¹ ياكل الإخوة ، أنتو ما تحتاجوش أننا أكتب لكم بسبة تواريخ ومواعيد هاذه الإمور . ² وأنتو داريين أن يوم ربنا عيجي سعما يجي سارق في اليل . ³ ولاما يقول الناس : كل حاجة في سلام وأمان " ويهلكو فجئة ، سعما تفاجئ الإم الولادة المرة الحامل ، وما يقدروش يهربو . ⁴ أما أنتو ياكل الإخوة ، فمشنتو في الظلمي ، وهاذك اليوم ماعيفاجئكمش ساع السارق . ⁵ أنتو كلكم أهل النور وأهل النهار . واحنا مشحنا أهل اليل اوالظلمي . ⁶ ولازم ان احنا مانرقدش سعما بيفعل الثانيين ، مابلا نسهر ونمسك أنفسنا .. ⁷ لإنهو في اليل بيرقد اللي بيرقدو ، ويسكر اللي بيسكرو .. ⁸ أما احنا من أهل النهار ولازم نمسك أنفسنا ، وتلبس الإيمان والمحبة وكأنها درع يحمي الصدر ، والإمل في النجاة وكأنها خوذة بتحمي الراس . ⁹ لأن الله اختارنا مشهو علميد نقاسي ضبحه ، مابلا علميد يوقع لنا على النجاة بواسطة سيدنا عيسى المسيح . ¹⁰ والمسيح مات علميدنا علميد نعيش معه ، سواء كنا أحياء أو أموات لاما يجي . ¹¹ ماذلحين كل واحد يشجع الثاني بينكم البين ، وشددو بينكم البين ، سعما أنتو داريين بالمقصود ¹² ونسألكم ياكل الإخوة ، بأن تحترمو اللي بيتعبو بينكم ، اللي هم قادة ومعلمين لكم في حياتكم مع المسيح . ¹³ أحترموهم قوي وحبوهم علميد الخدمة اللي بيقومو بها . عيشو سوا بالسلام . ¹⁴ وبنطلب منكم هاذا يكل الاخوة : حذرو الكسلين ، وشجعو الخايفين ، وساعدو المستضعفين ، واصبرو مع الكل . ¹⁵ ولاتجازوش عن الشر بالشر ، مابلا اسمعو دايمآ لعمل الخير بينكم البين ولكل الناس . ¹⁶ وخليكم دايمآ فارحين ، ¹⁷ وصلو وستمرو ، ¹⁸ واحمدو الله على كل حال ، لأن هاذا هو مايشتيه الله منكم كمؤمنين بسيدنا عيسى المسيح .. ¹⁹ ولا تطفوش نار الروح ، ²⁰ ولا تحتقروش موهبة النبوة . ²¹ واختبرو كل حاجة ، وتمسكو بما هو أحسن ، ²² وتجنبو كل أنواع الشر ²³ وأسئل الله بنفسه اللي بيدي السلام وبيخليكم صالحين للتمام ، وبيحفظ كيانكم كله ، والروح والنفس والجسد، وبدون عيب لاما يجي سيدنا عيسى المسيح . ²⁴ اللي دعاكم أمين وهو عيفعل هاذا . ²⁵ وياكل الأخوة ، صلو علميدنا . ²⁶ وسلمو على كل الإخوة بحبه طاهرة . ²⁷ واوصيكم قدام المسيح بأن تقرأو هاذه الرسالة لكل الأخوة . ²⁸ نعمة سيدنا عيسى المسيح معكم ..