¹ من : بولس وسيلا وتيموتاوس لا عند : جماعة المؤمنين في تسالونكي ، اللي بينتمو لله أبونا وعيسى المسيح سيدنا . ² عليكم النعمة والسلام من أبونا وسيدنا عيسى المسيح ³ احنا لازم ما نشكر الله دايمآ علميدكم يكل الإخوة . وهاذا لازم ، لان إيمانكم بيكثر خيرات ، ومحبة كل واحد منكم بينكم البين تزداد . ⁴ وعلميد هاذا بنفتخر بكم بين جماعات المؤمنين ، لثباتكم وإيمانكم في كل المشاكل والمضايق اللي بتتحملوها .. ⁵ وهاذا دليل على أن الله عادل في قضائه ، وماقصده الا تعتبرو وأهلآ لا مملكته اللي بتتئملو علميدها .. ⁶ ودام مالله عادل ، فاللي بيضايقوكم عيجازيهم ضيق . ⁷ أما أنتو اللي بتتئملو ، واحنا والكل ، عيديلنا كلنا راحة . وهاذا لاما يجي سيدنا عيسى من السماء مع ملايكته الجبارين وسط نار لاصية، ⁸ علميد يعاقب اللي ما بيعرفوش الله ولا بيطيعو إنجيل سيدنا عيسى . ⁹ وعقابهم هو الهلاك النهائي ، والطرد بعيد عن المسيح وعن جلاله وقدرته . ¹⁰ وهاذا لاما يجي ربنا في هاذك اليوم ، علميد يمجده أولياؤه الصالحين ، ويعبر كل المؤمنين على أعجابهم فيه . وأنتو عتوقعو بينهم لأنكم آمنتو بالرسالة اللي بلغناها لكم . ¹¹ وهاذا هو السبب بأننا بندعي الله علميدكم دايمآ ، علميد يخليكم أهلا لما دعاكم له ، وعلميد يتمم لكم بقوته وكل رغبة صالحة ، وكل مابتفعلوه بالإيمان . ¹² وبهاذا بيتمجد أسم سيدنا عيسى وبوساطتكم ، وأنتو تتمجدو بواسطته ، وبفضل نعمة إلهنا وعيسى المسيح سيدنا ..