¹ اما علميد جية سيدنا عيسى المسيح والتقينا معه ، وبنتراشكم ياكل الأخوة . ² وأنتبهو ترتبشو فيسع ولا تضبحو من اللي بيدعو أن يوم السيد قد جاء من صدق ، وبيستندو في هاذا على نبؤة او كلمة سمعوها أو رسالة بيدعو انها مننا . ³ ولا تسمحوش لاحد يخدعكم بأي حال من الأحوال . لانهو قبل مايجي هاذك اليوم ، ولازم ما ينتشر الضلال بالبداية ، وعيظهر شخص وهو الشر المجسم ، اللي مصيره الهلاك .. ⁴ وبيعادي كل من أسمه إله أو معبود وبيرفع نفسه من فوقهم كلهم ، حتى انهو بيجلس في بيت الله ، وبيدعي أنهو نفسه الله . ⁵ وهل بتذكرو أنني قلتلكم هاذا لاما كنت عندكم ؟ . ⁶ وأنتو داريين ماهو اللي بيمنع بوقوع هاذا بالوقت الحاضر ، علميد يظهر شخص الشر المجسم بوقته المطلوب . ⁷ لأن قوة الشر شغالة ذلحين في السر ، لانو به حاجز . ولاما يرتفع هاذا الحاجز من الطريق ، ⁸ وبيظهر شخص الشر المجسم. لكن سيدنا عيسى عيقضي عليه بنفخة من لقفه ، ويبيده ببهاء جيته . ⁹ وان شخص الشر المجسم هاذا عيجي بفعل قوة الشيطان ، وعيفعل كل أنواع المعجزات والإيات والعجايب الكذبية . ¹⁰ وبيستخدم كل أنواع الشر علميد يخترف الهالكين . وهم هالكين لانهم ما قبلوش وما بيحبوش الحق اللي فيه نجاتهم . ¹¹ وعلميد هاذا السبب عيرسل الله عليهم صلالا يزاوطك ، علميد يصدقو الباطل ¹² وبهاذا عيحل العقاب على كل اللي ما بيؤمنوش بالحق مابلا مرتاحين وفارحين بالشر . ¹³ اما احنا ، لازم مانشكر الله دايمآ علميدكم ياكل الإخوة لأن المسيح بيحبكم ، وقد اختاركم من بين الكل علميد تنجو بعمل روحه اللي بيطهركم بالإيمان وبالحق . ¹⁴ وهو دعاكم علميد هاذا ، بواسطة الأنجيل اللي بشرناكم فيه ، علميد يوقعلكم نصيب في جلال سيدنا عيسى المسيح . ¹⁵ ماذلحين أثبتو ياكل الأخوة ، تمسكو بالتعاليم اللي سلمناها لكم ، سواء ما قلناه لكم أو ما كتبناه في رسالتنا . ¹⁶ وأسئل سيدنا عيسى المسيح ، والله أبونا اللي بيحبنا وبينعم علينا بالعزاء النهائي وبالرجاء أكيد . ¹⁷ علميد يعزي قلوبكم ويشدشدكم علميد تقولو وتدرو ماهو السابر دايمآ ..