل المسافرين معك) ²⁵ اتشجعوا ياخبره لأني اثق بالله ، وكل كلامه عيتم ²⁶ واكيد ان الموج عيدلهفنا لأي جزيرة ²⁷ ولوما وصنا في اليوم 14 تايهين في بحر أدريا ، وظنوا البحاره في نص الليل انهم بيقربوا من البر ²⁸ وحين قاسوا عمق البحر لقيوه 120 قدم ، وبعدا قاسوه بعد مسافه صغيره ولقيوه قريب 90 قدم ²⁹ وافتجعوا ان السفينه تصدم ببقع حجريه ، فرجموا من نهاية السفينة اربعه مراسي وجلسوا يراقبوا طلوع الفجر ³⁰ وكان يشتوا البحاره انهم يهربوا من السفينه ، ونزلوا القارب للبحر على انهم يشتوا ينزلو المراسي من مقدمة السفينه ³¹ فقال بولس للضابط وعساكره :(لو هولا البحاره ما عيبقوش في السفينه مابش لكم نجاة) ³² فقطعوا العسكر حبال القارب ، وخلوه ينكع في الماء

³³ وقبل ما يطلع الفجر ، قلهم بولس ياكلوا وقال لهم :(ذيه اليوم ال14 وانتوا مريعين بدون اكل ، وما اكلتوا شي ³⁴ فيامنعاه انكم تاكلوا شويه ، انتوا محتاجين التغذيه عسب نجاتكم ، وما عتنكعش شعره واحده من روسكم) ³⁵ ولوما قال ذيه ، شل خبز وشكر الله قدامهم كلهم ، وبعدا قسمه وبدأ يأكل ³⁶ وتشجعوا كلهم وأكلوا ³⁷ وكان عددنا في السفينه 276 شخص ³⁸ ولوما شبعوا ، رجموا القمح في البحر عسب يخففوا عن السفينه

³⁹ وحين طلع الصبح ما استروش البحاره انهم يعرفوا البر ، لكنهم ابسروا خليج صغير بينه شاطئ رملي ، وقرروا انهم يتجهوا صليه لو قدروا ⁴⁰ فقطعوا المراسي وخلوها تنكع في البحر ، وفي نفس الوقت فكوا الحبال اللي تربط الدفه ، ورفعوا الشراع اللي قدام واتجهوا صى الشاطئ ⁴¹ ولكن السفينه صدمت تله رمليه ، فغرزت مقدمتها ولا عاد تحركت ، ومؤخرتها تحطمت من قوة الأمواج

⁴² وكان العساكر يشتوا يقتلوا المساجين عسب ما يسبحوش للشاطئ ويهربوا ⁴³ ولكن الضابط كان يشتي ينجي بولس ومنعهم من ذيه الخبر ، وأمر اللي يستروا يسبحوا انهم يسبحوا قبل الثانين للبر ⁴⁴ وبعدا يلحقهم الباقين على خشب من حق السفينه ، وكذيه يوصلوا كلهم للبر سالمين